გუშინ, იტალიურ მედიასთან, „იუვენტუსის“ ყოფილმა მოთამაშე ფედერიკო ბერნარდესკიმ ისაუბრა და „ნაპოლის“ ბოლოდროინდელ წარმატებებში ხვიჩა კვარაცხელიას როლი განსაკუთრებით გამოყო.
„ნაპოლი“ მშვენივრად ასპარეზობს. მჯერა, რომ ლუჩანო სპალეტის ბიჭებს ჩემპიონთა ლიგის მოგებაც შეუძლიათ. მათ წინააღმდეგ თამაში მეტოქეებს წინასწარ ეშინიათ, ფიქრობენ, რომ მაინც დამარცხდებიან.
ამ „ნაპოლიდან“ ყველაზე მეტად კვარამ გამაოცა, არა მხოლოდ ასპარეზობით, არამედ ყველა თამაშზე ზემოქმედებისა და გავლენის მოხდენით. ყოველთვის 110%-ით იხარჯება. კვარაცხელია ევროპაში ერთ-ერთი საუკეთესო ტალანტია. ის შთამბეჭდავია, ვინც ფეხბურთს თამაშობს, ესმის, რომ ეს ბიჭი ფენომენია, მხოლოდ დიდი ჩემპიონებისთვის დამახასიათებელი მიდგომა აქვს“, – განაცხადა ფედერიკო ბერნარდესკიმ.
გუშინ, ხვიჩა კვარაცხელიას თემას შეეხო იტალიელი ჟურნალისტი და ტელეკომპანია „Rai“-ის საფეხბურთო ექსპერტი ჩირო ვენერატო.
„ქართველი რჩება „ნაპოლიში“ და სეზონის ბოლოს მისი კლასის შესაბამისი კონტრაქტი უნდა გაუფორმონ. არსებობს ბიჭის და მისი გარემოცვის სურვილი, რომ „ნაპოლიში“ თამაში გააგრძელოს“, – განაცხადა ჩირო ვენერატომ.
ხვიჩა კვარაცხელიას „ნაპოლიში“ ხელშეკრულება 2027 წლამდე აკავშირებს და სეზონში მისი ხელფასი 1.2 მილიონი ევროა.
საქართველოს ნაკრების მცველის, ლუკა ლოჩოშვილის „კრემონეზემ“ იტალიის თასის მეოთხედფინალურ დაპირისპირებაში, სტუმრად ჟოზე მოურინიოს „რომა“ დაამარცხა და ნახევარფინალში გავიდა. მატჩის შემდეგ მოურინიომ მეტოქეს გამარჯვება მიულოცა:
„ვულოცავ „კრემონეზეს“, რომელმაც ორი დიდი გამარჯვება მოიპოვა „ნაპოლისა“ და ჩვენს წინააღმდეგ. თუ გავითვალისწინებთ, რომ ისინი შარშან „სერია B“-ში თამაშობდნენ, ეს შედეგი კიდევ უფრო დასაფასებელია. საშინელი პირველი ტაიმი ვითამაშეთ, ძალიან დაბალ დონეზე, მეორე ნახევარში კი კონტექსტიდან ამოგლეჯილი შეცდომით დავისაჯეთ. თუმცა, ჩემი გუნდისგან კარგი რეაქცია დავინახე.
ჩვენი შემადგენლობის გათვალისწინებით როტაცია ძნელია. ამიტომ კვირაში 3 თამაშის ჩატარება ერთნაირი შემადგენლობით გვიწევს. „რომას“ შემადგენლობა ყოველ სამ დღეში ერთხელ თამაშზე ადაპტირებული არ არის. „ნაპოლისთან“ წაგებას არ ვიმსახურებდით, შესანიშნავად ვითამაშეთ და მიუხედავად მარცხისა, ამაყი ვიყავი, რასაც ამჯერად ვერ ვიტყვი. თუმცა, ვისწავლე, რომ წაგების გამო არ უნდა ვიტირო, არამედ მომდევნო მატჩზე ვიფიქრო“. – განაცხადა ჟოზე მოურინიომ.
იტალიური მასმედიის მტკიცებით, დაუდგენელმა პირებმა იტალიის ნაკრების ყოფილ მეკარეს, დინო ძოფს, ხელთათმანები მოპარეს, რომლებითაც მან 1982 წლის მსოფლიო ჩემპიონატზე ითამაშა.
ხელთათმანები რომში, საქველმოქმედო საღამოზე გახლდათ გამოფენილი, რომელიც იტალიის ნაკრების 100 წლის იუბილეს ეძღვნებოდა.
ძოფი 40 წლის ასაკში 1982 წელს ესპანეთში გამართულ მსოფლიო ჩემპიონატზე ეროვნული ნაკრების კაპიტანი გახლდათ. მაშინ ფინალურ მატჩში იტალიამ დასავლეთ გერმანიას 3:1 მოუგო და ისტორიაში მესამედ მოიპოვა მსოფლიოს უძლიერესი გუნდის სახელი.
გუშინ, იტალიურმა გამოცემამ „La Repubblica“ გაავრცელა ცნობა, რომ „იუვენტუსისა“ და „ნაპოლის“ ყოფილი თავდამსხმელი, მიკელე პადოვანო, რომელიც ნარკოვაჭრობის ბრალდებით იხდიდა სასჯელს, გაამართლეს.
56 წლის ყოფილი ფეხბურთელი ჰაშიშით ვაჭრობაში დაადანაშულეს და 2006 წელს დააკავეს. პროკურატურას 24 წლით თავისუფლების აღკვეთა სურდა, თუმცა შემდეგ ვადა 6 წლამდე და 8 თვემდე შეუმცირდა. შარშან პადოვანომ საკასაციო სასამართლოში გაიმარჯვა, ახლა კი მეორე სააპელაციო სასამართლომ გაამართლა.
გუშინ, ცნობილი გახდა რომ ხორვატიის ეროვნული გუნდის ნახევარმცველ ლუკა მოდრიჩს ესპანეთის დედაქალაქში დარჩენა კიდევ ერთი სეზონის განმავლობაში სურს. მან საუდის არაბეთის „ალ-ნასრისა“ და ამერიკული „MLS“-ის კლუბების შეთავაზებები კიდევ ერთხელ უარყო.
საინტერესოა, რომ პირველად მოდრიჩმა „ალ-ნასრს“ შეუთვალა უარი, სადაც მისი ყოფილი მადრიდელი თანაგუნდელი, კრიშტიანუ რონალდუ ასპარეზობს.
გუშინ, ცნობილი გახდა რომ მიუნხენის „ბაიერნის“ სენეგალელმა ნახევარმცველმა სადიო მანემ ბურთით ვარჯიში უკვე დაიწყო.
სადიო მანემ ტრავმა გასული წლის ნოემბრის დასაწყისში „ვერდერთან“ მატჩში მიიღო და მას შემდეგ, თითქმის სამი თვე გავიდა. მანემ დაზიანების გამო კატარში ჩატარებული მსოფლიოს ჩემპიონატიც გამოტოვა.
ჯერჯერობით უცნობია, შეძლებს თუ არა მანე 15 თებერვალს, ჩემპიონთა ლიგის მერვედფინალში, „პარი სენ ჟერმენის“ წინააღმდეგ მინდორზე გასვლას, თუმცა გერმანელებს იმედები გაუჩნდათ. იმის ფონზე, რომ „ბაიერნს“ ლუკა ერნანდესი და მანუელ ნოიერი სეზონის ბოლომდე გამოაკლდათ, სენეგალელის გუნდში დაბრუნება გერმანული კლუბისთვის განსაკუთრებით დადებითი სიახლე იქნება.
ავტორი
