მემარჯვენე ნაციონალისტურმა ლიდერმა ჯორჯია მელონმა, რომელიც იტალიის მომავალი პრემიერ-მინისტრი გახდება, კიევს სრული მხარდაჭერა გამოუცხადა, მას შემდეგ რაც მიიღო უკრაინის პრეზიდენტის ვოლოდიმირ ზელენსკის მილოცვა არჩევნებში გამარჯვებისთვის. ამის შესახებ reuters წერს.
,,ძვირფასო ზელენსკი, თქვენ იცით, რომ უკრაინელი ხალხის თავისუფლების საქმეში შეგიძლიათ ჩვენი ერთგული მხარდაჭერის იმედი გქონდეთ. შეინარჩუნეთ სიმტკიცე და თქვენი ძლიერი რწმენა”. – წერს მელონი Twitter-ზე.
მანამდე, ვოლოდიმირ ზელენსკიმ მელონის გამარჯვება Twitter-ზე მიულოცა და აღნიშნა, რომ “ახალ მთავრობასთან ნაყოფიერ თანამშრომლობას მოუთმენლად ელის”.
გამოცემა წერს, რომ მელონი იყო ერთ-ერთი იმ მცირერიცხოვან იტალიელ პოლიტიკურ ლიდერთაგანი, რომელმაც მთელი გულით დაუჭირა მხარი წამსვლელ პრემიერ-მინისტრის მარიო დრაგის გადაწყვეტილებას უკრაინაში იარაღის მიწოდების შესახებ, მიუხედავად იმისა, რომ ის მთავრობის ოპოზიციაში იყო.
მელონის საპირისპიროდ, გამარჯვებული პოლიტიკური პარტიების, ლიგისა და Forza Italia-ს ლიდერებს რუსეთსა და მის პრეზიდენტ, ვლადიმირ პუტინთან მჭიდრო ისტორიული კავშირები აქვთ. კერძოდ, გასულ კვირას, Forza Italia-ს ლიდერმა, სილვიო ბერლუსკონმა აღნიშნა, რომ ვლადიმირ პუტინს უკრაინაში შეჭრის გარდა სხვა ალტერნატივა არ დაუტოვეს, ვინაიდან მას კიევის ხელისუფლებაში “ღირსეული ადამიანების” დასმა სურდა. ბერლუსკონის ამ განცხადებას იტალიაში არჩევნების წინ მწვავე კრიტიკა მოჰყვა.
იტალიის ვადამდელ საპარლამენტო არჩევნებში მოპოვებული წარმატების შედეგად, ჯორჯია მელონი იტალიის პირველი ქალი პრემიერმინისტრი გახდება და უხელმძღვანელებს მეორე მსოფლიო ომის შემდეგ ყველაზე მემარჯვენე მთავრობას.
ავტორი
