„ეს ხუშტურიანი წვიმა რას გვიპირებს?“: მდგომარეობა ოზურგეთში

ოზურგეთში წუხანდელი კოკისპირულ წვიმს შედეგად, როგორც ცნობილია, უამრავი მაღაზია და მარკეტი დაიტბორა.

ამ დროისთვის, დილის 12 საათზე , ხან წვიმს, ხან ჩერდება.  არაერთხელ ისმის ჭექა-ქუხილი, რაც ამ დროისთვის მახასიათებელია,როგორც წვიმის წინაპირობა.

ამინდის პროგნოზით, დღეს და ხვალაც წვიმა გაგრძელდება. ზეგიდან, 5 ოქტომბრიდან კი კარგ ამინდს პროგნოზირებენ.

ზარალი იმდენად დიდია, განსაკუთრებით სასურსათო, ტანსაცმლის თუ პარფიუმერიის მაღაზიებში, ასევე გარემოვაჭრეებთან და თხილის მიმღებ პუნქტებში, ხალხს, როგორც თავად ამბობენ, ამ ყველაფრის  წარმოდგენაც არ შეეძლოთ.

_ეჰ, ვინ  იცის რას გვიპირებს ეს ხუშტურიანი წვიმა. ამასწინანდელ სტიქიაზე არ ყოფილა კონკრეტულ ადგილზე ამხელა ზარალი.  ახლა, მთლად ნუ გადაწურავთ იმედს. კლიმატური ცვლილებები არის, თუმცა მახსოვს, ბაზრისწყალის წაღებული საზამთროები, პაპანაქება აგვისტოში, ბჟუჟში კოტრიალობდა და ვიჭერდით. ისეთი თავსხმა მოვიდა, მგონი, 1974 წელი იყო. 65 წლის კაცი ვარ, წყალდიდობის და ღვარცოფის მეტი რა მახსოვს, _ ამბობს „გურია ნიუსთან“ ოზურგეთელი გია კუტუბიძე.

_მახსოვს, თაყაიშვილის ქუჩის დასაწყისში,  (ადრე აბაშიძის ქუჩა იყო), ბაზრისწყალთან ხის ჯიხური  იდგა. მოგლიჯა ეს ჯიხური და სულ ცურვით წაიღო მაშინდელ აბაშიძის ქუჩაზე. ასევე მიაკოტრიალებდა    ბურახის და ლუდის პატარა კასრებს. ზოგს ჭიშკართან „დაუდგა“ სტიქიამ. არსენასავით, ზოგ უფრო მდიდარს წაართვა და ღარიბს მიუტანა. 1974 წელში იყო ეს ამბავი,  _ ხუმრობით იხსენებს  წარსულის  უხვნალექიან ზაფხულს ოზურგეთელი სერგო ბოიაჯანი.

ე.წ. ბაზრისწყალი, რომელიც წუხელ ძალიან ადიდდა, ძირითადად მაინც ბაზრის ტერიტორიაზე მდებარე მარკეტები დააზარალა, ასევე შევარდა ახლომდებარე ქუჩებზე განლაგებულ სახლებშიც. მეტ-ნაკლებად, ზარალი ბევრგან არის, დატბორილია სახლების პირველი სართული, თუმცა ძალიან დიდია ზარალი მაღაზიებსადა სასურსათო მარკეტებში.