“ეშინიათ, სახლი თავზე არ დაგვემხოს” _ ჭანჭათელი ქალბატონის გასაჭირი

მძიმე პირობებში უწევს ცხოვრება ლანჩხუთის მუნიციპალიტეტში, სოფელ ჭანჭათში ვარდო პაქსაძესა და მის ოჯახს. სახლში, რომელშიც ქალბატონი ვარდო მეუღლესთან და შშმ შვილთან ერთად ცხოვრობს, ჭერი დაზიანებულია და წვიმისას სრულიად უსარგებლოა. მდგომარეობას ისიც ართულებს, რომ მიუხედავად სიდუხჭირისა, ოჯახს სოციალური შემწეობა არ აქვს.

“მქონდა და მომიხსნეს, აღარ გეკუთვნისო მითხრეს. ერთი ძროხა მყავს და ალბათ, ის ჩამითვალეს სიმდიდრედ, აბა, სხვა არაფერი არ გამაჩნია. ყველა ხედავს, სახლი თავზე რომ მენგრევა, შვილიც რა მდგომაროებაში მყავს. არადა, რომ გადახედავ თითქმის ყველა მესამე ოჯახს სოციალური აქვს დანიშნული, თუმცა, სამწუხაროდ, ისეთი ადამიანები ვრჩებით შემწეობის გარეშე, ვინც მართლა საჭიროებს და სასიცოცხლოდ მნიშვნელოვანია მისთვის. ესაა სამართალი?!” _ კითხვას სვამს ვარდო პაქსაძე.

იგი გვიყვება, რომ თანხა, რომელსაც სოციალური შემწეობის სახით იღებდა მისი ოჯახი, შშმ შვილის მკურნალობას ხმარდებოდა. ახლა კი რახან ფინანსური შესაძლებლობა აღარ აქვთ, ექიმითან მისვლასაც ვეღარ ახერხებენ.

“ერთი შვილი მყავს, რომელიც შშმ პირია. შემწეობის თანხით პერიოდულად ქუთაისში დამყავდა, სარეაბილიტაციო ვარჯიშებზე. ახლა ვეღარ ვახერხებ, არ მაქვს საჭირო ფინანსები. კი გეცოდინებათ, რამხელა თანხებთანაა დაკავშირებული ექიმთან ვიზიტი. მხოლოდ ბავშვის პენსია მაქვს და ეს რაში უნდა გეყოს?!”

ოჯახის ფინანსურ შეჭირვებას ისიც ემატება, რომ მათი საცხოვრებელი სახლი ავარიულია _ არც ჭერი უვარგა, არც _ კედელი და არც _ იატაკი.

ვარდო პაქსაძე “გურია ნიუსს” უყვება, რომ ლანჩხუთის მერიას არაერთხელ მიმართა სახლისთვის გადასახური მასალის თხოვნით, თუმცა, უშედეგოდ- მას არც დახმარება მიუღია და არც არავინ გამოხმაურებია საერთოდ.

“პირადად ვიყავი რამდენჯერმე მერიაში მისული დახმარების სათხოვნელად. შენობის პირველ სართულზე, სადაც ხდება განცხადებების მიღება იქ ვიყავი მისული. ავუხსენი რა პრობლემაც მქონდა, მართალია ყოველ ჯერზე მომისმინეს, თუმცა, ამით მორჩა ყველაფერი, რეაგირება ნული, არც არავის მოუკითხავს რამე და არც ვინმე შემხმიანებია. არადა, მართლაც გაუსაძლის პირობებში გვიწევს ცხოვრება, წვიმისას მთელ სახლში წყალი ჩამოდის.

სტუმრისთვის მობრძანდიო, ვერ მითქვამს. თუ ვინმე მეზობელი გადმოვიდა, სახლში შემოსვლისგან თავს იკავებენ. ეშინიათ, სახლი თავზე არ დაგვემხოს. ყველას უკვირს აქ ღამეს როგორ ათევთ, როგორ არ გეშინიათო. კი გვეშინია, მაგრამ რა უნდა ვქნათ, როცა სხვა საშველი არაა, სად უნდა წავიდეთ?!

 არც რამე საშუალებაა, რომ საკუთარი სახსრებით შევძლოთ სახურავის შეძენა და გაკეთება. რითი უნდა გავაკეთოთ, როცა არანაირი ფინანსური შესაძლებლობა ჩვენ არ გვაქვს“, _ ამბობს ოჯახის დიასახლისი, რომელმაც დახმარების თხოვნით “გურია ნიუსს” მომართა, მე ვერ შევძელი და იქნებ თქვენ მაინც მიიტანოთ ხელისუფლების ყურამდე ჩემი გასაჭირიო.

ლანჩხუთის მერიაში კი გვეუბნებიან, რომ მათთვის არაფერია ცნობილი ვარდო პაქსაძის პრობლემის თაობაზე, რადგან მას უწყებისთვის დახმარების თხოვნით არ მოუმართავსო,

“არც მერიისთვის არ მოუმართავს და აკეთის თემში მერის წარმომადგენელთანაც გადავამოწმე და მასაც არ აქვს არანაირი ინფორმაცია ვარდო პაქსაძის პრობლემის თაობაზე“, _ გვითხრა მერიის პიარმა, მაკა სულაბერიძემ.