ოზურგეთის ცენტრალურ სივრცეში, თეატრის მოპირდაპირე მხარეს, მრავალბინიანი კორპუსის ეზოში, რუსთაველის ქუჩაზე, კავკასიური სოჭი დგას. ხე ახალგაზრდაა, აშკარად ეტყობა, ცალ მხარეს უფრო განვითარებულია წიწვოვანი ტოტები. მეორე მხარეს ზრდა უჭირს. მიზეზიც ადვილი მისახვედრია _ თავს წამოდგარი ჰყავს უზარმაზარი, ღრუიანი ჭადარი, რომელიც, დროთა განმავლობაში წაიქცევა… სოჭს კი გასაქანს არ აძლევს…
ხე რამდენიმე წლის წინ, აქ მცხოვრები ღვთისნიერი უკრაინელი ქალბატონის, ოზურგეთში მტრედებისა და მიუსაფარი ძაღლების ცნობილი დამპურებლის, (საკუთარი პენსიის ხარჯზე) ნადია ბრილოვას შვილმა დარგო.
კავკასიურმა ენდემურმა სოჭმა მალევე გაიხარა, რაც ყოველთვის არ ხდება…
დღეს უკვე სიმაღლისკენ მიიწევს, ანუ კარგად იხარაო, რომ იტყვიან, ასეთი ფაქტის საუკეთესო პრეცედენტს ქმნის.
_არ იქნება დიდი პრობლემა, თუ იმ ხეს ნებართვის და სათანადო სამსახურების ძალისხმევით მოჭრიან და სოჭს ზრდისთვის გასაქანს მისცემენ. თქვენ შეგიძლიათ მიმართოთ ყველას…რა კარგია, ღვთისნიერი კაცის მიერ დარგული და გახარებული ამ ძვირფასი, კავკასიური, ენდემური მარადმწვანე წიწვოვანის გახარება და ფრთების გაშლა. სხვათა შორის, ხშირად უჭირს გახარება. ეს ჩვენი ენდემური ჯიშია. პატრიარქმა რომ ბრძანა, გახსოვთ? ყველას უნდა ჰქონდეს ეზოში სოჭის ხეო…ბევრმა არც იცის მისი უნიკალურობის შესახებ. თუ ამ საქმეს იზამთ, „გურია ნიუსს“ საშვილთაშვილო საქმედ ჩაგეთვლებათ, – გვითხრა ჩვენმა გულშემატკივარმა და მკითხველმა გრამიტო მამინაშვილმა.
„გურია ნიუსმა“ ამ გაზაფხულზე და მერეც თხოვნით მიმართა ოზურგეთის სერვისცენტრის ხელმძღვანელს, გია ანთაძეს და მან შეგვპირდა, რომ რაც მის ძალებს არ აღემატება, ყველაფერს გააკეთებს.
_სანამ იმ ღრუიან ჭადარს არ მოაშორებენ, იხმაურეთ,... _დაჟინებით შეგვახსენა ბატონმა გრამიტომ.
_ იქ ელექტროხაზებიც გადის და აუცილებელია, რამდენიმე სამსახურის, პირველ რიგში კი მერიის თანხმობა. გარემოს სჭირდება დათვალიერება და შესაბამისად მოქმედება. რაც შესაძლებელი იქნება, ყველაფერს გავაკეთებ, _ გვითხრა სერვისცენტრის უფროსმა.
ახლა, გვიან შემოდგომაზე, სავსებით შესაძლებელია ნახევრად გამხმარი ჭადრის მოჭრა და სოჭისთვის სივრცის გამოთავისუფლება, რასაც, ვიმედოვმებთ, გააკეთებენ ქალაქის შესაბამისი სამსახურები.
ავტორი
