ფოტოზე აღბეჭდილმა ძაღლმა, სამტრედიაში ჭავჭავაძის ქუჩაზე გუშინ და დღეს ორი შუახანს გადაცილებული ქალი დაკბინა.
52 წლის ნუნუ მახარაძე ჭავჭავაძის ქუჩაზე მდებარე საყვავილეს მეპატრონეა. იგი საქმიანობდა, როცა აგრესიულმა ძაღლმა დაკბინა. თეთრი ფერის, ბეწვგაცვენილი ძაღლი ჯერ მარჯვენა მხარეზე დაეტაკა, მკერდი და მკლავი დაუკბინა, შემდეგ კბილები ჩაასო თეძოზე.
,,გული არ შემწუხებია, მაგრამ საშინელი შიში და ტკივილი ვიგრძენი. თავდაპირველად მკერდზე დამეტაკა, რომ მოვიგერიე, შემდეგ მარცხენა მკლავზე მეცა, შემოტრიალებულს გამომეკიდა და ზურგიდან დამესხა თავს. მომცვივდნენ ადამიანები , გამიწიეს პირველადი დახმარება. შვილმა მანქანით სამედიცინო ცენტრში წამიყვანა, სადაც დახმარება გამიწიეს. მაქვს შაქრიანი დიაბეტი, მაწუხებს ჩიყვი, მაქვს სისხლძარღვების პრობლემა. სიკვდილს ჩავხედე თვალებში. მინდა, თხოვნით მივმართო იმ ადამიანებს, ვისაც ქუჩის ძაღლების პრობლემების მოგვარება შეუძლიათ,”– განაცხადა დღეს ,, გურია ნიუსთან” დაზარალებულმა ქალბატონმა.
დაკბენის ფაქტს სამტრედიაში ათეულობით ადამიანი შეესწრო.
,,ეს იყო საშინელი სცენა, რა დაინახა ჩემმა თვალებმა, გაავებული ძაღლი როგორ უმოწყალოდ კბენდა ნუნუ მახარაძეს. ამ ლოკაციაზე ძაღლების მომრავლებას ერთი რამით ვხსნი, გამოდიან ადამიანები მაღაზიებიდან და იქ ნაყიდი პურპროდუქტებით პირდაპირ ქუჩაში კვებავენ ქუჩის ძაღლებს. რაღაც აუცილებლად უნდა შეიცვალოს, გემუდარებით, მოგვხედეთ,”– საკუთარი ემოცია ასე გამოხატა მეორე საყვავილის მფლობელმა, დალი ვაჩეიშვილმა.
ჭავჭავაძის ქუჩაზე მდებარე ობიექტების მეპატრონეები ამ წუთებშიც დაგვიკავშირდნენ და გვითხრეს, რომ იმავე ძაღლმა დღეს იგივე ტერიტორიაზე კიდევ ერთი ქალბატონი დაკბინა.
ავტორი
