“ეს ბოდვები შეუძლიათ, ბიძინა ივანიშვილს ძილის წინ მოუყვნენ”, – ასე ეხმაურება “ნაციონალური მოძრაობის” წევრი ლევან ხაბეიშვილი, “ხელისუფლების დამხობის გეგმის” შესახებ სახელმწიფო უსაფრთხოების სამსახურში გამართულ საგანგებო ბრიფინგს.
როგორც ხაბეიშვილმა აღნიშნა, ხელისუფლება შეშინებულია და ყოველგვარი მტკიცებულებების გარეშე “ჭორებს ავრცელებს”.
“მათ ძალიან ეშინიათ. ცდილობენ, თითქოსდა ადამიანები დაზაფრონ, რომ იქ თურმე ვინმე რაღაცას აპირებს. მათ ცხადია, ანერვიულებთ ყველა ის აქცია, რომელსაც მართავს ოპოზიცია, იმიტომ, რომ ეს არის მძლავრი აქციები, რომელიც იზრდება. შესაბამისად, სხვა არაფერი დარჩენიათ გადა იმისა, რომ რაღაც ჭორები მოყვნენ, რასაც მტკიცებულებები არ მოყვება.
ძალიან მარტივად უნდა გაიგოს საზოგადოებამ როცა ადამიანის მკვლელობა იგეგმება, ვიღაც გეგმას და ამ ვიღაცას რომ არ ასახელებს სახელმწიფო უსაფრთხოების სამსახური, ნიშნავს, რომ არსებობს. რომ არსებობდეს, აუცილებლად დღესვე მოგვიყვებოდნენ, ხომ არ დაელოდებიან ადამიანის ტრაგიკულ შემთხვევას. შესაბამისად ეს ბოდვები შეუძლიათ, ბიძინა ივანიშვილს ძილის წინ მოუყვნენ”, – თქვა ლევან ხაბეიშვილმა.
ცნობისთვის, სახელმწიფო უსაფრთხოების სამსახურში “ხელისუფლების დამხობის გეგმის” შესახებ მორიგი ბრიფინგი გამართეს. უწყებაში განაცხადეს, რომ მიხეილ სააკაშვილის მხარდამჭერი აქციის ორგანიზატორები სახელმწიფო დაწესებულებების ბლოკირებას გეგმავენ.
მათივე თქმით, ამის მიზანი “ხელისუფლების ძალადობრივი გზით დამხობაა” და შესაბამის დავალებებს ციხიდან საქართველოს მესამე პრეზიდენტი “გასცემს”. სუს-ის მტკიცებით, “განიხილება ერთ-ერთი ოპოზიციური ლიდერის ლიკვიდაციაც”.
