პოლიტიკურ მეცნიერებათა დოქტორი, დემოკრატიული აუდიტის ცენტრის ხელმძღვანელი, არმაზ ახვლედიანი ,,გურია ნიუსს“ აჭარის მთავრობის ხელმძღვანელის არჩევის წესთან დაკავშირებით ესაუბრა, რომელმაც, შესაძლოა, დავა წარმოშვას მმართველ გუნდსა და პრეზიდენტს შორის.
როგორც ახვლედიანი გვეუბნება, აჭარის მთავრობის თავმჯდომარის დანიშვნის წესს განსაზღვრავს კონსტიტუცია, რომელიც მმართველ გუნდსა და საქართველოს პრეზიდენტს შორის დავის საგანი არ უნდა იყოს. ახვლედიანის თქმით, “ოცნება” ცდილობს, ნებისმიერი თემა პრეზიდენტთან ურთიერთობების გასამწვავებლად გამოიყენოს.
,,აჭარის მთავრობის თავმჯდომარის დანიშვნის წესს განსაზღვრავს კონსტიტუცია, შესაბამისად, ყველაფერი მკაფიოდაა გაწერილი. პრეზიდენტს აქვს თავის როლი, აჭარის უმაღლესი საბჭოს შემადგენლობას თავისი, ამიტომაც ვერ ვხვდები დავის საგანი რა შეიძლება იყოს, თუ არა “ოცნების” სურვილი, დაამტკიცოს, რომ ისაა ქვეყანაში ყველა პროცესის წარმმართველი.
“ოცნება” ვერ ეგუება ხელისუფლების დაყოფის წესს, მისთვის უცხოა დემოკრატია და სამართლის უზენაესობა! თეორიულად, პრეზიდენტმა მმართველი გუნდისთვის არასასურველი კანდიდატი რომც დაასახელოს, შემდეგ ხომ გადაწყვეტილების მიმღები მაინც აჭარის უმაღლესი საბჭოს უმრავლესობაა, რომელიც დღეს ,,ოცნების“ ბრმად მორჩილი ნაწილია. არ მგონია, პროცესი ჩიხში შევიდეს, თუმცა, გამორიცხული არაფერია“, _ გვითხრა ახვლედიანმა.
როგორც ახვლედიანი გვეუბნება, არ უკვირს, რომ ახალმა პრემიერ-მინისტრმა პატარაძის გაშვება მოინდომა, რადგან, მისი თქმით, შესაძლოა, მამუკა ბახტაძე აჭარის მთავრობის ყოფილ თავმჯდომარეს არ ენდობოდა.
,,ღარიბაშვილს და კვირიკაშვილსაც ჰყავდა თავისი მოყვანილი მცირე გუნდი. როცა პრემიერი კარგავს ივანიშვილის ნდობას, თანაგუნდელებიც თამაშგარე მდგომარეობაში აღმოჩნდებიან ხოლმე. პატარაძე რომ კომფორტულად გრძნობდა თავს კვირიკაშვილთან, შეუიარაღებელი თვალითაც ჩანდა და არ მიკვირს, რომ ბახტაძემ მოინდომა მისი გაშვება. აჭარა ცენტრალური ხელისუფლებისთვის ყოველთვის მსუყე ლუკმა იყო და ყველა ხელისუფლება, ასე თუ ისე, ცდილობდა, რომ აჭარაში ჰქონოდა სრული გავლენა, რაც, უპირველესად, შესაძლებელია ადგილობრივი ხელისუფლების ხელმძღვანელის ლოიალურობისა და მორჩილების მეშვეობით. პატარაძე მორჩილი და ლოიალური იქნებოდა ახალი პრემიერ-მინისტრის მიმართ, მაგრამ, ჩანს, ბახტაძე მას აღარ ენდობოდა. პატარაძეს აჭარაში ავტორიტეტი არ ჰქონდა. ის და მისი მთავრობა გაუცხოებული იყო საზოგადოებისაგან. მათი მთავარი საქმე აღებმიცემობა და საკუთარი ვიწრო პარტიული თუ ბიზნეს ინტერესების ერთგულება იყო“,_ გვითხრა ახვლედიანმა.
