სოციალურ ქსელში გავრცელებული დაუზუსტებელი ინფორმაციით, აფრიკის დასახლებაში და თბილისის სხვა რაიონებში, 20 დეკემბერს, კვირას, მუნიციპალური ინსპექციის მიერ უნებართვო შენობა-ნაგებობების ნგრევის პროცესის განახლება იგეგმება. ამგვარი ინფორმაციის გავრცელება უკავშირდება ასეულობით ოჯახის გამძაფრებულ შიშს და მოლოდინს მათი საცხოვრებლის შესაძლო ნგრევის და გამოსახლების თაობაზე. სწორედ ამიტომ უპირველეს ყოვლისა, მოვუწოდებთ თბილისის მერიას დაუყოვნებლივ გააკეთოს საჯარო განცხადება შენობა-ნაგებობების დემონტაჟის თაობაზე მერიის მიერ დაგეგმილი მოქმედებების შესახებ.
გავრცელებული ინფორმაციის დადასტურების შემთხვევაში, EMC მიმართავს თბილისის მუნიციპალიტეტს, განსაკუთრებით ზამთრისა და პანდემიის გათვალისწინებით, უარი თქვას საცხოვრებლის დანიშნულებით აგებული უნებართვო შენობების დემონტაჟზე, მიუხედავად იმისა შენობებში ამჟამად ცხოვრობენ თუ არა ოჯახები.
„საცხოვრებლად გამოყენების მიზნით აგებული ან საცხოვრებლად გამოყენებული უნებართვო შენობების დემონტაჟი მოქმედი კანონმდებლობით ფორმალურად სამშენებლო სამართალდარღვევად მიიჩნევა, თუმცა ამგვარი გადაწყვეტილების მიღებისას არ ხდება ოჯახის საცხოვრისის საჭიროებების და ამ შენობების გამოყენების საკითხის შეფასება. მათ შორის, არ ხდება ოჯახების სოციალ-ეკონომიკური მდგომარეობის, ოჯახის შემოსავლის გათვალისწინებით ალტერნატიულ საცხოვრისზე მისაწვდომლობის საკითხის, მათი ან მათი ოჯახის წევრების საკუთრებაში არსებული ქონების ფაქტობრივი სარგებლობის შესაძლებლობის და პირობების და სხვა მნიშვნელოვანი გარემოებების შესწავლა.
შესაბამისად, მუნიციპალიტეტის მიერ ჩატარებული წარმოება არ აფასებს ოჯახების რეალურ სოციალურ საჭიროებებს და მხოლოდ ფორმალური შესწავლის და ხშირად ბუნდოვანი და არაზუსტი ინტერპრეტაციის საფუძველზე, ოჯახების წარმოების პროცესში მონაწილეობის გარეშე, იღებს გადაწყვეტილებას საცხოვრებლად განკუთვნილი შენობების დემონტაჟის თაობაზე.
მუნიციპალიტეტის მიერ საცხოვრისად გამოყენებული უნებართვო შენობების ამ ფორმით დემონტაჟი, იმ შემთხვევაშიც კი თუ ნაგებობებში არ ცხოვრობენ ოჯახები, ზრდის ოჯახების საცხოვრებლის უფლების დარღვევის რისკებს. საცხოვრებლის უფლების ფუნდამენტური მნიშვნელობიდან გამომდინარე, აუცილებელია სახელმწიფომ ყველა ამგვარი გადაწყვეტილება განსაკუთრებული სიფრთხილით და საცხოვრებლის უფლების დაცვის უპირატესი ინტერესის გათვალისწინებით მიიღოს. სათანადო საცხოვრებელზე უფლება ადამიანისა და ოჯახების სოციალური უსაფრთხოების და კეთილდღეობის ბაზისური გარანტია და მასთან არის დაკავშირებული სხვა არა ერთი არსებითი უფლების რეალიზება. დაუშვებელია, ისედაც დაუძლეველი სიღარიბის, მძიმე დაუცველობისა და ყოველდღიური სოციალური უიმედობის წინაშე მცხოვრები ოჯახების დატოვება საცხოვრებლის გარეშე.
მოვუწოდებთ მერიას შეაჩეროს უნებართვოდ აგებული შენობების დემონტაჟის პროცესი და შეიმუშავოს სამართლიანი პოლიტიკა, წესი და პროცედურა, რაც საცხოვრებლის მიზნით აგებული უნებართვო შენობების დემონტაჟის თაობაზე გადაწყვეტილებისას გათვალისწინებს საცხოვრებელზე უფლების უპირატეს მნიშვნელობას და ინტერესს და დეტალურად, საფუძვლიანად და სამართლიან კრიტერიუმებზე დაყრდნობით განიხილავს და შეაფასებს ოჯახების საცხოვრებლის საჭიროებებს“,_ აცხადებს EMC.
