საკალათბურთო ევროლიგამ მიმდინარე სეზონის ჯგუფური ეტაპის III ტურის მოთამაშედ საქართველოს ნაკრებისა და მოსკოვის “ცსკა”-ს მოთამაშე თორნიკე შენგელია დაასახელა.
თორნიკემ მე-3 ტურში “ზენიტთან” 77:67 მოგებულ მატჩში ევროლიგაზე პირადი რეკორდი დაამყარა _ 33 ქულა. მის ანგარიშზე იყო 8 მოხსნა, 1 პასი და 2 ჩაჭრა.
ანალოგიურ წარმატებას თორნიკემ კარიერაში მეექვსედ მიაღწია _ ორჯერ “ცსკა”-ს რიგებში, ოთხჯერ კი ესპანური “ბასკონიას” მაისურით.
“Transfermarkt”-მა კი ესპანეთის ჩემპიონატში მოთამაშე ფეხბურთელების ახალი სატრანსფერო ფასები გამოაქვეყნა და “ვალენსიას” 21 წლის კარის დარაჯის გიორგი მამარდაშვილის ღირებულება თითქმის გაოთხმაგდა _ ესპანურ კლუბში იჯარით მისული ქართველი მეკარის ფასი დღემდე 800 000 ევრო იყო, დღეიდან კი 3 მილიონი ევროა.
მამარდაშვილზე ძვირი ქართველ ფეხბურთელებში ხვიჩა კვარაცხელია (18 მლნ) და საბა ლობჟანიძეა (3.4 მლნ). ამდენივე აქვთ საბაზრო ფასი დავით ხოჭოლავასა და ოთარ კიტეიშვილს.
გამოცემამ “WhoScored” მსოფლიოს ჩემპიონატის B ჯგუფის ტურის სიმბოლური ნაკრები შეადგინა, რომელშიც ორი ქართველი ფეხბურთელი შევიდა. ტურის სიმბოლურში 6 შვედი, 3 კოსოვოელი და 2 ქართველი მოხვდა.
ტურის სიმბოლურში არიან გუნდის კაპიტანი გურამ კაშია და შემტევი ნახევარმცველი გიორგი წიტაიშვილი. კოსოვოელთაგან გუნდში მოხვდნენ ვოივოდა, ცელინა და მურიქი. ტურის საუკეთესო ფეხბურთელი კი ალექსანდერ ისაკი (შვედეთი) გახდა _ 8.3 ქულა.
ორი დღის წინ ცნობილი გახდა, რომ ნორვეგიის ეროვნული გუნდისა და დორტმუნდის “ბორუსიას” თავდამსხმელი ერლინგ ჰაალანდით “მანჩესტერ სიტი” დაინტერესდა. გუშინ ბრიტანულ გუნდს მიუნჰენის “ბაიერნის” სახით ძლიერი კონკურენტი გამოუჩნდა.
გამოცემა “ბილდის” მტკიცებით, “ბაიერნი” რობერტ ლევანდოვსკის ერლინგ ჰაალანდით შეცვლის. ეს იმ შემთხვევაში მოხდება, თუ პოლონელი ფორვარდი მომავალი წლის ზაფხულში გუნდის დატოვებას გადაწყვეტს. “ბაიერნს” ჰაალანდის ტრანსფერი 75 მილიონი ევრო დაუჯდება _ ეს არის კომპენსაციის ოდენობა, რომელიც ნორვეგიელის კონტრაქტში მომავალ წელს გააქტიურდება. გარდა ამისა, 30-40 მილიონი ევრო იქნება ფეხბურთელის აგენტის, მინო რაიოლას საკომისიო. თავად ჰაალანდს სურს, რომ ხელფასის სახით სეზონში, მინიმუმ, 30 მილიონი ევრო მიიღოს.
მიმდინარე წლის ზაფხულში ფრანგ მსოფლიოს ჩემპიონს პოლ პოგბას მადრიდის “რეალს” უკავშირებდნენ, თუმცა, საბოლოოდ პოლი “მანჩესტერ იუნაიტედში” დარჩა. “რეალი” კი მთლიანად კილიან მბაპეზე იყო გადართული. როგორც მოგვიანებით გაირკვა, უშედეგოდ.
გუშინ ესპანურმა გამოცემამ “AS” გაავრცელა ცნობა, რომ “სამეფო კლუბი” კვლავ პოგბას გადაბირებითაა დაინტერესებული. ფრანგ ნახევარმცველს “მანჩესტერ იუნაიტედთან” კონტრაქტი 2022 წლის ივნისში ეწურება და “რეალი” მისი თავისუფალი აგენტის სტატუსით გადაბირებას გეგმავს.
გუშინ ერთი მოულოდნელი საფეხბურთო “ნიუსი” გავრცელდა _ “ფიფა”-ს პრეზიდენტმა ჯანი ინფანტინომ 2030 წლის მსოფლიო ჩემპიონატის ისრაელსა და პალესტინაში ჩატარებაზე ისაუბრა.
“რატომ არ შეგვიძლია ვიოცნებოთ მსოფლიო ჩემპიონატზე ისრაელში და მეზობელ ქვეყნებში? რატომ არ ვატარებთ ტურნირს ისრაელში და ახლო აღმოსავლეთის მეზობელ ქვეყნებთან ერთად, მათ შორის პალესტინაში?” _ განაცხადა ინფანტინომ ისრაელში ვიზიტით ყოფნისას.
2030 წლის მუნდიალის მასპინძლის ვინაობა 2024 წელს, ფიფას 74-ე კონგრესზე გაირკვევა.
საინტერესოა რომ “ფიფა”-ს პრეზიდენტმა ცოტა ხნის წინ, მსოფლიო ჩემპიონატის ყოველ ორ წელიწადში ერთხელ ჩატარებაზე ისაუბრა, რასაც ფეხბურთელები კატეგორიულად ეწინააღმდეგებიან.
ცნობილია, რომ ინგლისურ კლუბ “ნიუკასლს” ახალი მფლობელი ჰყავს _ რამდენიმე დღის წინ ამ გუნდის სანაცვლოდ 305 მილიონი ფუნტი იქნა გადახდილი და კლუბი არაბული კონსორციუმის მფლობელობაში გადავიდა, რომელსაც საუდის არაბეთის 36 წლის მეფის ნაცვალი და მისი ოჯახი მართავს. მათი ქონება 320 მილიარდ ევროდ არის შეფასებული რაც “მანჩესტერ სიტის” მფლობელ შეიხ მანსურის ქონებაზე 11-ჯერ მეტია. აქედან გამომდინარე, მთელი მსოფლიო “ნიუკასლის” ტრანსფერებს ელის.
ბრიტანული მასმედიის მტკიცებით “ნიუკასლს” უახლოეს მომავალში “ლესტერის” ამჟამინდელი დამრიგებელი ბრენდან როჯერსი ჩაიბარებს.
48 წლის ირლანდიელი მწვრთნელი “ლესტერს” ჩინებულად მოერგო. ეს კლუბი გასულ სეზონში ძალიან ახლოს იყო ჩემპიონთა ლიგის ზონაში მოხვედრასთან, თუმცა საბოლოოდ “ლესტერი” ევროპის ლიგაზე გავიდა. ბრენდანს თავის კლუბთან კონტრაქტი 2025 წლის ივნისამდე აკავშირებს.
[sexy_author_bio]
