„იუვენტუსის“ დამარცხების შემდეგ, ხვიჩა კვარაცხელიას „ნაპოლი“ იტალიის ჩემპიონობას დიდი ნაბიჯით მიუახლოვდა და არის ალბათობა, რომ საპატიო ტიტული, ჩემპიონატის დასრულებამდე ექვსი ტურით ადრე, 30 აპრილს გაიფორმოს.
თუ ნეაპოლელები შაბათს (29 აპრილს) შინ „სალერნიტანას“ დაამარცხებენ, ხოლო „ლაციო“ კვირას (30 აპრილს), მილანში, „ინტერს“ ვერ დაამარცხებს, „ნაპოლი“ ჩემპიონი გახდება!!!
„იუვენტუსი“ – „ნაპოლის“ შეხვედრა როგორც მოსალოდნელი იყო დაძაბული გამოდგა. მასპინძლებმა ნეაპოლელთა კარი ორჯერ დალაშქრეს. პირველ შემთხვევაში „იუვენტუსმა“ თამაშის წესი დაარღვია, მეორეჯერ კი ბურთმა მოედანი დატოვა.
მატჩის ბოლო წუთებზე კი ხვიჩა კვარაცხელიას ნაცვლად შემოსულმა რასპადორმა მთელ ნეაპოლს დიდი სიხარული მოუტანა.
ქალაქი ქუჩებში გამოვიდა და აეროპორტისაკენ გაეშურა, სადაც ტურინიდან დაბრუნებულ გუნდს საზეიმო დახვედრა მოუწყო. ნეაპოლური ფიესტა მთელი ღამე გრძელდებოდა და წარმოსადგენია რა ამბები დატრიალდება ჩემპიონის წოდების ოფიციალურად გაფორმების შემდეგ.
მატჩის შემდეგ ნეაპოლელთა მთავარმა მწვრთნელმა ლუჩანო სპალეტიმ შემდეგი კომენტარი გააკეთა:
„ჯერ კიდევ გვაქვს ქულები მოსაპოვებელი, წინასწარ ზეიმი არ მიყვარს, ღვინის ბოთლის გახსნის დრო ჯერ კიდევ არ არის. მნიშვნელოვანია, რომ გულშემატკივრები ჩვენთან ერთად იყვნენ, ჩვენთან ახლოს, თუ ამას ერთად გავაკეთებთ, ორმაგად სასიხარულო იქნება. უარეს თამაშს ველოდი, თუმცა, ჩემმა ფეხბურთელებმა ძალიან კარგად ითამაშეს. შეუძლებელი იყო, ჩემპიონთა ლიგიდან გავარდნის სიმწარეს არ ემოქმედა, იმ წაგების ნარჩენების გასუფთავება ამ სტადიონზე დღეს ძალიან რთული იყო, მაგრამ კარგად ვითამაშეთ. ეს იყო მძიმე აგური, რომელიც დაემატა ყველა მათგანს, რაც ჩვენს გზაზე მოვათავსეთ საბოლოო გამარჯვებისთვის. როცა ასე იმარჯვებ, ბოლო წუთებზე, სიხარული კიდევ უფრო ძლიერია. ამ წარმატებაში წვლილი ყველას მიუძღვის და ბედნიერი ვარ, რომ ამ ბრწყინვალე გუნდის მწვრთნელი ვარ“.
ტურინელთა მთავარი მწვრთნელი მასიმილიანო ალეგრის კომენტარი შემდეგი გახლდათ:.
„სამწუხაროა, რომ ასეთი შეხვედრა წავაგეთ, მაგრამ გოლის მომენტში უკეთ უნდა გვეთამაშა. პრაქტიკულად, გავჩერდით, ამაზე უკეთ უნდა ვიმუშაოთ. გუნდმა კარგი თამაში ჩაატარა, თუმცა, მეორე მხრივ არის გოლი, რომლის მომენტში ქათმებივით ვითამაშეთ.
„სერია A“-ში ბოლო 5 მატჩიდან 4 წავაგეთ, მაგრამ კონკურენტებზე წინ მაინც ვართ. მშვიდად უნდა ვიმუშაოთ, ოთხშაბათს მნიშვნელოვანი თამაში გვაქვს. მსაჯები? მათი გადაწყვეტილებები უნდა მივიღოთ, როგორც ყოველთვის, შევინარჩუნოთ სიმშვიდე და ენერგია არ დავხარჯოთ იმაზე, რის შედეგსაც მაინც ვერ შევცვლით.
„ნაპოლი“ „სკუდეტოს“ აბსოლუტურად იმსახურებს! ვიცოდით, რომ ძლიერ გუნდს ვეთამაშებოდით. 15 ქულის დაკლების შემდეგ გაგვიჭირდა, მაგრამ ბიჭები უნდა შევაქოთ, ყველა პრობლემის მიუხედავად, მათ კარგი სეზონი აქვთ. ბევრი საუბარი მესმის, მაგრამ ხალხმა არაფერი იცის და ლაპარაკობენ სიურეალისტურ სიტუაციაზე. დე ლაურენტისი? არ ვიცი მან რა თქვა, მაგრამ ცდილობდა ჩემს ნაპოლიში მიწვევას, მე კი სრულიად განსხვავებული არჩევანი გავაკეთე“.
რაც შეეხება ხვიჩა კვარაცხელიას. ქართველმა 85 წუთი ითამაშა და ზედიზედ მეშვიდე უგოლო მატჩი ჩაატარა, თუმცა, ცუდად არ უთამაშია, რაც იტალიური მედიის შეფასებებშიც აისახა.
Eurosport – 6 ქულა: „ახლა მუდმივად ორმაგი მეურვეობით ეთამაშებიან. ქართველი ნაკლებად დამანგრეველი მოთამაშე გახდა სეზონის მთელ პირველ ნაწილთან შედარებით. ამ საღამოს ბევრს ცდილობს, მაგრამ არსებითად ცოტა რამ გამოსდის“.
Calcionapoli1926 – 6 ქულა: „მისი რეიდები მეტოქეებს აგიჟებს“.
Calciomercato.it – 6 ქულა: „პირველ ტაიმში გატისგან სახეში ჩარტყმა მიიღო, რასაც შეიძლებოდა იუვენტუსის მცველისთვის წითელი ბარათი გამოეწვია. ის ცდილობს თავისი გუნდის გამოფხიზლებას და მხრებით ტარებას“.
Corriere Della Sera – 6 ქულა: „დრიბლინგის ღილაკზე თითი მუდმივად დაჭერილია, მაგრამ ესთეტიკა ხშირად ჭარბობს პრაქტიკას“.
Tuttonapoli 6.5 ქულა: „ჩვეულებისამებრ, ბურთს 73-ჯერ ისე ეხება, რომ პროგნოზირებადი არასდროსაა. მართლაც, რამდენჯერმე ღირებულად იმოქმედა. გოლები და საგოლე პასები ამჯერად არ არის, მაგრამ მეტოქე გუნდს აიძულებს, რომ რამდენიმე მეტოქე მას მოედნის ყველა ნაწილში გაჰყვეს და როგორ შეიძლება ის უარყოფითად შეაფასო?“.
Calciomercato.com 6.5 ქულა: „გენიალურად ბზინვარებს, აკლია ისეთი მოქმედება, რაც გუნდს 3 ქულას მოუტანს, მაგრამ მილანთან გაცუდებული პენალტის სიმძიმის დაუყოვნებლივ ჩამოშორების სურვილი აჩვენა“.
მატჩის პირველ ნახევარში ტურინელების მცველმა, ფედერიკო გატიმ ერთ-ერთ ეპიზოდში ქართველ ფეხბურთელს ხელი სახეში ჩაარტყა, მთავარმა მსაჯმა კი იუვენტუსის ფეხბურთელს ყვითელი ბარათიც არ უჩვენა. შეხვედრის შემდეგ, ყოფილმა მსაჯმა ლუკა მარელიმ ამ მომენტის შესახებ ისაუბრა და აღნიშნა, რომ გატი გასაძევებელი იყო.
„ჩემი აზრით, VAR-ზე მთავარი მსაჯისთვის ეს მომენტი უნდა ენახებინათ. შეხედეთ გატის მუშტს, რომელიც შემდეგ კვარაცხელიას ხვდება. ეს ძალიან უხეში ქმედება იყო და შესაბამისად, გატი უნდა გაეძევებინა“, – განაცხადა ლუკა მარელიმ.
ავტორი
