პროექტის _ “მონაწილეობითი დემოკრატიისა და ადამიანის უფლებების გაძლიერება ადგილობრივ დონეზე საქართველოში” ფარგლებში გაიმართა შეხვედრა ჩოხატაურის მუნიციპალიტეტის მერიის და საკრებულოს თანამშრომლებთან, ასევე, ფოკუს ჯგუფთან, ჩოხატაურის სამოქალაქო საზოგადოების წარმომადგენლებთან.
რას ითვალისწინებს აღნიშნული პროექტი _ ამის შესახებ ჩოხატაურის მერიის ადმინისტრაციის უფროსს, თეა უჯმაჯურიძეს ვესაუბრეთ.
_ რას ითვალისწინებს ევროპის საბჭოს პროექტი _ “მონაწილეობითი დემოკრატიისა და ადამიანის უფლებების გაძლიერება ადგილობრივ დონეზე საქართველოში”?
_ პროექტის მიზანია მოქალაქეთა ჩართულობისა და ადამიანის უფლებების დაცვის გაძლიერება საქართველოში. პროექტი ხელს უწყობს, როგორც სამოქალაქო საზოგადოების ორგანიზაციებს, ისე მოქალაქეებს, ჰქონდეთ რეალური გავლენა გადაწყვეტილების მიღების პროცესზე. შესაბამისად, იგი მხარს უჭერს ადგილობრივ ხელისუფლებასა და სამოქალაქო საზოგადოებას შორის თანამშრომლობის ეფექტური მექანიზმების ჩამოყალიბებასა და ამოქმედებას. პროექტი, ასევე, მოიცავს ადგილობრივი ინიციატივების მხარდაჭერას და ინოვაციური მექანიზმების დანერგვის ხელშეწყობას.
_ რამდენად არიან დღეს ჩართულები ჩოხატაურში მოქალაქეები გადაწყვეტილებების მიღების პროცესში და რა გამოწვევები აქვს ამ პროცესს? რა გაკეთდება მდგომარეობის გასაუმჯობესებლად?
_ მუდმივად ვმუშაობთ, ადგილობრივი თვითმმართველობის გახორციელებაში მოქალაქეთა მონაწილეობის უზრუნველსაყოფად. ამისთვის კანონით განსაზღვრული სავალდებულო ფორმების გარდა, დავნერგეთ მონაწილეობის ისეთი ფორმები, რომლებიც მაქსიმალურად ითვალისწინებს მოქალაქეთა ინტერესებს. ამის წარმატებულ მაგალითად შეიძლება ჩაითვალოს ჩოხატაურის მუნიციპალიტეტის სამოქალაქო ბიუჯეტის პროექტის გახორციელება. პროექტი გასულ წელს დაინერგა ჩოხატაურის მუნიციპალიტეტში და მისი გახორციელება მუნიციპალიტეტის 2023 წლის ბიუჯეტიდან მოხდება. ასევე, შემუშავდა მუნიციპალიტეტის ახალგაზრდული პოლიტიკის დოკუმენტი და შეიქმნა ახალგაზრდული მრჩეველთა საბჭო. თუმცა, უნდა ითქვას, რომ გადაწყვეტილების მიღების პროცესში მოქალაქეთა ჩართულობის საკითხი კვლავაც გამოწვევად რჩება ადგილობრივ დონეზე.
მუნიციპალიტეტი ღიაა გამოცდილების მისაღებად და სიახლეების დასანერგად, როგორც მუნიციპალურ ასევე საერთაშორისო პროექტებში მონაწილეობის კუთხით. ჩვენი ძალისხმევა და აღნიშნული პროექტის გახორციელება, ვფიქრობთ, მნიშვნელოვნად შეუწყობს ხელს ამ გამოწვევების დაძლევას.
_ რა მნიშვნელობა აქვს ადგილობრივ ხელისუფლებასა და სამოქალაქო საზოგადოებას შორის თანამშრომლობას?
_ ადგილობრივი თვითმმართველობის არსიც სწორედ ეს არის _ მოქალაქეთა უფლება და შესაძლებლობა, გადაწყვიტოს ადგილობრივი მნიშვნელობის საკითხი. ეს არის უშუალო კავშირის მოქალაქესა და ადგილობრივ ხელისუფლებას შორის. რაც უფრო წარმატებულია ეს თანამშრომლობა, მით უფრო აქტიურია მოქალაქე და მოტივირებულია ადგილობრივი ხელისუფლება.
ინფორმაციისთვის, 2022 წელს ჩოხატაურის მუნიციპალიტეტმა, 15 საპილოტე მუნიციპალიტეტთან ერთად, ხელი მოაწერა ევროსაბჭოს კონგრესთან ურთიერთანამშრომლობის მემორანდუმს, რომელიც ითვალისწინებდა პროექტის – “მონაწილეობითი დემოკრატიისა და ადამიანის უფლებების გაძლიერება ადგილობრივ დონეზე საქართველოში” გახორციელებას. პროექტს ერთობლივად ახორციელებენ დემოკრატიის გენერალური დირექტორატის არჩევნებისა და მონაწილეობითი დემოკრატიის სამმართველო და ადგილობრივ და რეგიონულ ხელისუფალთა კონგრესი, საქართველოსთვის ევროპის საბჭოს 2020-2023 წლის სამოქმედო გეგმის ფარგლებში, ავსტრიის განვითარების თანამშრომლობის ფინანსური მხარდაჭერით.
კითხვაზე, თუ არის უკვე რაიმე ღონისძიებები ჩატარებული პროექტის ფარგლებში ან როდიდან იგეგმება გააქტიურება, უჯმაჯურიძე გვპასუხობს:
_ პროექტის ფარგლებში გახორციელდა ცნობიერების ამაღლების კამპანიები, ტრენინგები ადგილობრივი თვითმმართველობის მოხელეებისთვის. ასევე, წარმატებული ქვეყნების გამოცდილების გაზიარება მოქალაქეთა ჩართულობისა და ადამიანის უფლებათა დაცვის კუთხით. ამ ეტაპზე ევროპის საბჭომ დაიწყო კვლევა, ჩოხატაურის მუნიციპალიტეტში მოქალაქეთა მონაწილეობის პრაქტიკის შესწავლისა და საჭიროებების გამოვლენის კუთხით. კვლევის მიზანი არის შეისწავლოს სამიზნე მუნიციპალიტეტში არსებული მდგომარეობა სამოქალაქო ჩართულობის მიმართულებით, შეაფასოს რა გამოწვევები არსებობს გადაწყვეტილების მიღების პროცესში მოქალაქეთა მონაწილეობის კუთხით და გამოავლინოს ის შესაძლებლობები და საჭიროებები, რაც ხელს შეუწყობს მონაწილეობითი პროცესების გაუმჯობესებას. კვლევა ორიენტირებულია გააანალიზოს მოქალაქეთა მონაწილეობის მდგომარეობა 2021 – 2022 წლების მონაცემების მიხედვით და ასევე, შეაფასოს მუნიციპალიტეტში არსებულ მოქალაქეთა მონაწილეობის ზოგადი გამოცდილება და მიდგომები. კვლევის ფარგლებში შეფასდება არსებული რეალობა, მათ შორის მარეგულირებელი ჩარჩოს, მოქალაქეთა მონაწილეობის მექანიზმების, პოლიტიკის ფორმირების პროცესში მოქალაქეთა ჩართულობის კუთხით არსებული ტენდენციები და გამოწვევები; გამოვლინდება რამდენად გამჭვირვალე, ანგარიშვალდებული, ინკლუზიური და ღიაა მუნიციპალიტეტი თანამშრომლობისთვის. ასევე შეფასდება რა საჭიროებები აქვს მუნიციპალიტეტს და სამოქალაქო/კერძო სექტორს მონაწილეობითი პროცესების გასაუმჯობესებლად.
ავტორი
