ლანჩხუთში ჟორდანიას #114-ში მდებარე მრავალბინიანი საცხოვრებელი სახლის პრობლემის თაობაზე “გურია ნიუსი”, დაახლოებით, ერთი წლის წინ წერდა. მაშინ ადგილზე ქალაქში მერის წარმომადგენლის თანაშემწეც მოვიდა, მოსახლეობის საწუხარს გაეცნო, პრობლემებიც მოისმინა და შესაბამისი რეაგირებაც დაგვპირდა.
რამდენიმე თვის წინ მუნიციპალიტეტის მერი ალექსანდრე სარიშვილი, მერიის შესაბამისი სამსახურის წარმომადგენელთა თანხლებით, პირადად იმყოფებოდა ადგილზე და საკუთარი თვალით იხილა, თუ რა სავალალო მდგომარეობაა რეალურად. მრავალბინიანი სახლის მონახულების შემდეგ მერმა ინფრასტრუქტურის სამსახურის წარმომადგენელს იქვე მითითებაც მისცა, საკითხი შეესწავლა და შესაბამისი პროექტიც მოემზადებინა. თუმცა, ხანი გავიდა და ჟორდანიას 114-ში სასიკეთოდ არაფერი შეცვლილა, რის გამოც აქაურები ადგილობრივ ხელისუფლებას კიდევ ერთხელ შეახსენებენ, რომ სახლის საყრდენი ბოძები ავარიულ მდგომარეობაშია და დროულ მიხედვას საჭიროებს.
საგულისხმოა, რომ ჟორდანიას 114-ში მდებარე მრავალბინიანი საცხოვრებელი სახლი ერთ-ერთია, რომლის იერ-სახეც, სახელმწიფო პროგრამის “განახლებული რეგიონები” ფარგლებში, ცენტრალური ქუჩის მხრიდან გაალამაზეს და მოაწესრიგეს, თუმცა, მაშინ არავინ დაინტერესებული შიდა ეზოს მხრიდან კორპუსის მდგომარეობით. არადა, სამსართულიანი სახლის საყრდენი ბოძები საკმაოდ დაზიანებულია, კოსმეტიკური სილამაზის უკან მრავალბინიანი სახლების პრობლემები მძლავრობს და დროულ მიხედვას საჭიროებს.
“კარგია გარე ფასადი, ტროტუარები, მოწესრიგებულ-გალამაზებული სკვერი, ცივილური სახე მიიღო ყველაფერმა, მაგრამ რად გინდა ეს ყველაფერი, თუ სახლის ერთი ნაწილი ჩამოგვენგრა?! ფაქტია, რომ ბოძები ავარიულ მდგომარეობაშია და მიხედვას საჭიროებს, თორემ ერთ დღეს არაა გამორიცხული გალამაზებული ფასადის ფონზე ეს სახლი შიდა ეზოს მხრიდან ჩამოინგრეს და ბათუმში მომხდარი ტრაგედიის მსგავსი დატრიალდეს”, _ ამბობდნენ “გურია ნიუსთან” საუბარში ჯერ კიდევ ერთი წლის წინ ამ მრავალბინიანი სახლის ის მობინადრეები, რომელთაც დახმარების თხოვნით მოგვმართეს.
ეს ადამიანები დღესაც იმავეს იმეორებენ და მუნიციპალიტეტის ხელმძღვანელობას კიდევ ერთხელ შეახსენებენ, რომ პრობლემა დროულ მიხედვას საჭიროებს:
“არაფრისგან არ ვართ დაზღვეულები, არავინ იცის, როდის გამოინგრევა ეს ბოძები. შესწავლა და შემოწმება კი არა, ერთი თვალის შევლებითაც კარგად ჩანს რა მდგომარეობაცაა. გაზეთშიც დავწერეთ, მერიაშიც ბევრჯერ ვიყავით, არის დაპირებები, თუმცა, კონკრეტული კი ჯერჯერობით, არაფერია. მაინცდამაინც უნდა ჩამოინგრეს, რომ მერე გააკეთონ?! მოკლედ, მადლს მარილიც უნდა მოაყარონ და გალამაზებული წინა ფასადის ფონზე ავარიული უკანა მხარეც მოაწესრიგონ, რომელიც საფრთხეს უქმნის აქ მცხოვრებ ადამიანებს, მათ შორის, ბავშვებს”.
“გურია ნიუსი” კიდევ ერთხელ დაინტერესდა ჟორდანიას 114-ში მდებარე ავარიული სახლის ბედით და შეეცადა გარკვევას, თუ რა გეგმები აქვს ლანჩხუთის მერიას ამ კუთხით.
როგორც მერიის პიარმა გვითხრა, ზემოთ ნახსენები პრობლემის მოგვარების მიზნით სათანადო სამუშაოების დაწყება უახლოეს პერიოდში იგეგმება.
“პრობლემის თაობაზე კარგად ვართ ინფორმირებულები, უკვე გამოცხადდა ტენდერი და სარეაბილიტაციო სამუშაოებიც მალე დაიწყება”, _ გვითხრა მაკა სულაბერიძემ.
ავტორი
