30 ივლისს, ოზურგეთის მუნიციპალიტეტის საკრებულოს რიგგარეშე სხდომაზე 2021 წლის ბიუჯეტში ცვლილების საკითხი განიხილეს.
საკრებულოს თავმჯდომარემ, დავით დარჩიამ სხდომის მონაწილეებს დღის წესრიგით გათვალისწინებული საკითხები გააცნო.
_ დღეს ბიუჯეტში ცვლილებები შეგვაქვს. ეს იქნება 2020 წლის 30 დეკემბრის დადგენილებაში ბოლო ცვლილება საკრებულოს ამ შემადგენლობის მიერ, რადგან ვიცით, რომ ოქტომბერში ადგილობრივი თვითმმართველობის არჩევნებია, _ თქვა დარჩიამ სხდომის გახსნისას.
ბიუჯეტში ცვლილების თაობაზე, საფინანსო სამსახურის უფროსმა გია მამაკაიშვილმა ისაუბრა.
_ დღემდე ბიუჯეტი იყო 25 მილიონ 104 ათასი ლარი. ახლანდელი ცვლილებით გაიზარდა 13 მილიონ 393 ათასი ლარით და შეადგინა 38 მილიონ 497 ათასი ლარი. მნიშვნელოვანია, გითხრათ, რატომ იზრდება 13 მილიონი ლარით და რატომ არის ამდენი ნაშთი, _ თქვა მამაკაიშვილმა და დააკონკრეტა აღნიშნული 13 მილიონიდან, რა რაოდენობის თანხები რა მიმართულებებიდან დარჩა: _ 1 მლნ 832 ათასი ლარი _ ეს არის გადმომავალი ნაშთი; 215 648 ათასი ლარი არის საკუთარი ნაშთი, 16 017 არის მიზნობრივი ტრანსფერის ნაშთი, დანარჩენი თანხა კი შეადგენს საქართველოს მთავრობის სხვადასხვა განკარგულებებიდან წარმოშობილ ნაშთებს.
მამაკაიშვილმა, ასევე, პუნქტობრივად ჩამოთვლა, აღნიშნულ 13 მილიონ ლარში შემავალი თანხები _ ეს არის რეგიონებში გასახორციელებელი პროექტების ფონდიდან გამოყოფილი თანხები _ 8 179 947 ლარი; სოფლის მხარდაჭერის პროგრამით გამოყოფილი _ მილიონ 086 ათასი ლარი; საჯარო სკოლების დელეგირებისთვის (მცირე სარეაბილიტაციო სამუშაოები და მოსწავლეთა გადაყვანა) გამოყოფილი 493 680 ლარი; სტიქიის შედეგების სალიკვიდაციოდ გამოყოფილი იყო და ასახულია 1 500 000 ლარი, ფისკალური პროგნოზების შესაბამისად, ფინანსთა სამინისტროდან მიღებული თანხა _ 261 200 ლარი. საბავშვო ბაღების სამფაზიანი ელექტრომომარაგებით და ელექტროღუმელებით უზრუნველყოფისთვის 476 848 ლარის მობილიზება მოხდა და ელექტროენერგიის მოხმარების ხარჯი 102 ათასი ლარით გაიზარდა _ შპს “სატისს”, რომელიც ახდენს შიდა ქსელის და სოფლების წყალსადენი სისტემების რეაბილიტაციას, ასი ათასი ლარით გაუზარდეს სუბსიდირება. ანუ, ბიუჯეტი სულ, შემოსავლების და გადასახდელების ნაწილში,13 მილიონ 392 941,79 ლარით გაიზარდა.
კიდევ ერთი ცვლილება, ოღონდ მორიგ წესში, რომელიც წარმატებულთა დაჯილდოებას ეხებოდა, საკრებულოს დეპუტატმა, განათლების, კულტურის, სპორტის, ახალგაზრდულ საქმეთა, ჯანმრთელობისა და სოციალურ საკითხთა კომისიის თავმჯდომარემ ლელა საჯაიამ წარმოადგინა.
_ ჩვენი მუნიციპალიტეტის წარმომადგენელმა, კლუბ “ზვანელების” მოჭიდავემ, ლუკა ჯავახაძემ ბულგარეთში გამართულ ასპარეზობაზე მსოფლიო ჩემპიონის ტიტული მოიპოვა ჭაბუკთა შორის. ვფიქრობ, მხოლოდ ათასი ლარის გადახდა, როგორი წესიც აქამდე არსებობს, სამარცხვინოა. როგორც ვიცით, წარჩინებით კურსდამთავრებულ ახალგაზრდებს, ვინც ეროვნულ გამოცდებზე ასპროცენტიან გრანტს მოიპოვებს, სამი ათასი ლარით ვაჯილდოებთ. ამიტომ, გთხოვთ, დამიჭიროთ მხარი, რათა მსოფლიოს და ევროპის ჩემპიონებიც ამდენივე რაოდენობის თანხით დავაჯილდოვოთ. ღმერთმა ქნას, მაგრამ ბუნებრივია, ბევრი ასეთი ჩემპიონი არ გვეყოლება და როგორმე მოვახერხოთ, გამოვნახოთ ბიუჯეტში საამისო თანხა. ჯერ კი წესში შევიტანოთ ცვლილება, _ თქვა ლელა საჯაიამ.
ლელა საჯაიას მიერ, წარმატებული სპორტსმენების დაჯილდოების წესში ცვლილებების თაობაზე ინიციატივამ, კერძოდ, მსოფლიო ჩემპიონებისთვის გაიზარდოს დასაჯილდოებელი თანხა 3 000 ლარის ოდენობით, ხოლო ევროპის ჩემპიონობის შემთხვევაში 1 500 ლარის ოდენობით და მოიხსნას წესში გაწერილი ასაკობრივი სხვაობა, საკრებულოს წევრთა მოწონება დაიმსახურა. საჯაიამ, ასევე, მსოფლიო და ევროპის ჩემპიონის აღმზრდელი კლუბისთვის დასაჯილდოებელი თანხის ათასი ლარის ოდენობით დაწესება მოითხოვა.
საბოლოოდ, დარგობრივი კომისიის თავმჯდომარის ამ ინიციატივას საკრებულომ მხარი დაუჭირა.
აქვე აღნიშნეს, რომ ვინაიდან არ ესწრებოდა წესში ცვლილების შეტანა, დროის ფაქტორის გათვალისწინებით, ჩემპიონისთვის დასაჯილდოებელი თანხა, შესაძლებელია, სარეზერვო ფონდიდან გამოიყოს, ხოლო უახლოეს პერიოდში დაჯილდოების წესის პროექტს განიხილავენ და სამომავლოდ, არსებული წესის თანახმად დაჯილდოვდებიან ღირსეული სპორტსმენები და სტუდენტები.
ეკონომიკის სამსახურის უფროსმა, ალეკო მამეშვილმა ისაუბრა ქალაქ ოზურგეთში, რკინიგზის სადგურის მიმდებარე ტერიტორიის (დოლიძის და ბოლქვაძის ქუჩებზე), ასევე, კოსტავას ქუჩის რეაბილიტაციის პროექტის თაობაზე.
_ საქართველოს მთავრობის მიერ დამტკიცებული, 2020-2022 წლების საპილოტე რეგიონების ინტეგრირებული განვითარების პროგრამის საფუძველზე გამოცხადებული საგრანტო კონკურსის ფარგლებში, ოზურგეთში იგეგმება სადგურის მიმდებარედ არსებული დოლიძის და ბოლქვაძის, ასევე, კოსტავას ქუჩის რეაბილიტაცია. კოსტავას ქუჩის სიგრძე 1,7 კმ-ია. ეს არის ერთ-ერთი ძველი შემოსასვლელი ქუჩა ოზურგეთში. აღნიშნულ ქუჩაზე უკვე დასრულდა წყალმომარაგების და კანალიზაციის მშენებლობა. ამიტომ ახლა შექმნილია პირობა, რომ გაკეთდეს და სასურველია, ეს მალე გახორციელდეს. დაახლოებით, 6 000 000 ლარი მოხმარდება კოსტავას ქუჩას, მუნიციპალიტეტის თანამონაწილეობა კი 60 ათასი ლარი იქნება, ანუ მთლიანი ღირებულების ერთი პროცენტი, ხოლო დოლიძის და ბოლქვაძის ქუჩების რეაბილიტაციას 1 595 000. 00 ლარი მოხმარდება, _ თქვა მამეშვილმა და საკრებულოს მიმართა, ამ განკარგულებისთვის მხარი დაეჭირათ.
დეპუტატებმა კმაყოფილება გამოთქვეს, განსაკუთრებით, კოსტავას ქუჩის რეაბილიტაციის გამო, სადაც მუნიციპალიტეტის ადმინისტრაციული შენობა მდებარეობს და აღნიშნეს, რომ ეს ქუჩა, დიდი ხანია, სარეაბილიტაციოა.
საკრებულომ განკარგულების პროექტი ხმათა უმრავლესობით დაამტკიცა.
[sexy_author_bio]
