თბილისის მერია ავტოპარკის გასაახლებლად 30 ცალ მსუბუქ, ჰიბრიდულ ავტომობილს შეიძენს, რომლის შესყიდვაზე ტენდერი უკვე გამოცხადდა. ტენდერის პირობების თანახმად, ავტომანქანა უნდა იყოს თეთრი ფერის, 2018 წელს გამოშვებული.
ბუნებრივია, ,,გურია ნიუსი“ დაინტერესდა, რით ხსნის თბილისის მერია 30 ცალი ახალი ავტომობილის შეძენას, ამის გასარკვევად შესაბამის სამსახურს მივმართეთ, თუმცა, კომენტარის გაკეთებაზე თბილისის მერიაში უარი გვითხრეს.
,,ამ საკითხზე გუშინ თბილისის მერმა გააკეთა კომენტარი და ამის მეტი კომენტარი აღარ გაკეთდება“, _ გვიპასუხეს მერიაში.
,,გურია ნიუსი“ საკითხთან დაკავშირებით თბილისის მერის კახა კალაძის კომენტარს გთავაზობთ.
,,ჩვენ ზედამხედველობის სამსახურის რეფორმა გვაქვს დაანონსებული და ამ რეფორმის ფარგლებში ვყიდულობთ დამატებით ავტომობილებს. უკვე დამთავრებულია ტენდერი და შეკვეთილი გვქონდა თეთრი ფერის ავტომობილები. ზოგადად შავი ფერის ავტომობილებზე უარის თქმა, რომელიც მთავრობამ მიიღო, რა თქმა უნდა, მისასალმებელია“,_ განაცხადა კალაძემ.
პოლიტოლოგი ვახტანგ ძაბირაძე მიიჩნევს, რომ სახელმწიფო ხალხს დასცინის. მისი თქმით, სახელმწიფო უწყებები ავტომობილების საკუთარი კომფორტისთვის და ჯიბეების გასქელებისთვის იძენენ, რაც, მისი განცხადებით, შეურაცხმყოფელია.
„ეს არის მოსახლეობის დაცინვა, როგორ შეიძლება სერიოზულად აღიქვა ასეთი გადაწყვეტილება. შეურაცხყოფაც აღარ არის, უარესია. ამ იდეის მომფიქრებელს სახელმწიფო სამსახურში არაფერი ესაქმება. სასაცილოდ აიგდეს მთელი ქვეყანა. რომელ ქვეყანაში ვცხოვრობთ? ერთადერთი ეს იმისთვის კეთდება, რომ ფული გააკეთონ, ბრიყვებად გვთვლიან, სხვა ახსნა ამ ფაქტს არ აქვს“, _ გვითხრა ძაბირაძემ.
ცნობისთვის, საქართველოს მთავრობის 2018 წლის 30 მარტის დადგენილების თანახმად, სახელმწიფო უწყებებს შავი ფერის ავტომობილების ყიდვა აეკრძალათ. შესაბამისი ქვეპუნქტი 2014 წლის 5 თებერვლის დადგენილების დანართის პრეამბულას დაემატა. მასში ნათქვამია: „შესასყიდი ყველა კლასის ავტომობილი შეიძლება იყოს ნებისმიერი ფერის, გარდა შავისა“.
