საქართველოს პარლამენტის შენობის წინ სოფელ შუქრუთელები 33-ე დღეა შიმშილობენ და გაფიცულები არიან. სოფლის წარმომადგენლები ხელისუფლებას პროცესში ჩართულობას სთხოვენ, რათა კომპანია „ჯორჯიან მანგანეზმა“ მათთან აღებული ვალდებულებები შეასრულოს.
გუშინ, საქართველოს პრემიერ-მინისტრ, ირაკლი კობახიძეს ბრიფინგზე ჟურნალისტმა შუქრუთელების შესახებ ჰკითხა.
ირაკლი კობახიძე: ზოგადად, იცით, რომ მე არასდროს არ მოვრიდებივარ შეხვედრებს, მაგრამ რა ინფორმაციაც მქონდა, ბუნებრივია, ეს არ არის მხოლოდ კომპანიის ინფორმაცია. ძირითადად სამი პირი იყო ჩართული ამ აქციის ორგანიზებაში, ხშირად ემთხვევა ხოლმე წინასაარჩევნო პერიოდს ასეთი აქციები, რაც სამწუხარო მოვლენაა. რა ინფორმაციაც მაქვს, მათ შორის, ერთ-ერთ პირს ჰქონდა 80 ათასი ლარი აღებული კომპენსაცია, მეორეს _ 50 ათასი, თუმცა, მიუხედავად იმისა, რომ ეს იყო აღებული, მოვიდა არჩევნები და… ეს არის ის ინფორმაცია, რაც მე მაქვს.
მანვე აღნიშნა, რომ შემდეგ ბრიფინგამდე დეტალურად გაეცნობოდა შუქრუთელების პრობლემებს.
ეთერ გაფრინდაშვილმა თავის თანასოფლელებთან ერთად 32-ე ღამე გაათენა პარლამენტის წინ. მისივე თქმით, ის მხოლოდ ღამით უერთდება თავის მეგობრებს.
ეთერი გაფრინდაშვილი ამბობს, რომ ეს პროტესტი არის იმის შედეგი, რომ სოფელში მათ პატრონი არავინ ჰყავთ და სოფელში მცხოვრები ადამიანების უფლებები ირღვევა.
მანვე გააკეთა „გურია ნიუსთან“ კომენტარი ირაკლი კობახიძის გუშინდელ ბრიფინგზე.
„ვნახოთ, რა იქნება. დღეს, ერთ-ერთმა ჟურნალისტმა ჰკითხა ჩვენს შესახებ და პრემიერ-მინისტრმა თქვა, რომ გაეცნობოდა ჩვენს პრობლემებს. მისი თქმით, ერთ კვირაში გავიგებთ მის პასუხს. ველოდებით ირაკლი კობახიძის მორიგ ბრიფინგს. თქვენი აზრით, რამდენად იცნობს ხელისუფლება თქვენი სოფლის პრობლემებს? – ჩემი აზრით, შეუძლებელია ჩვენი გასაჭირის შესახებ, რომ არ იცოდეს. ალბათ, ნიუანსებში გარკვევა სურს და ჩვენც ველოდებით.“ – გვითხრა ეთერ გაფრინდაშვილმა.
„იქამდე ვიშიმშლებთ და ვიდგებით აქ, სანამდე არ მოგვხედავენ და ხალხს არ დაეხმარება ხელისუფლება. წავიკითხე მისი კომენტარი და ვნახოთ, რა იქნება. ყველა ერთად გავიგებთ მის განცხადებას. აქამდე უნდა მოეკითხა ჩვენი ამბავი. კომპანია წლების განმავლობაში არ გვანებებს თავს და ვერ მოხდა სიტუაციის მოგვარება. ეკოლოგიურად გაგვანადგურეს სოფელი და დაგვაზიანეს. ეს პირველი გაფიცვა არ არის და არც შიმშილობა არის პირველი. წლებია ვიბრძვით, რომ კომპანიამ თავისი პირობები შეასრულოს და ადამიანებს სიცოცხლის უფლება მოგცეს. _ გვითხრა აქციის ერთ-ერთმა მონაწილემ ბექა მაჭარაშვილმა.
აქციის მონაწილეებმა „გურია ნიუსთან“ საუბრის დროს აღნიშნეს, რომ რაც პარლამენტთან დაიწყეს აქცია, მათთან ხელისუფლებიდან ან პარლამენტიდან არავინ მისულა და არ დაინტერესებულა მათი პრობლემებით.
„მისი პირდაპირი მოვალეობა, რომ დაინტერესებულიყო ჩვენი პრობლემებით, მაგრამ ჯერ არ დაინტერესებულა. ღამეს ვათენებ მასთან.
ამ პარლამენტში არის ჩვენი მუნიციპალიტეტის დეპუტატი, მაგრამ ჩვენთვის არ სცალია. ასე ცხოვრება არ შეიძლება. ერთხელ და სამუდამოდ უნდა გადაწყდეს ხალხის სასიკეთოდ ეს ამბავი“ – გვითხრა ეთერ გაფრიდაშვილმა.
ავტორი
