ოზურგეთის მუნიციპალიტეტის სოფელ ჭალა-ბოხვაურის მცხოვრებლები ახალი გზის დაგებას ითხოვენ.
ადგილობრივი მალხაზ ბუწურაძე “გურია ნიუსთან” ამბობს, რომ სოფლის მცხოვრებლების ძირითადი მოთხოვნა გზის დაგება და სანიაღვრე არხების მოწესრიგებაა:
“ყველგან კეთდება რაღაც პროექტები და ჭალა-ბოხვაურმა რა დააშავა?! ეს გზა თუ გაკეთდა, შემდეგ დალაგდება ყველაფერი და კიდევ გამოჩნდება რამე. ყველა გაწვიმებაზე საშინელება ხდება და თუ ვინმე მოგვხედავს, კარგი იქნება”, _ გვითხრა მალხაზ ბუწურაძემ.
მისივე თქმით, წელს ფაროსანამ მოსახლეობა თხილის გარეშე დატოვა.
“მე, პირადად, სიმინდის მოსავლის უკმაყოფილო არ ვარ. ცოტა კი დამაგვიანდა შეწამვლა, მაგრამ არ იყო ცუდი მოსავალი.
გვინდა, რაც შეიძლება მეტი ინფორმაცია მოგვაწოდონ თხილზე, სიმინდზე _ როდის უნდა დავიწყოთ მათი მოვლა, რომ მომავალ წელს კიდევ ასეთ დღეში არ ჩავვარდეთ. ძალიან მძიმე სიტუაციაა და როგორ გადაიტანს ხალხი წლევანდელ წელს, არ ვიცი”.
არჩილ დუმბაძე თბილისიდან სოფელში წლების წინ ჩამოვიდა და ახლა საოჯახო სასტუმროს გახსნას აპირებს. მისი თქმით, თუ სოფლის განვითარება ნამდვილად სურს დღევანდელ ხელისუფლებას, მაშინ სოფელში გზის პრობლემა აუცილებლად უნდა გადაიჭრას:
“მთავარი გადასაწყვეტი პრობლემა უგზოობაა. რაც უნდა შევქმნა მე ჩემს კერძო საკუთრებაში, არაფერი გამოვა, რადგან უგზოობა ბევრ პრობლემას ქმნის. მაგალითად, შესაძლებელია ჩვენს სოფელში საოჯახო სასტუმროების გახსნა, მაგრამ ვინ ამოვა აქ, თუ გზა არ იქნება გაკეთებული? ქალაქ ოზურგეთიდან ჩვენს სოფლამდე არის, დაახლოებით, 5-6 კილომეტრი, მაგრამ რად გინდათ _ დიდი ხანი გვჭირდება, დანიშნულ ადგილამდე რომ მივიდეთ. ტაქსიც იმაზე მეტს ითხოვს, რაც არის დაწესებული. არადა, ტურიზმის განვითარება ყველაზე მნიშვნელოვანია ჩვენთვის, რომ სოფელმა სიცოცხლე დაიბრუნოს. ასევე, კარგი იქნება ყოფილ ეკლესიას მიხედონ და გაკეთდეს”.
გელა ჩავლეშვილი: “არა ერთხელ დამიყენებია ეს პრობლემა ადგილობრივი ხელისუფლების წინაშე. თვითმმართველობის არჩევნებზე დაგვპირდნენ, რომ ჭალა-ბოხვაურის გზის სარეაბილიტაციო სამუშაოები დაიწყებოდა, მაგრამ ვერ მოხერხდა. ეს პრობლემა ახალი არ არის _ რამდენიმე ათეული წელია სოფელში ახალი გზა არ დაგებულა”.
ზურაბ გობრონიძე: “დაახლოებით, 50 წელია ნორმალურად არ გაკეთებულა სოფლის გზა. ღამით ფეხითაც ვერ გაივლი, ისეთი მდგომარეობაა. თუ ყურადღებას არ მოგვაქცევენ, არ არის გამორიცხული, რომ აქციები მოვაწყოთ. მე, პირადად, პეტიცია უნდა შევიტანო ოზურგეთის მუნიციპალიტეტის მერიაში. ეს გზა აერთებს ხუთ სოფელს და აქედან, მხოლოდ ჩვენი სოფლის გზა არ არის გაკეთებული. ადრე დიდებული ბიბლიოთეკა იყო, მაგრამ ახლა დაკეტილია. არაჩვეულებრივი ადამიანი მირცა ჩხარტიშვილი ხელმძღვანელობდა. ის გარდაიცვალა და დარჩა ბიბლიოთეკა უპატრონოდ”.
სოფელში არსებულ ნაეკლესიარს და სამრეკლოს კულტურული ძეგლის სტატუსი აქვს.
როგორც საკრებულოს წევრი გელა ჩავლეშვილი ამბობს, ოზურგეთის მუნიციპალიტეტის მერიას თხოვა, გეოლოგებს შეესწავლათ ნაეკლესიარის ტერიტორია:
“სპეციალისტები ჩამოვიდნენ თბილისიდან და შეისწავლეს ნაეკლესიარის ტერიტორია. როგორც გავიგე, დადებითი პასუხი არის მოსული და შესაძლებელია დაიწყოს ეკლესიის რეაბილიტაცია”.
ვრცელდება ინფორმაცია, რომ სარეაბილიტაციო სამუშაოები შესაძლებელია ფონდმა “ქართუმ” ჩაატაროს, თუმცა, გელა ჩავლეშვილის თქმით, დანამდვილებით ვერაფერს იტყვის, სანამ ეს ინფორმაცია ოფიციალურად არ დადასტურდება.
რაც შეეხება გზის რეაბილიტაციას, ოზურგეთის მუნიციპალიტეტის მერის წარმომადგენელი სოფელ ბოხვაურში თეიმურაზ ჩავლეშვილი ამბობს, რომ ადგილობრივ ხელისუფლებაში მიმდინარეობს 2019 წლის პრიორიტეტების დაგეგმვა:
“ამ ეტაპზე მიმდინარეობს პრიორიტეტების განსაზღვრა და ზუსტად ვერაფერს გეტყვით. ჩვენგან მიწოდებულია იმ პრობლემების ნუსხა, რომლის მოგვარება აუცილებელია. 80 ოჯახს აქვს უწყლობის პრობლემა, განსაკუთრებით, ზაფხულში. დიდი ხანია აწუხებს სოფლის მცხოვრებლებს უგზოობა. რამდენადაც ცნობილია, ამ პრობლემების გადაჭრა სამ ეტაპად არის დაგეგმილი და ვნახოთ, რას გადაწყვეტს ადგილობრივი ხელისუფლება”, _ თქვა თეიმურაზ ჩავლეშვილმა.
ოზურგეთის მუნიციპალიტეტის მერიის პრესსამსახურის უფროსის ეკატერინე მგელაძის თქმით, ჭალა-ბოხვაურის გზის კაპიტალური რეაბილიტაცია 2019 წელს იგეგმება, ასევე, მოწესრიგდება სანიაღვრე არხები.
