პოლიტიკის ექსპერტმა მამუკა არეშიძემ ,,გურია ნიუსთან“ ,,ქართულ ოცნებაში“ დაპირისპირების შესახებ ისაუბრა. მისი თქმით, მმართველი გუნდის ზოგიერთი დეპუტატი დაპირისპირების ნიადაგზე პოლიტიკური ქულების დაწერას ცდილობს. ამასთან, არეშიძე ჩვენთან საუბრისას აღნიშნავს, რომ პარლამენტის თავმჯდომარის პოზიციიდან გამომდინარე, მმართველ გუნდში განხეთქილება გარდაუვალია.
,,ნებისმიერი ტიპის განხეთქილება მაძლევს ეჭვის საფუძველს, რომ ეს ნაბიჯები გარკვეული პოლიტიკური ქულების დაწერისთვის არის გადადგმული. ჭიჭინაძის ნათქვამს ვერანაირად მოვიწონებ, არ იმსახურებს გია ვოლსკი ასეთი ტიპის განცხადებას. იმ საპროტესტო გუნდს, რომელიც ,,ქართულ ოცნებაშია“ ერთ რამეში ცალსახად ვუჭერ მხარს, ადამიანებმა, რომლებიც 2012 წლის დროს სხვა პარტიაში იყვნენ ან საერთოდ არ ჩანდნენ, დღეს მოინდომეს მთელი ძალაუფლების საკუთარ თავზე აღება. მახსენდება 90-იანი წლების პერიოდი, ამ დროს იგივე ხდებოდა საქართველოს პარლამენტში, მაშინ ზურაბ ჟვანია მაქსიმალურად შეეცადა სიტუაცია დაერეგულირებინა და ეს მოახერხა კიდეც. ირაკლი კობახიძემ კი ამის გაკეთება არ მოინდომა, რაც ძალიან ცუდია. როცა პარლამენტის თავმჯდომარეს ისეთი პოზიცია უჭირავს, განხეთქილება გარდაუვალია. ბიძინა ივანიშვილი უნდა ჩაერთოს ამ პროცესებში, რათა ცეცხლი დროებით მაინც ჩაქრეს. ბევრია დამოკიდებული პარლამენტის ხელმძღვანელობაზე, მათ არავითარ შემთხვევაში არ უნდა დაუშვან განხეთქილება. არ შეიძლებოდა ისეთი ხალხის შეყვანა პარლამენტში, რომლებიც სხვა პარტიიდან იყვნენ პორტირებულნი. ასეთმა არასწორმა მუშაობამ, საბოლოო ჯამში, არასახარბიელო შედეგი მოიტანა“, _ განაცხადა არეშიძემ.
