ესტონეთის მთავრობამ რუსულ ტაქსის კომპანია Yandex.Taxi-ს სანქცია დაადო და ქვეყანაში მუშაობის უფლება აუკრძალა. ამის შესახებ ქვეყნის პრემიერ-მინისტრმა, კაია კალასმა განაცხადა.
“Yandex ტაქსისთვის მუშაობის აკრძალვა ჩვენგან მკაფიო სიგნალია, რომ ესტონეთში არ არის იმ კომპანიების ადგილი, რომლებიც რუსულ სპეცსამსახურებთან თანამშრომლობენ. ჩვენ ევროკავშირის ყველა ქვეყანას შევთავაზეთ, რომ ანალოგიურად მოიქცნენ და მათაც დაუწესონ სანქცია იანდექსს”. – თქვა კაია კალასმა.
აღნიშნულ საკითხს გამოეხმაურა ესტონეთის მეწარმეობისა და საინფორმაციო ტექნოლოგიების მინისტრი, ანდრეს სუტიც, მისი თქმით სანქციების დაწესების მნიშვნელოვანი მიზეზია რუსეთის ბოლო გადაწყვეტილება, რომლის მიხედვითაც Yandex-მა შეგროვებული პერსონალური მონაცემები სპეცსამსახურებს უნდა გადასცეს.
„სანქციების მიზანია ესტონელი მომხმარებლების მონაცემების შეგროვებისა და რუსული სადაზვერვო სამსახურების მიერ მათი გამოყენების აკრძალვა. Yandex-ის აპლიკაციის გამოსაყენებლად აუცილებელია დიდი რაოდენობით პერსონალური მონაცემების ხელმისაწვდომობა, რომლებიც მუშავდება კომპანიის სერვერებზე რუსეთში და შეიძლება გამოყენებულ იქნას ესტონეთისა და ევროპის წინააღმდეგ სადაზვერვო საქმიანობაში. დღევანდელ პოლიტიკურ ვითარებაში, ეს არის სერიოზული საფრთხე ესტონეთის უსაფრთხოებისთვის“, – განმარტა საწარმოთა და საინფორმაციო ტექნოლოგიების მინისტრმა ანდრეს სუტმა.
სანქციების შედეგად ტაქსის კომპანიებსა და მძღოლებს ეკრძალებათ Yandex ტაქსის აპლიკაციის (Yandex Pro) მეშვეობით მოძრაობა და შეკვეთების შესრულება. შეზღუდვების განხორციელებისა და ცნობიერების ამაღლების მიზნით, მომხმარებელთა დაცვისა და ტექნიკური მარეგულირებელი ორგანო ტაქსის ნებართვის მფლობელებს სახელმწიფო სანქციების შესახებ ეკონომიკური საქმიანობის რეესტრის მეშვეობით აცნობებს.
ISP-ებმა ასევე უნდა შეზღუდონ წვდომა ტაქსებთან დაკავშირებულ ვებსაიტებზე და Yandex NV აპებზე (Yandex Go და Yandex Pro). აპების მაღაზიებმა (Google Play, App Store და ა.შ.) ასევე უნდა შეზღუდონ Yandex.Taxi აპის ჩამოტვირთვა და შეწყვიტონ აპების განახლებების შეთავაზება.
შეზღუდვა 11 აპრილიდან ამოქმედდება.
