ევროკავშირის მხარდაჭერით გურიაში, აჭარასა და სამეგრელოში სოციალური საწარმოები დაფუძნდა

გურული ვაზისა და ღვინის კლასტერის ბაზაზე შექმნილი სოციალური საწარმოს მიზანი, ადგილობრივი მევენახეობა-მეღვინეობის განვითარების, მეწარმეობისა და ეკონომიკური განვითარების ხელშეწყობაა, მოწყვლადი ჯგუფის წევრი ახალგაზრდების დასაქმებისა და მათი ეკონომიკური კეთილდღეობის გაუმჯებესების გზით. საწარმო კლასტერის წევრ და ასევე სხვა ადგილობრივ ფერმერებს, უკვე მიმდინარე სეზონიდან, შესთავაზებს მოწეული ყურძნის დაწურვის მობილურ სერვისს. მაღალტექნოლოგიური კლერტსაცლელითა და ჰიდრო წნეხის საშუალებით, ფერმერები შეძლებენ მაქსიმალურად უდანაკარგოდ დაწურონ მიღებული მოსავალი (წვენის 80%-იანი გამოსავალი) და მიიღონ გაცილებით მეტი ღვინო, ვიდრე ტრადიციული წესით დაწურვისას. სერვისი იქნება მობილური და ადგილზე მოემსახურება დაინტერესებულ ფერმერებს გარკვეული ანაზღაურების სანაცვლოდ.

აჭარაში  დაფუძნებული სოციალური საწარმოს მიზანია აჭარის რეგიონში, მიკრო და მცირე მეწარმეთა განვითარების ხელშეწყობა – არაფორმალური განათლების მიწოდება, სამეწარმეო უნარების განვითარება, მეწარმეობასთან დაკავშირებული ტექნოლოგიებისა და სერვისების განვითარების მხარდაჭერა და სტანდარტების დანერგვა-გაუმჯობესების ხელშეწყობა; საწარმო ასევე მოახდენს ადგილობრივ პროდუქციის შესახებ ცნობადობის ამაღლებასა და რეალიზაციის ხელშეწყობას ადგილობრივ და საერთაშორისო ბაზრებზე. საწარმოში მოწყვლადი ჯგუფის წევრი ახალგაზრდები და ქალები დასაქმდებიან. საწარმო წარმოდგენილი იქნება კაფე-მაღაზიის ფორმატში და სექტემბრის თვეში დაიწყებს ფუნქციონირებას. განთავსებული იქნება აჭარის მევენახეობა-მეღვინეობის კალსტერის წევრების მიერ წარმოებული ღვინოები და ადგილობრივი წარმოების სხვადასხვა პროდუქტები (თაფლი, ყველი, წვენები, საწებლები, მშრალი ხილი – ჩირი, ხელნაკეთი ნივთები და ა.შ.). მომხმარებელს საშუალება ექნება როგორც ადგილზე მიირთვას დააგემოვნოს პროდუქცია, ასევე შეძინოს და წაიღოს.

სამეგრელოში, ასოციაცია „ათინათის“ ბაზაზე შექმნილი სოციალური საწარმო მიზნად ისახავს ზუგდიდის ტურზმის კლასტერში შემავალი ტურისტული ობიექტების განვითარებას შემდეგი მიმართულებით: ბრენდინგი; საკუთარი პროდუქტისა თუ სერვისის რეკლამირება; სოციალური მედიის გვერდების შექმნა, მათი გამართვა და მართვა; პრომო ვიდეოებისა და პროფესიონალური ფოტოების გადაღება; მოკლე პრომო-ვიდეოების განთავსება რადიო „ათინათის“ ფეისფუქ გვერდზე; ახალი შესაძლებლობების (საგრანტო კონკურსები, გამოფენები, შეხვედრები, კონფერენციები) მოძიება და ინფორმაციის მიწოდება; საგრანტო წინადადებისა და ბიზნეს იდეების დახვეწა-გამართვა, ინგლისურად თარგმნა; კლასტერის წევრი ტურისტული ობიექტების თანამშრომლების გადამზადება და კვალიფიკაციის ამაღლება; კონსულტაციები სამართლებრივ და საგადასახადო საკითხებში; კლასტერის წევრი ტურისტული ობიექტების თანამშრომლებისთვის ინგლისური ენის კურსების ორგანიზება. სოციალურ საწარმოში დასაქმებულია SECTORs პროექტის ბენეფიციარი ახალგაზრდა და სამომავლოდ კვლავ იგეგმება მოწყვლადი ახალგაზრდების დასაქმებისა და პროფესიული განვითარების ხელშეწყობა.

 პროექტი “უნარები დასაქმებისა და თანამშრომლობისთვის – პერსპექტივები საქართველოს რეგიონებისთვის (SECTORs)” ევროკავშირის ფინანსური მხადაჭერით განხორციელდა ინოვაციებისა და ცვლილებების ინსტიტუტის მიერ საქართველოს ფერმერთა ასოციაციასთან, დემოკრატიის ინსტიტუტთან და ასოციაცია „ათინათთან“ პარტნიორობით. პროექტი მიზნად ისახავდა საზოგადოების მოწყვლადი ჯგუფების დასაქმების შესაძლებლობების გაუმჯობესებას, სექტორული პარტნიორობის წახალისების, სამეწარმეო განათლების შეთავაზებისა და ინოვაციური მიდგომების დანერგვის გზით.

პროექტის საქმიანობა სამი მიმართულებით წარიმართა:

• პროექტის სამიზნე მოწყვლადი ჯგუფის წევრთა, ადგილობრივი ბიზნესის წარმომადგენელთა და საკონსულტაციო ორგანიზაციებისთვის ცოდნის, უნარებისა და შესაძლებლობების განვითარების პროგრამების განხორციელება
• დასაქმების შესაძლებლობების შექმნა არსებული ბიზნესის გაძლიერებისა და სტარტაპების დაფინანსების გზით
• საჭირო უნარ-ჩვევებისა და საუკეთესო პრაქტიკის სტანდარტიზაცია პროექტის ფარგლებში დაარსებული ბიზნესკლასტერების გაძლიერებითა და ინოვაციური მიდგომების დანერგვის გზით.

პროექტის საქმიანობები გურიას, აჭარის ავტონომიურ რესპუბლიკასა და სამეგრელო მხარეს მოიცავდა.

სტატია მომზადდა პროექტის – “უნარები დასაქმებისა და თანამშრომლობისთვის – პერსპექტივები საქართველოს რეგიონებისთვის (SECTORs)” ფარგლებში რომელიც განახორციელა ინოვაციებისა და ცვლილებების ინსტიტუტმა საქართველოს ფერმერთა ასოციაციასთან, დემოკრატიის ინსტიტუტთან და ასოციაცია „ათინათთან“ პარტნიორობით.

სტატია შექმნილია ევროკავშირის მხარდაჭერით. მის შინაარსზე სრულად პასუხისმგებელია პროექტის განმახორციელებელი ორგანიზაციები და შესაძლოა, რომ იგი არ გამოხატავდეს ევროკავშირის შეხედულებებს.