„ეს ჩვენი მეფე ერეკლე“, კავკასიის საერთაშორისო უნივერსიტეტის საგანმანათლებლო კონკურსი დასრულდა. ჟიურიმ გამარჯვებულები უკვე გამოავლინა. 6 და 7 მარტს კონკურსის ფინალური ეტაპი დისტანციურ რეჟიმში გაიმართა.
პროექტში, რომელიც CIU-ს საზოგადოებასთან ურთიერთობის სამსახურის ორგანიზებით გაიმართა, მონაწილეობას საქართველოს კერძო და საჯარო სკოლების დამამთავრებელი კლასების მოსწავლეები იღებდნენ.
კონკურსი სამ სექციაში ჩატარდა – საუკეთესო ნაშრომები გამოვლინდნენ ჟურნალისტიკის, ტურიზმისა და ესსეისტიკის მიმართულებებში.
ჟურნალისტიკის სექციაში მოსწავლეებს მეფე ერეკლეს ცხოვრებისა და მოღვაწეობის შესახებ უნდა მოემზადებინათ სიუჟეტები, საიდანაც ჟიურიმ საუკეთესო ნაშრომები შეარჩია.
სექცია კავკასიის საერთაშორისო უნივერსიტეტის რექტორმა, კახაბერ კორძაიამ გახსნა, რომელმაც კონკურსის მნიშვნელობაზე ისაუბრა და თითოულ მონაწილეს წარმატებები უსურვა.
32 ნაშრომს შორის პირველი ადგილი დაბა სურამის #3 საჯარო სკოლის მოსწავლეებმა, ეკატერინე ლაცაბიძემ და ლიკა ბლიაძემ დაიკავეს, მეორე ადგილი ჩხოროწყუს რაიონის, სოფელ ახუთის #1 საჯარო სკოლის მოსწავლე, ნინი კოღოშვილს ერგო, ხოლო მესამე ადგილზე ნინო ხიდაშელი, თბილისის #191-ე საჯარო სკოლის მოსწავლე გავიდა. ჟიურიმ ასევე სიმპათიებიც გამოავლინა: ანა ზექალაშვილი, გვანცა მჭედლიძე და ქეთევან კაკიაშვილი ქარელის #2 საჯარო სკოლიდან, მარი ბობოხიძე ხონის #1 საჯარო სკოლიდან და ხატია ციხელაშვილი ყვარლის #2 საჯარო სკოლიდან.
ჟურნალისტიკის სექციის ჟიურის წარმოადგენდნენ: კსუ-ს ასოცირებული პროფესორი და მულტიმედია ცენტრის პროდიუსერი რუსუდან კვარაცხელია; კსუ-ს ასოცირებული პროფესორი და მულტიმედია ცენტრის ხელმძღვანელის მოადგილე, სულხან მელაძე; კსუ-ს ჟურნალისტიკის საბაკალავრო პროგრამის ხელმძღვანელი და მედიის კვლევებისა და მულტიმედია წარმოების სამაგისტრო პროგრამის ხელმძღვანელი, ზაზა ცოტნიაშვილი.
ტურიზმის სექციის მონაწილეებს მათ მიერ შერჩეულ ადგილზე უნდა დაეგეგმათ ვირტუალური ექსკურსია. ადგილის ისტორია უნდა დაკავშირებოდა მეფე ერეკლეს. ფინალურ ეტაპზე გადასულ 8 ნაშრომს შორის ადგილები შემდეგნაირად გადანაწილდა:
1 ადგილი – დონარა ანტანოსიან (ნინოწმინდა, ეშტიის N1 საჯარო სკოლა);
2 ადგილი – ქეთი შავაძე; სალომე ჯორბენაძე; ქრისტინა დეკანაძე (ხულო, ქედლების საჯარო სკოლა);
3 ადგილი – მარიამი მჭედლიძე (ლაგოდეხი, ვარდისუბნის საჯარო სკოლა).
ჟიურის შემადგენლობა: ირმა ბარათაშვილი, კავკასიის საერთაშორისო უნივერსიტეტის ბიზნესის ფაკულტეტის დეკანი, ასოცირებული პროფესორი, ბიზნესის ადმინისტრირების დოქტორი; ლალი მიქელაძე, კავკასიის საერთაშორისო უნივერსიტეტის ტურიზმის საბაკალავრო პროგრამის ხელმძღვანელი, ასოცირებული პროფესორი, ბიზნესის ადმინისტრირების დოქტორი; ეკა დევიძე, ტურისტული კომპანია „საბას“ დირექტორი, პროფესორი.
რაც შეეხება ესსეისტიკის სექციას, ამ ნაწილში კონკურსანტებს ესსეების დაწერა ისეთ მნიშვნელოვან თემებზე ევალებოდათ, როგორიცაა: ნიკოლოზ ბარათაშვილის „ბედი ქართლისა“ და ერეკლე II-ის ცხოვრება და მოღვაწობა; ერეკლე II – დიდი მხედართმთავარი; ერეკლე II და ევროპული განათლება.
ფინალურ ეტაპზე 15 ნაშრომი გავიდა. მათ შორის კი ადგილები შემდეგნაირად გადანაწილდა:
1 ადგილი – თამარ აბდუშელიშვილი (ჭიათურა, N2 საჯარო სკოლა);
2 ადგილი – ლიზი თხილაიშვილი (ქობულეთი, საერო სკოლა „ფარნავაზი“);
3 ადგილი – ლაშა აბულაძე (ქუთაისი, კადეტთა სამხედრო ლიცეუმი).
ჟიურის შემადგენლობა: ანა გოგილაშვილი, ფილოლოგიის დოქტორი, კავკასიის საერთაშორისო უნივერსიტეტის სადოქტორო პროგრამების კოორდინატორი; გიორგი ფარეშიშვილი – კავკასიის საერთაშორისო უნივერსიტეტის დოქტორანტი; მადლენ პაპოშვილი – კავკასიის საერთაშორისო უნივერსიტეტის დოქტორანტი.
საპრიზო ადგილზე გასული მონაწილეები და ჟიურის სიმპათიები კავკასიის საერთაშორისო უნივერსიტეტისგან ფასიანი საჩუქრებით და სასწავლო ვაუჩერებით დაჯილდოვდნენ, პროექტის ყველა მონაწილეს კი სერტიფიკატები გადაეცა.(R)
