დღეს, ოზურგეთის მუნიციპალიტეტის სოფელ ლიხაურის სხვადასხვა უბნების მცხოვრებლები შეიკრიბნენ და გააპროტესტეს სოფელ აჭისწყლის ხეობაში კარიერული წარმოება და კონკრეტულად შპს „კავკაზ ცემენტ ჯორჯიას“ მოუწოდეს, მეტად აღარ მოახდინონ მდინარის ხეობაში ინერტული მასალის ამოღება.
_ჩვენ შენებას არ ვუშლით ხელს, ჩვენ ხელს ვუშლით ნგრევას! წიაღისეულის ეროვნულ სააგენტოს როცა ვუთხარით, რომ დაბობმბილს რომ ჰგავს ხეობები, როცა ჩუჩქნიან, მოასწორეთ და ისე მაინც დატოვეთ გარემო-თქო, მაგის დრო სად გვაქვსო , გვითხრეს. ახლა ჩვენი შეკრების მიზანი ერთადერთია _ კომპანია „კავკაზ ცემენტ ჯორჯიამ“ უნდა შეწყვიტოს აჭის ხეობაში კარიერული წარმოება და მოახდინოს ადგილმონაცვლეობა, გაიგონ, ტრაქტორმა მეტად იქ შევლა არ გაბედოს, თორემ მთელი სოფელი დავადგებით თავზე! აჭისწყლის ხეობა ლიხაურის სავიზიტო ბარათია, ჩვენი ღირსებაა! – თქვა ეკოდამცველმა, პედაგოგმა, სოფლის მკვიდრმა ირმა გორდელაძემ თანასოფლელთა წინაშე.
სოფლის ყველა უბნის წარმომადგენლებმა სათითაოდ ისაუბრეს და ყველა იმეორებდა მთავარ ფრაზას – აჭისწყლის ხეობის დასცავად ქუდზე კაცი გამოვა!
აკაკი ცეცხლაძე, ლიხაურის მკვიდრი: მე, გლეხის ბიჭი ვამბობ ამას, რომ ეს საქციელი არაა და არავის დავანებებთ ექვთიმეს სოფლის წახდენას. არანაირი სიკეთე, უდიდესი ზიანის გარდა, ამ კარიერს არ მოაქვს აჭისწყლის ხეობისთვის! აჭისწყალი ჩვენი ბავშვობაა, ჩვენი სამყაროა! დავიცავთ, შვილს ვფიცავ!
გაიოზ გორდელაძე, ლიხაურის მკვიდრი: ქარვასლა რომ დაგვიდგან, რაც უნდა დაგვპირდნენ, ვამბობთ არას! ეგ კარიერი გააუქმონ და აიღონ მაქედან! ერთმა ექვთიმემ საქართველოს განძი დაიცვა და 2500 ლიხაურელი კი დაიცავს აჭისწყალს! აბა, ვნახოთ!
ავთანდილ ვაშალომიძე, ლიხაურის მკვიდრი: სად გვცალია ჩვენ, მაგათ ვდიოთ რიყეებში და ჭალა_ჭალა? აჭისწყალი სოფლის მარგალიტია, ტურისტული ზონაა! ისიც არ ეგონათ, ბახმაროზე თუ ავიდოდა ვინმე, განსაკუთრებით ზამთარში, მაგრამ შეხედეთ, რა ხდება! ახლა ჩვენ ვაპირებთ , სამართლებრივი გზით დავიცვათ აჭისწყლის ხეობა. ადვოკატი აყვანილი გვყავს და მივმართავთ სასამართლოს! და თუ არაფერი გამოვიდა, მოვბრუნდებით სოფელში, დავუძახებთ ლიხაურლებს და ვეტყვით, რომ არ არსებობს სამართალი და თავად უნდა ვიბრძოლოთ აჭისწყლის ხეობის გადასარჩენად!
კრების მონაწილეები ემოციურობის გარდა, კატეგორიულობითაც გამოირჩეოდნენ – მათ გაგონებაც არ სურდათ, რაიმე დაპირების სანაცვლოდ, მომხდარიყო აჭისწყლის ხეობაში კარიერული წარმოების განახლება.
კომპანიის წარმომადგენელმა, ირაკლი ჭელიძემ, რომელიც ლიხაურის მკვიდრია, ხალხს დაჰპირდა, რომ აღარ გააგრძელებენ მუშაობას და მოხდება ადგილმონაცვლეობა.
კრებას ოზურგეთის მუნიციპალიტეტის მერიის წარმომადგენელი თემურ ჭანუყვაძე, დეპუტატები ლევან მგელაძე და გიორგი თოიძე ესწრებოდნენ.
თემურ ჭანუყვაძემ, კრების დასასრულს ისაუბრა არსებული პრობლემის და მისი მოგვარების გზების აუცილებლობაზე, რის წინაპირობასაც დღევანდელი შეკრება წარმოადგნს:
_მე მეორედ ვესწრები აქ შეხვედრას და უნდა ვთქვა, რომ ახლა გაცილებით უკეთესი მდგომარობაა, რადგან ადრე ლიზენზიანტები უფრო ბევრი იყვნენ და კომპანიებიც არ იყვნენ კარგად ჩამოყალიბებული, როგორ უნდა მოეხდინათ ადგილმონაცვლეობა. ერთობლივი ძალისხმევით ლიხაურმა შეძლო, რომ ადგილმონაცვლეობაზე წასულიყო რამდენიმე კომპანია. ახლა ეს კომპანიაც, როგორც ვხედავთ, თანახმაა ადგილმონაცვლეობაზე და ეს ძალიან კარგია. დაუყოვნებლივ დასაწყებია პროცედურები, რომ კომპანიამ მომართოს ადგილობრივ ხელისუფლებას. მე ვიცი მერის დამოკიდებულებაც, რომ სურს დაეხმაროს ამ კომპანიას, არ გაჩერდეს ბიზნესი, რადგან თქვენ აკეთებთ საქმეს. შემდეგ ჩვენ მივმართავთ ადგილობრივ წარმომადგენლებს, დეპუტატს და აქედან წამოვა ხელმოწერილი დოკუმენტი, თუ რატომ არ სურს მოსახლეობას აქ კარიერის წარმოების განახლება. ასევეწიაღის ეროვნულ სააგენტოში გაიგზავნება წერილი, თუ რა მიზეზებს ასახელებს ლიხაურის მოსახლეობა კარიერის წინაარმდეგ, _ თქვა მან.
თემურ ჭანუყვაძემ ლიხაურის მოსახლეობის წარმომადგენელთა წინაშე ასევე თქვა, რომ წიაღის ეროვნულ სააგენტოს უნდა მოემართა მუნიციპალიტეტის ხელმძღვანელობისთვის და გაერკვია, იყო თუ არა ხალხი, ადგილობრივი მოსახლეობა თანახმა, აქ გახსნილიყო კარიერი და დაეწყოთ ინერტული მასალის მოპოვება, თუმცა მსგავსი მომართვის ვერაფერი ნახეს.
მან ასევე განმარტა, რომ კომპანია არაფერ შუაშია, ის აუქციონის წესით იღებს ლიცენზიას და მის წარმომადგენლებს მოუწოდა, დროულად დაიწყონ პროცედურა, რათა ასევე დროულად მოხდეს ადგილმონაცვლეობა.
ემოციური კრების ფინალი შედარებით მშვიდი იყო, თუმცა ლიხაურელებმა კიდე ერთხელ დაუბარეს კომპანიის წარმომადგენელს, რომ ვინმემ აჭისწყლის ხეობაში შესვლა და ჩუჩქნა არ გაბედოს, თორემ მეტ წინააღმდეგობას და ბოიკოტს ელოდნენ, რაც აქამდე ყოფილაო და თქვს ისიც, რომ კიდევ ორი კომპანიის წინააღმდეგ, რომლებსაც ლიცენზია აქვთ, აპირებენ სასამართლოში სარჩელის შეტანას.
