The NyTimes-ის ინფომაციით, ევროპის ზოგიერთ ნაწილში, ბრიტანეთში და ასევე ამერიკის შეერთებული შტატებში წითელას მცირე აფეთქებას ებრძვიან.
როგორც ჯანდაცვის მსოფლიო ორგანიზაციაში აცხადებენ, ევროპაში წითელას შემთხვევები 40-ჯერ გაიზარდა გასულ წელს 2022 წელთან შედარებით.
გავრცელებული ინფორმაციით, ამ შემთხვევების თითქმის მესამედი დაფიქსირდა ყაზახეთში, სადაც ეპიდემია ძირითადად იმ ბავშვებს შეეხო, რომლებმაც გამოტოვეს რუტინული იმუნიზაცია. ექსპერტები შიშობენ, რომ ვირუსი შეიძლება გავრცელდეს ყაზახეთის ფარგლებს გარეთ.
ამერიკის შეერთებულ შტატებში დაფიქსირებული წითელას შემთხვევების უმეტესობა დაკავშირებულია ქვეყნის გარეთ მოგზაურობასთან. გასულ წელს დაფიქსირებული შემთხვევების რაოდენობა უფრო დაბალი იყო, ვიდრე პანდემიამდე წლების უმეტესობაში.
ექიმ დევიდ სუგერმანის თქმით, წითელას ზოგიერთი შემთხვევაში მსუბუქად მიმდინარეობს, მაგრამ ზოგ შემთხვევაში ინფიცირებულ ბავშვს შეიძლება დასჭირდეს სამედიცინო დახმარება.
“წითელათი დაავადებულ ბავშვებს შეიძლება განუვითარდეთ დიარეა და დეჰიდრატაცია, პნევმონია, რომელიც იწვევს სუნთქვის ხანგრძლივ გაძნელებას და ტვინის ანთებას, რაც იწვევს ნევროლოგიურ პრობლემებს”,_ თქვა სუგერმანმა.
გარდა ამისა, ბავშვებში ყოველი 1000 შემთხვევიდან ერთი ბავშვს შეიძლება სმენა დაუქვეითდეს ან ინტელექტუალური შესაძლებლობები შეეზღუდოს. დაავადებას ასევე შეუძლია ფატალური შედეგის გამოწვევაც.
W.H.O-ს ნოემბრის მოხსენების თანახმად, წითელას სიკვდილიანობა მსოფლიოში 43 პროცენტით გაიზარდა 2021-2022 წლებში.
წითელა ერთ-ერთი ყველაზე გადამდები ინფექციაა და ვირუსი ჰაერში ორ საათამდე რჩება.
„ის იმდენად გადამდებია, რომ თუ ერთ ადამიანს აქვს, მასთან დაახლოებული ადამიანები ასევე ინფიცირდებიან, თუ ისინი დაცული არ არიან“, – თქვა ექიმმა სუგერმანმა.
დაავადებას ახასიათებს რესპირატორული სიმპტომები, ცხელება, კონიუნქტივიტი და გამონაყარი.
