საქართველოს პარლამენტი მუნიციპალიტეტის ორგანოთა საერთო არჩევნებისათვის პარტიული სიის შედგენის წესში ცვლილებას გეგმავს.
“2028 წლამდე ჩასატარებელი მუნიციპალიტეტის ორგანოთა საერთო არჩევნებისათვის პარტიული სიის შედგენის წესს განსაზღვრავს პოლიტიკური პარტია, იმგვარად, რომ წარდგენილ სიაში ყოველი სამი კანდიდატიდან ერთი უნდა იყოს განსხვავებული სქესის წარმომადგენელი.
აღნიშნული ცვლილება საარჩევნო კოდექსში შესატანი ცვლილებების შესახებ კანონპროექტში შევა, რომელიც იურიდიულ საკითხთა კომიტეტის სხდომაზე მეორე მოსმენით იქნა განხილული.
როგორც კანონპროექტის ერთ-ერთმა ინიციატორმა და მომხსენებელმა, განათლებისა და მეცნიერების კომიტეტის თავმჯდომარემ, შალვა პაპუაშვილმა განაცხადა, ამ ცვლილებით მუნიციპალიტეტის ორგანოთა საერთო არჩევნებისთვის იგივე სტანდარტის დაწესდება. რაც საპარლამენტო არჩევნებისთვისაა გათვალისწინებული.
კანონის მოქმედი რედაქციით, პოლიტიკურმა პარტიამ პარტიული სია იმგვარად უნდა შეადგინოს, რომ წარდგენილ სიაში ყოველი ორი კანდიდატიდან ერთი განსხვავებული სქესის წარმომადგენელი უნდა იყოს.“ – აღნიშნულია საქართველოს პარლამენტის ვებ-გვერდზე.
“ჩვენ შევიკრიბეთ იმიტომ, რომ დავაფიქსიროთ სრული მიუღებლობა იმ ცვლილებების მიმართ, რომლის გატანასაც აპირებს მმართველი ძალა „საარჩევნო კოდექსში“. ეს არის უპრეცედენტო მაგალითი პარლამენტარიზმის ისტორიაში, როცა ჯერ არ ამოქმედებულ ნორმას აუქმებენ.“ – აღნიშნა დღეს პარლამენტის შენობაში გამართულ ბრიფინგზე “ლელოს“ წარმომადგენელმა და პარლამენტარმა ანა ნაცვლიშვილმა.
ბრიფინგს პოლიტიკოსებთან ერთად არასამთავრობო სექტორის წარმომადგენლები ესწრებოდნენ.
“ეს ეხება ქალთა კვოტირებას ადგილობრივი თვითმმართველობის არჩევნებში. თვითმმართველობის არჩევნებზე ყველა პარტია ვალდებული იყო, ყოველი მეორე ყოფილიყო განსხვავებული სქესის. ამ დიდი ბრძოლის შედეგს ერთი ხელის მოსმით უპირებს გაუქმებას „ქართული ოცნება“ და როდის გააკეთა ეს, საკომიტეტო მოსმენაზე, რომელიც შუადღის ოთხი საათიდან დილის 4 საათზე მიმდინარეობდა.
როცა უკვე შეუძლებელი იყო ამ პროცესში ჩართულობა, მე პარლამენტი დავტოვე იმ დღეს დილის სამის ნახევარზე. იმ დროს, როცა ეს საკითხი დაისვა უმრავლესობის წევრის მხრიდან, დარბაზში არ იჯდა არც ერთი ქალი და ეს არის ყველაზე ნათელი მაგალითი იმისა, რომ ქალთა ჩართულობის გარეშე, დილის 4-ის ნახევარზე რამდენიმე მამაკაცმა გადაწყვიტა, ასე ერთი ხელის მოსმით წაგვართვას თანასწორობის უფლება.
ეს საკითხი არ დადის მათემატიკამდე. ეს არის ღირებულებების საკითხი, ჩვენ ამას არ შევეგუებით,” _ თქვა ანა ნაცვლიშვილმა.
აღნიშნულ საკითხთან დაკავშირებით “უფლებები საქართველო“-მ სოციალურ ქსელში განცხადება გაავრცელა.
“მოვუწოდებთ პარლამენტს, გენდერული კვოტირების მოქმედი სტანდარტის გაუარესებას არ დაუჭიროს მხარი
როგორც ცნობილი გახდა 2021 წლის 21 ივნისს, გვიან ღამით საქართველოს პარლამენტის იურიდიულმა კომიტეტმა მეორე მოსმენით საარჩევნო კოდექსის ცვლილებების განხილვისას, შეიმუშავა ცვლილება, რომელიც აშკარად და დაუსაბუთებლად აუარესებს მუნიციპალიტეტის ორგანოთა საერთო არჩევნებისათვის პარტიული სიის შედგენისას გენდერული კვოტირების არსებულ სტანდარტს.
საარჩევნო კოდექსის მოქმედი რედაქციით, პოლიტიკური პარტია ვალდებულია მუნიციპალიტეტის ორგანოთა საერთო არჩევნებისათვის წარსადგენ პარტიულ სიაში უზრუნველყოს გენდერული კვოტირება იმგვარად, რომ ყოველი ორი კანდიდატიდან ერთი განსხვავებული სქესის წარმომადგენელი იყოს.
იურიდიულმა კომიტეტმა საარჩევნო კოდექსის ცვლილებების მეორე მოსმენით განხილვისას, მუნიციპალიტეტის ორგანოთა საერთო არჩევნებისათვის პარტიული სიის შედგენის წესის ცვლილებას დაუჭირა მხარი, რომლის თანახმადაც, პარტიულ სიაში წარდგენილი არა ორი, არამედ სამი კანდიდატიდან ერთი უნდა იყოს განსხვავებული სქესის წარმომადგენელი.
„უფლებები საქართველო“ მიიჩნევს, რომ ინიცირებული ცვლილება დაუსაბუთებელია და ვერ პასუხობს პოლიტიკურ და საზოგადოებრივ ცხოვრებაში ქალთა ჩართულობის მხრივ არსებულ მწვავე გამოწვევებს.
ქალთა პოლიტიკური მონაწილეობის გაზრდისა და სავალდებულო გენდერული კვოტირების შემოღებისათვის ქალთა უფლებების დაცვაზე მომუშავე არასამთავრობო და საერთაშორისო ორგანიზაციებმა მრავალი წლის განმავლობაში ძალიან დიდი შრომა გასწიეს.
საქართველოს პარლამენტში რამდენჯერმე მოხდა საკანონმდებლო ინიციატივის და წინადადების წარდგენა, მათ შორის, სავალდებულო გენდერული კვოტირების მოთხოვნით საქართველოს 32 000-ზე მეტი მოქალაქის ხელმოწერით პარლამენტში ორჯერ დარეგისტრირდა საკანონმდებლო ინიციატივა, თუმცა ორივე მცდელობა უშედეგოდ დასრულდა.
2020 წელს საარჩევნო კოდექსში მიღებული ცვლილებები მნიშვნელოვანი წინგადადგმული ნაბიჯი იყო ადგილობრივ დონეზე ქალთა პოლიტიკური მონაწილეობის გაზრდისათვის, თუმცა ერთი წლის შემდეგ პარლამენტმა და პოლიტიკურმა პარტიებმა გადაწყვიტეს, შეცვალონ არსებული რეგულირება ნორმით დაცული პრინციპების საუარესოდ, რაც ეწინააღმდეგება საზოგადოების ინტერესებს და მნიშვნელოვან ზიანს აყენებს ქვეყნის საერთაშორისო რეპუტაციას და დემოკრატიულ განვითარებას.
ყოველივე ზემოთ აღნიშნულის გათვალისწინებით, „უფლებების საქართველო“ მოუწოდებს საქართველოს პარლამენტს მხარი არ დაუჭიროს იურიდიული კომიტეტის მიერ შემოთავაზებულ ცვლილებას.“ – აღნიშნულია განცხადებაში.
ავტორი: გიორგი გირკელიძე
