ლანჩხუთის მუნიციპალიტეტის მოსახლეობის ერთ-ერთ მთავარ პრობლემას წყლით უზრუნველყოფა წარმოადგენს. საკრებულოს ბოლო სხდომაზე არა ერთმა დეპუტატმა დასვა ეს საკითხი და მის სოფელსა თუ თემში ამ კუთხით არსებული პრობლემის მოგვარება სთხოვა ადგილობრივი ხელისუფლების აღმასრულებელ რგოლს.
ამ საკითხზე საუბარი ჩიბათის ადმინისტრაციული ერთეულის მაჟორიტარმა დეპუტატმა გიორგი ჩახვაძემ წამოიწყო. მისი თქმით, ადგილობრივი მოსახლეობა საკმაოდ გაღიზიანებულია და წყლის პრობლემის დროულ მოგვარებას ითხოვს:
“სათავე ნაგებობაზეც ვიყავით მისული. ადგილზე ვნახეთ იქ არსებული მდგომარეობა, თუმცა, ვერანაირად ვერ მოხერხდა, რომ სოფელში წყლით მომარაგების პრობლემა საბოლოოდ გადაიჭრას და მოსახლეობა ამის გამო არ იყოს უკმაყოფილო. ვფიქრობ, უნდა მოხერხდეს და გაკეთდეს პროექტი ამ წყლის სისტემის საბოლოოდ მოსაწესრიგებლად. თორემ კვირა არ გავა, რომ რამე არ დაზიანდეს და პრობლემა არ შექმნას. სხვანაირად არ გამოვა _ ამდენი ხანია ვწვალობთ და შედეგი არაა”, _ ამბობს ჩახვაძე.
გაირკვა, რომ იგივე პრობლემა აწუხებს ლესის მოსახლეობის გარკვეულ ნაწილს. როგორც სოფლის მაჟორიტარმა, ელისო ჭიჭინაძემ აღნიშნა, ეგრეთ წოდებულ “კუნჭულიების უბანში”, წყლის ძველი მილები 2013 წელს გამოიცვალა და პრობლემაც სწორედ აქედან მოყოლებული შეექმნათ ადგილობრივებს.
ამ თემაზე საუბრისას შედარებით კრიტიკული იყო ნიგოითის მაჟორიტარი დეპუტატი ზაზა წულაძე, რომელმაც სამუშაოების შესრულების ხარისხზეც გააკეთა აქცენტი. წულაძის ინფორმაციით, მიუხედავად იმისა, რომ სოფელ ჭყონაგორაში წყლის სისტემის რეაბილიტაცია 2016 წელს გახორციელდა, სოფლის მოსახლეობა დღემდე უწყლობას უჩივის:
“ჭყონაგორაში წყლის სისტემის სარეაბილიტაციო სამუშაოები 2016 წელს გახორციელდა, მაგრამ აქედან ორ თვეში მოსახლეობას წყალი მაინც არ ჰქონდა. როგორც მახსოვს, ამ პროექტის ღირებულება თავიდან 132 ათასი ლარი იყო, მაგრამ ტენდერში გამარჯვებულმა ფირმამ ეს სამუშაოები 85 ათას ლარად შეასრულა. გამაგებინოს ვინმემ, თუ შესასრულებელ სამუშაოებს რეალურად 132 ათასი ლარი სჭირდება, როგორ უნდა შეასრულოს ეს ვინმემ 85 ათას ლარად?! ხომ არ მოხდა ეს შესრულებული სამუშაოების ხარისხის ხარჯზე, ამას უნდა მივაქციოთ ყურადღება?!” _ ამბობს წულაძე.
დეპუტატის მოსაზრებას, რომ შესრულებული სამუშაოების ხარისხზე მეტადაა ყურადღებაა გასამახვილებელი, ეთანხმება ლანჩხუთის მერი ალექსანდრე სარიშვილიც და წულაძეს ამ მხრივ სრულ სოლიდარობას უცხადებს. თუმცა, დეპუტატის მხრიდან გაჟღერებული ეს შენიშვნა მიუღებელია ინფრასტრუქტურის სამსახურის უფროსის, ლევან ჩხაიძისთვის _ მისი თქმით, ჭყონაგორის შემთხვევაში, მოსახლეობის მხრიდან წყლის ჭარბ მოხმარებასთან გვაქვს საქმე და პრობლემასაც ეს ქმნის:
“აქ მხოლოდ შესრულებული სამუშაოების ხარისხზე ნუ ვილაპარაკებთ, დიდია მოსახლეობის მხრიდან წყლის მოხმარება და ამიტომაც არ ყოფნით წყლის მარაგი. ასეა ლესის და სხვა სოფლების შემთხვევაშიც”, _ განმარტა ინფრასტრუქტურის სამსახურის უფროსმა.
