დღეს, სოფელ ლიხაურში, ცემენტის საწარმოს აშენების თაობაზე, ადგილობრივებთან შეხვედრა შედგა. გარემოს დაცვის სააგენტოს წარმომადგენლები და შპს „ბეთლემი 2008“ მფლობელები ადგილობრივებს ესაუბრნენ.
თემა სკოპინგის ანგარიშის მოსმენა იყო._
საკითხის ირგვლივ, სლაიდების ჩვენებით, ისაუბრეს დეპარტამენტის წარმომადგენლებმა _ ანა ჩართოლანმა და ნინო კუდაშვილმა, შპს „მწვანე მრჩეველის“ წარმომადგენლებმა _ გიორგი თევზაძემ და ლევან ოზბეთელაშვილმა.
შპს „ბთლემი 2008“ დირექტორმა გიორგი გორგოშიძემ და ილია კეჭაყმაძემ პასუხები გასცეს კითხვებს, თუმცა, ადგიობრივები საკითხის მიმართ კატეგორიულები იყვნენ.
_რა სკოპინგი? ექვთიმეს სოფელს შეეშვით. ლიხაური ექვთიმე თაყაიშვილის სოფელია. აქ ეკლესიაც გვაქვს, აჭისწყალიც, ექვთიმეს მუზეუმიც და ლუკმასაც ვჭამთ. არ გვშია და არ გვწყურია. თავი დაგვანებეთ. წაიღეთ ეს საწარმო და სადმე ლეკიანში დადგით. ასორმოცდაათი ჰექტარია იქ დაუსახლებელი ფართობი. ჯერ იყო და აჭისწყალს ფსკერი გამოუღეს… ძლივს მოვიშორეთ აქედან ვიღაც ფულის საშოვარზე მოსულები. დაგვანებეთ თავი. სტუმარი გვიყვარს. როცა გსურთ, მობრძანდით, მაგრამ ამ საქმეში ლიხაური არ დაგეთანხმებათ. მე მხარი დავუჭირე მთავრობას. ზოგი ადგება და ნაციონალს მიძახის, რაკი კრიტიკულად შევხედავ ამა თუ იმ საკითხს. არ გვჭირდება აქ ცემენტის ქარხანა, _განაცხადა ლიხაურელმა გაიოზ გორდელაძემ.
-დიახ, 250 ჰა არის ჩოლოქთან თავისუფალი სივრცე და წადით, იქ ააშენებნეთ, _ამჯერად თანასოფლელს შეეშველა დათო ვაშაყმაძე.
_რით დაიმსახურა ეს „პატივი“ ლიხაურმა, რომ ცემენტის საწარმო აქ აშენდეს? ჩემი სოფლის სიყვარულში ნურავინ ნუ შემეჯიბრება. მე გავიხარებ, თუ რაიმე ისეთი საწარმო აშენდება, ჩვენი ახალგაზრდები რომ დასაქმდებიან. აშენების წინააღმდეგი კი არ ვარ, მოსახლეობასთან ასე ახლოს დადგმა, არანაირად არ არის მიზანშეწონილი, _ თქვა პედაგოგმა გულჩინა გოთუამ.
ჟურნალისტების კითხვებმა, ხალხის მეტი რაოდენობა რატომ არ იყო ანგარიშის მოსმენაზე, ზოგი გააღიზიანა _ აქ ლაშქარს ხომ არ მოვიყვანთო.
_ყველა გავაფრთხილე, აქ ისე არავინ უნდა გაიგოს, რომ მე, რაკი ხელისუფლების წარმომადგენელი ვარ სოფელში, წინასწარ ვინმე ვნახე ან რაიმე დავუმალე ხალხს. ამ ადამიანებს პირველად ვხედავ. არ მოვიდა ბევრი. შეხვედრა კიდევ იქნება და უფრო მეტ ლიხაურელს ნახავთ აქ. უსამართლო შენიშვნას ვერ მივიღებ, -თქვა მუნიციპალიტეტის მერის წარმომადგენელმა სოფელში, ნანა წითლიძემ.
საკრებულოს წევრმა ბექა თოიძემ მოითხოვა საკითხის დაკონკრეტება. უპირველეს ყოვლისა კი, დასვა კითხვა, ჯანმრთელობის საკითხი უპირველესია და როგორ უნდა ვიყოთ დარწმუნებული, რომ ეს ადამიანებზე გავლენას არ მოახდენსო.
შპს „ბეთლემი 2008“ დირექტორმა, ასევე წარმომადგენელმა ილია კეჭაყმაძემ განაცხადეს, რომ კიდევ ბევრ შეხვედსრას მოაწყობენ. დაასაქმებენ 30 ადამიანს. ასევე მონაწილეობას მიიღებენ სხვადასხვა ოფიციალური პროგრამების გახორციელებაში. თუმცა, ადგილობრივები მაინც წინააღმდეგი იყვნენ.
„უნდა ვიცოდეთ, ვინ და რატომ აშენებს“, „ერთი წვენების და კონსერვის ქარხანა მაინც ააშენოს ვინმემ, ცემენტს რომ გვატენიან“, „ლიხაურში ცემენტის ქარხანა არ დაიდგმება“, „არ გვინდა და მორჩა“, „ეს უკვე გადაუწყვეტიათ და ახლა ანგარიშს გვაცნობენ“, „აქ ორას აცს მოვიყვანთ და შევხვდეთ. ასე არ გდაწყდება ეს“…
ვრცლად ლიხაურში ცემენტის საწარმოს აშენების შესახაებ , მალე გიამბობთ.
ავტორი
