დაზიანებული ინფრასტრუქტურა, წაქცეული ელექტროგადამცემი ბოძები, მოთხრილი ხეები, სახლებზე გადახდილი სახურავები, ჩახერგილი გზები, ღამე ღია ცის ქვეშ დარჩენილი მოსახლეობა _ ოზურგეთში სტიქიისგან მიყენებულ ზარალს ითვლიან.ძლიერმა ქარმა ოზურგეთის მუნიციპალიტეტის მნიშვნელოვნად დააზარალა. სტიქიამ როგორც ქალაქში ასევე ოზურგეთის მუნიციპალიტეტის სოფლებში მრავალბინიან საცხოვრებელ კორპუსებს და კერძო სახლებს სახურავები გადახადა. გრიგალის შედეგად მოგლეჯილია ხეები, დაზიანებულია ბუნებრივი აირის მილსადენები და ელექტროგადამცემი ხაზები.
დღეს, სტიქიასთან დაკავშირებით, ოზურგეთში რეგიონული განვითარებისა და ინფრასტრუქტურის მინისტრის მოადგილე კახა გულედანი იმყოფებოდა. გულედანი ოზურგეთის მაჟორიტარ დეპუტატთან არჩილ თალაკვაძესთან, გუბერნატორთან და ადგილობრივი ხელისუფლების პირველ პირებთან ერთად სტიქიისგან მიყენებული ზარალის შედეგებს გაეცნო და მათთან ერთად ადგილზე დათვალიერა რამდენიმე ადგილი, სადაც ძლიერმა ქარმა ყველაზე მწვავედ შექმნა პრობლემა. “გურია ნიუსმა“ ის ოჯახები მოინახულა, რომელთაც სტიქიამ ყველაზე მეტად შეუქმნა პრობლემა და დააზიანა მათი საცხოვრებელი სახლები.
ქალაქ ოზურგეთში, ნიკო ნიკოლაძის ქუჩა #50 მცხოვრები ია ურუშაძე “გურია ნიუსთან“ ამბობს, რომ როცა ძლიერი ქარი ამოვარდა, მათ მრავალბინიან საცხოვრებელ სახლს სახურავი უცებ მოგლიჯა, სახლში კი მცირეწლოვანი ბავშვები იყვნენ, რომლებიც ძლივს გადარჩნენ: “ისეთი ძლიერი ხმა ჰქონდა, მიწისძვრა მეგონა. შვილიშვილები მყავდა სტუმრად, სიკვდილი თვალით დავინახეთ, სულ ჩამომენგრა ჭერი, ახდილია სახურავი, ისეთი მძიმე ლოდები ცვიოდა, რამ გადაგვარჩინა, არ ვიცით. რამხელა ხმა ექნებოდათ ხომ წარმოგიდგენიათ. ვიყავით ქალაქის მერიაში, დავწერეთ განცხადება. მოვლენ და ნახავან ალბათ. რიგში 80 კაცი იქნებოდა, არ ინერვიულოთო კი მითხრეს. საშიშია აქ ცხოვრება. მაშველები გვყავდა. ერთი ქარი რომ დარჩეს, ალბათ, საერთოდ აღარ დარჩება და სულ დაინგრევა“.
ყველაზე მეტად დაბა ლაითური დაზარალდა. აქ დღეს, მოსწავლეთა უსაფრთხოების მიზნით, სასწავლო პროცესი შეწყდა.
აღსანიშნავია, რომ დაბა ლაითურში ქარმა დააზიანა და სახურავი გადახადა ბინებს, რომლებსაც რეაბილიტაცია 2015 წელს ჩაუტარდა და სრულად გადაიხურა.
მოსახლეობის თქმით, სიძველისგან დაზიანებულ სახლებს არ შექმნია პრობლემა და ახალგადახურული კორპუსები ჩამოინგრა: დაბა ლაითურში გამგებლის წარმომადგენელი ემზარი ბერიძე “გურია ნიუსთან“ ამბობს, რომ სულ 14 ბინაა, რომელიც სრულიად გადახურვას საჭიროებს: “14 ბინა საჭიროებს გადახურვას სრულად. აქედან, 7 კერძო და 7 მრავალბინიანი სახლია. ისე ძალიან ბევრი სახლი დაზიანდა, 100-ამდე მაინც იქნება. ეს ბინები 2015 წელს გადაიხურა, თუმცა ისეთი ქარბორბალა იყო, რომ მთლიანად ხეობაა წამოსული”.
ამ რაიონში 8 ოჯახი ცხოვრობს.
აქ მცხოვრებლები თამაზ თავდგირიძე და ამირან ანთაძე, ამბობენ, რომ ძლიერ ქარს ვერ გაუძლო ახალგადახურულმა სახურავებმა: “იყვნენ მოსულები გუშინ, დაგვპირდნენ გავაკეთებთო. არ იყო ცუდი გადახურული, მაგრამ რა მოხდა, მაინც არ ვიცით“.
ლია ქველაიშვილი: “მიყუჟულები ვიყავით კუთხეში, ასე გავათენებინეთ ბავშვებს. რა გითხრათ, არ ვიცი, სულ გადამძვრალია სახურავი. ყველა გაჭირვებულები ვართ, იყვნენ ამოსულები, გადაიღეს ფოტოები, არის იმედი, რომ დაგვეხმარებიან“.
ლეილა გაბეჩავა, დაბა ლაითურის სკოლის დირექტორის მოვალეობის შემსრულებლები: “მოსწავლეთა უსაფრთხოების მიზნით შევწყვიტეთ სასწავლო პროცესი, სტიქიამ დააზანია სკოლა, ჩაამსხვრია ფანჯრები, ჩამოინგრა სახურავი, რამდენიმე ოთახში ფანჯრები შემოანგრია. შაბათს მოხდება გაცდენილი დღის აღდენა. ჩამოსულია წყალი, იყვნენ განათლებისა და ინფრასტრუქტურის სამინისტროდან და შეგვპირდნენ, დაახლოებით, ორ კვირაში მოწესრიგდება ყველაფერიო“.
უმრავლესობის დეპუტატი არჩილ თალაკვაძე ამბობს, რომ დაზარალებული მოსახლეობის დახმარება უმოკლესს ხანებში მოხდება: “ქარმა მნიშვნელოვანი ზიანი მიაყენა გურიის რეგიონს, შექმნილია შესაბამისი შტაბი, ამ მომენტში ვიმყოფებით ხალხის გვერდით, დაწყებულია სამუშაოები. უმოკლეს დროში მოხდება დახმარება, უმეტეს სოფელში უკვე აღდგენილია შუქის მიწოდება. ადგილზე იმყოფება ინფრასტრუქტურის სამინისტროს წარმომადგენლები. ზარალის 
დათვლაც მისულია ბოლომდე და რამდენადაც ჩემთვის ცნობილია, მთავრობა უმოკლესს ვადებში დაეხმარება დაზარალებულ მოსახლეობას და გააკეთებენ რეაგირებას”.
“კახა გულედანი, რეგიონული განვითარებისა და ინფრასტრუქტურის მინისტრის მოადგილე: “დაზიანებულია 500-ზე მეტი კერძო სახლი, გურიის სხვადასხვა მუნიციპალიტეტში. ზოგს მთლიანად გადაეხადა სახურავი, ზოგს _ნაწილობრივ. დაზიანებულია საცხოვრებელი კორპუსებიც, ასევე, გზის სავალი ნაწილი, ვინაიდან ძლიერმა ქარმა მოტეხა ხეები და ჩახერგა გზები. დღეის მდგომარეობით, გზა სრულად აღდგენილია და გასუფთავებული, ასევე, აღდგენილია მთელ მუნიციპალიტეტებში ელექტროენერგიის მიწოდება, შევეცდებით მოკლე ვადებში, რომ დავეხმაროთ მოსახლეობას და მოვახდინოთ ამ დანგრეული სახლების რებილიტაცია.
