ევროპარლამენტარები ანდრიუს კუბილიუსი და რასა იუკნევიჩიენე საქართველოში ბოლო დროს განვითარებულ მოვლენებთან დაკავშირებით განცხადებას ავრცელებენ.
როგორც განცხადებაშია ნათქვამი, ოპერატორ ლექსო ლაშქარავას გარდაცვალება და პოლიციის გამაოგნებელი უმოქმედობა ძალადობრივი თავდასხმების ფონზე სრულად და მიუკერძოებლად უნდა იქნას გამოძიებული.
ასევე, ისინი აცხადებენ, რომ საქართველოში არსებობენ ძალები, რომლებიც ქვეყნის ევროპულ პროგრესს ხელს უშლიან.
„საქართველო ძალიან სერიოზულ გზაჯვარედინზეა, რაც განსაზღვრავს მის განვითარებას და წარმატებას ან მარცხს უახლოესი ათწლეულების განმავლობაში. ქართველთა უმეტესობამ უკვე მტკიცედ და დიდი ხნის წინ აირჩია ევროპული განვითარება და ევროპული ღირებულებები. ამასთან, არსებობენ ძალები, რომლებიც ცდილობენ ხელი შეუშალონ საქართველოს პროგრესს ამ გზაზე და შეცვალონ იგი. საქართველოში ბოლოდროინდელი განვითარებული მოვლენები, როდესაც 53 ჟურნალისტი ამოიღეს მიზანში და სცემეს მიტინგზე, რაც ეწინააღმდეგებოდა თბილისში ღირსების მარშს, ერთ-ერთი ასეთი მცდელობაა.
ჩვენ შევიტყეთ მედიის ერთ-ერთი დაშავებული თანამშრომლის, ლექსო ლაშქარავას გარდაცვალების შესახებ. ბატონი ლაშქარავას გარდაცვალება და პოლიციის გამაოგნებელი უმოქმედობა ძალადობრივი თავდასხმების ფონზე სრულად და მიუკერძოებლად უნდა იქნას გამოძიებული. ჩვენ საზოგადოების ყველა წევრს მოვუწოდებთ გამოავლინონ სიმშვიდე და თავშეკავება, არ წამოეგონ პროვოკაციებზე. საქართველოში ყველა პოლიტიკურმა ძალამ, განსაკუთრებით მმართველმა პარტიამ, უნდა იმუშაოს ევროპული ღირებულებების პატივისცემის უზრუნველსაყოფად.
მედიის თავისუფლებისა და გამოხატვის თავისუფლება ევროპული ფასეულობებია და უნდა იყოს მხარდაჭერილი და დაცული“, – ნათქვამია ევროპარლამენტარების განხადებაში.
ავტორი: მერაბ ცაავა
