ოზურგეთის მუნიციპალიტეტის საკრებულოს ინფრასტრუქტურის, სივრცითი ტერიტორიული დაგეგმარების კომისიის ექსპერტ-კონსულტანტი ნარი მუჯირი სამსახურიდან დაითხოვეს.
ვრცელდება ინფორმაცია, რომ ამ „გათავისუფლებას პოლიტიკურ სარჩული უდევს _ ნარი მუჯირი მერობის დამოუკიდებელი კანდიდატის კონსტანტინე შარაშენიძის მხარდამჭერია, რაც მისი სამსახურიდან გათავისუფლების კონკრეტული მიზეზი გახდა“.
ოზურგეთის მუნიციპალიტეტის საკრებულოში აცხადებენ, რომ ნარი მუჯირს შრომითი ხელშეკრულების ვადა ამოეწურა და აღარ გაუგრძელდა.
როგორც საკრებულოს აპარატის უფროსი ნანა თავდუმაძე “გურია ნიუსთან“ ამბობს, კომისია, სადაც ნარი მუჯირი კონსულტანტად მუშაობდა, აღარ საჭიროებს მსგავსი ტიპის თანამშრომელს:
_ ნარი მუჯირის შრომით ხელშეკრულებას ვადა გაუვიდა და ამიტომ გათავისუფლდა. კომისია, რომელშიც მუშაობდა, ამ ეტაპზე არ საჭიროებს ექსპერტ-კონსულტანტს, _ამბობს თავდუმაძე და დასძენს, რომ პოლიტიკური მოტივები გამორიცხულია.
“გურია ნიუსი“ დაუკავშირდა საკრებულოს ინფრასტრუქტურის, სივრცით-ტერიტორიული დაგეგმარების კომისიის თავმჯდომარეს ტარიელ აროშიძეს:
_ ახლა ექიმთან ვარ თბილისში. გათავისუფლებით არავის გაუთავისუფლებია. ვადა გაუვიდა ხელშეკრულებას. ახალი საკრებულოს და კომისიის თავმჯდომარე ვინც იქნებიან, ალბათ, დააბრუნებენ. ეს არ იყო პოლიტიკური მოტივი _ პოლიტიკა არაფერ შუაშია, _ ამბობს აროშიძე.
თავად მუჯირი კი ამბობს, რომ აღნიშნულთან დაკავშირებით პასუხი საკრებულოს თავმჯდომარემ დავით დარჩიამ უნდა გასცეს.
_ დათო დარჩიას ჰკითხეთ? რა გითხრათ, რის საფუძველზე აღარ გავუგრძელე ხელშეკრულებაო? ჩემი სამსახურიდან წასვლის შესახებ მან უნდა გითხრათ, ეს მან იცის, თუ რატომ არ ვიყავი ამ ეტაპზე მისაღები თანამშრომელი.
სამსახურიდან ჩემ გათავისუფლებაში, ან ხელშეკრულების არგაგრძელებაში, ბეგი სიორიძე არაფერ შუაშია _ ის არ არის და არ იყო ჩემი უფროსი. მე არ ვეკუთვნი ბეგი სიორიძის დაქვემდებარებულ სტრუქტურას, ეს საკრებულოს თავმჯდომარეს, დავით დარჩიას ჰკითხეთ.
ვერავინ იტყვის, რომ მე ვარ რომელიმე კანდიდატის აქტივისტი, ან კოტეს ან ბეგის მხარდამჭერი. მე ამ შემთხვევაში ნეიტრალური პოზიცია დავიჭირე.
კიდევ ერთხელ ვამბობ _ ეს ამბები უკავშირდება ბატონი კონსტანტინე შარაშენიძის დამოუკიდებელ კანდიდატად დარეგისტრირებას, მე ვიყავი კოტე შარაშენიძის დროს „ქართული ოცნების“ აქტივისტი, ასევე, პარტიის დამფუძნებელი. კოტეს გამგებლობის დროს ვმუშაობდი საჯარო სამსახურში, საიდანაც, 2014 წელს, მუნიციპალიტეტის ლიკვიდაციის შემდეგ, გამათავისუფლეს. შემდეგ დავით დარჩიამ მიმიღო სამსახურში. საგამოცდო ტესტირების დროს საკმარისი ქულები ვერ დავაგროვე და ისევ უმუშევარი ვიყავი.
პარლამენტის თავმჯდომარის ირაკლი კობახიძის ვიზიტის დროს, მას ავუხსენი სიტუაცია და დამასაქმეს მუზეუმში, სადაც ერთი წელი ვმუშაობდი. ამის შემდეგ ამიყვანეს ინფრასტრუქტურის, სივრცითი ტერიტორიული დაგეგმარების კომისიაში კონსულტანტ მრჩეველად,. სადაც ერთი წელი ვიმუშავე. გავიდა ხელშეკრულების ვადა და აღარ გამიგრძელეს”, _ ამბობს ნარი მუჯირი
მიუხედავად “გურია ნიუსის“ არაერთი მცდელობისა, ჩვენს სატელეფონო ზარებს საკრებულოს თავმჯდომარემ და “ქართულ ოცნების“ ოზურგეთის რაიონული ორგანიზაციის თავმჯდომარემ დავით დარჩიამ არ უპასუხა.
სტატია ქვეყნდება პროექტის “გაცნობიერებული არჩევანი _ დემოკრატიის ფუნდამენტი” ფარგლებში.
ავტორის/ავტორების მიერ საინფორმაციო მასალაში გამოთქმული მოსაზრება შესაძლოა არ გამოხატავდეს ფონდ “ღია საზოგადოება _ საქართველოს” პოზიციას. შესაბამისად, ფონდი არ არის პასუხისმგებელი მასალის შინაარსზე.
