გასულ კვირას, ოზურგეთის მუნიციპალიტეტის საკრებულოს რიგგარეშე სხდომაზე, რომელსაც საკრებულოს თავმჯდომარის მოადგილე, გიორგი ღურჯუმელიძე უძღვებოდა, ოთხი საკითხი განიხილეს.
საკრებულოს წევრები მოწონებით შეხვდნენ საკითხს _ “ქალაქ ოზურგეთში, გრიბოედოვის ქუჩა #20-ში მდებარე სახლის მიმდებარე კედელზე, გამოჩენილი ქორეოგრაფის, ხელოვნების დამსახურებული მოღვაწის, ღირსების ორდენის კავალერის ჯუმბერ დუნდუას სახელობითი მემორიალური დაფის განთავსების შესახებ”.
საკრებულოს შესაბამისი კომისიის წევრმა, ლელა საჯაიამ, გარდაცვალების ვადის (15 წლის გასვლამდე) შეზღუდვიდან გამომდინარე, გამონაკლისის დაშვების მიზანშეწონილობის შესახებ ისაუბრა და თქვა, რომ ჯუმბერ დუნდუა ის იშვიათი ხელოვანთაგანია, რომლის სახელის უკვდავსაყოფად, მსგავსი ნაბიჯის გადადგმა მართებულია.
_ გიორგი სალუქვაძის შემდეგ, ასეთი მასშტაბის და დონის ქორეოგრაფი სხვა არ გვყავს. ის იყო, ასევე, ძლიერი ორგანიზატორი. მისი ხელმძღვანელობით, ქორეოგრაფიული ანსამბლი დამოუკიდებლად გადიოდა საზღვარგარეთ და შეეძლო საათნახევრიანი კონცერტის შეუსვენებლად ჩატარება.
ნურავინ მიწყენს თუ ვიტყვი, რომ სხვა ანსამბლები, მომღერლებთან ერთად ახერხებდნენ ამას, რათა სიმღერის დროს მოცეკვავეებს შეესვენათ.
ჯუმბერ დუნდუამ თაობები აღზარდა და აზიარა ქართულ ხალხურ ქორეოგრაფიას. ის ანსამბლის თითოეულ წევრზე, როგორც შვილზე, ისე ზრუნავდა.
მისი აღზრდილები დიდ ანსამბლებში გადადიოდნენ ყოველთვის. ასე გრძელდება დღემდე. მივესალმებით ამ გადაწყვეტილებას, _ თქვა გამოჩენილი ქორეოგრაფის შესახებ საკრებულოს დეპუტატმა ლევან ნინიძემ.
განკარგულება საკრებულოს წევრთა სრული მხარდაჭერით დაამტკიცეს, _ მემორიალური დაფა გრიბოედოვის ქუჩაზე, ხელოვანის საცხოვრებელი სახლის მიმდებარედ კედელზე განთავსდება.
ყველაზე მნიშვნელოვანი უწოდეს ოზურგეთის საკრებულოს რიგგარეშე სხდომაზე განხილულ საკითხებს შორის, სოფელ შრომაში ახალი საბავშვო ბაღის აშენების თაობაზე პროექტის განხილვას.
საკითხზე _ “ოზურგეთის მუნიციპალიტეტის, სოფელ შრომის ადმინისტრაციულ ერთეულში, საბავშვო ბაღის მშენებლობის პროექტის მოწონების თაობაზე”, _ მუნიციპალიტეტის მერიის ეკონომიკის სამსახურის უფროსმა, ალეკო მამეშვილმა ისაუბრა.
_ სოფელ შრომის თემში, საბავშვო ბაღის მშენებლობის პროექტი გახორციელდება. ის საგრანტო კონკურსში მიიღებს მონაწილეობას, რომელიც საპილოტე რეგიონების ინტეგრირებული განვითარების პროგრამის ფარგლებში ხდება.
ეს არის ევროკავშირის და საქართველოს ერთობლივი პროგრამა. გამოცხადება კონკურსი. საბავშვო ბაღში იქნება საუკეთესო გარემო, ყველანაირი სიკეთით, რაც პატარებს სჭირდება, _ თქვა მან და კიდევ ერთხელ ხაზგასმით განმარტა, რომ აღნიშნული ინფრასტრუქტურული პროექტი საქართველოს საპილოტე რეგიონების განვითარების, სამთავრობო კომისიის მიერ გამოცხადებული საგრანტო კონკურსის ფარგლებში მომზადდა.
პროექტის ღირებულება არის 497 720 ლარი. საბავშვო ბაღის პროექტს ევროკავშირი დააფინანსებს. მას ადგილობრივი ბიუჯეტიდანაც ექნება თანადაფინანსება.
საკრებულომ მოიწონა და დაამტკიცა განკარგულება.
საკრებულომ დაამტკიცა განკარგულება: “მუნიციპალიტეტის საკუთრებაში არსებული მოძრავი ქონების, სარგებლობის უფლებით გადაცემაზე, ოზურგეთის მუნიციპალიტეტის მერისთვის თანხმობის მიცემის შესახებ” .
კერძოდ, ამ განკარგულებით, მუნიციპალიტეტის საკუთრებაში არსებული მოძრავი ქონება, ახლა დროებით სარგებლობაში გადაეცემა მყარი ნარჩენების მართვის კომპანიას.
თუ აქამდე სანაპირო ზოლის დასუფთავებას ახდენდა მუნიციპალიტეტის მომსახურების ცენტრი, ამიერიდან გურიაში, შავიზღვისპირა ზოლში დასუფთავებას და მყარი ნარჩენების გატანას მოახდენს მყარი ნარჩენების მართვის კომპანიები.
როგორც საკრებულოს სხდომაზე განმარტეს, “შპს “საქართველოს მყარი ნარჩენების მართვის კომპანიამ” მოითხოვა მუნიციპალიტეტის საკუთრებაში არსებული მოძრავი ქონების სარგებლობაში გადაცემა, დაგეგმილი ინფრასტრუქტურული პროექტის ეფექტიანად გახორციელებისა და ლანჩხუთისა და ოზურგეთის მუნიციპალიტეტების შესაძლებლობების გაძლიერების მიზნით.
კერძოდ, საქმიანობა ეხება 2021-2023 წლების განმავლობაში, სანაპირო ზოლის ინფრასტრუქტურის მოწესრიგებას და წარმოქმნილი ნარჩენების გატანას, მის მართვაში არსებულ ობიექტებზე (ნარჩენების გადამტვირთ სადგურზე და არასახიფათო ნარჩენების ნაგავსაყრელებზე), ასევე, მდინარეებზე _ ნატანებზე, სეფაზე, სუფსასა და ურეკის არხზე დამონტაჟებული ნარჩენების დამჭერების მოვლა.
“რიგგარეშე სხდომაზე განხილული საკითხები, ძალზე რიგიანი და დროულია. განსაკუთრებით სასიხარულოა შრომაში ახალი საბავშვო ბაღის პროექტის გახორციელება. აქ, დიდი ხანია, ახალი საბავშვო ბაღის აშენებაზე ოცნებობენ”, _ თქვა საკრებულოს წევრმა, სოფელ შრომიდან დავით ჭაკნელიძემ.
ავტორი: მარინა ჩიხლაძე
