საქართველოში კვირის ჩათვლით თბილი და უნალექო ამინდია მოსალოდნელი,_ ამის შესახებ “გურია ნიუსს” გარემოს ეროვნული სააგენტოს მოკლევადიანი ამინდის პროგნოზის ბიუროს ხელმძღვანელმა დოდო გვაზავამ განუცხადა.
“მოიმატებს ჰაერის ტემპერატურა. განსაკუთრებით 2-3 აპრილს ჰაერის მაქსიმალურმა ტემპერატურამ დაბლობსა და ბარში შესაძლებელია +25-30 გრადუსამდე იყოს. შესაბამისად, მთიან რაიონებში +22-28 გრადუსამდე, მაღალ მთაში კი +15-20 გრადუსი დაფიქსირდება. 4 აპრილიდან, შავი ზღვის ჩრდილო დასავლეთიდან შემოიჭრება ცივი და ნოტიო ჰაერის მასები, რაც გამოიწვევს არამდგრად ამინდს“,_ ამბობს გვაზავა.
ჩვენს კითხვაზე ჰაერის ტემპერატურის მატებით გამოწვეული თოვლის საფარის ლღობა, ხომ არ შექმნის რაიმე საფრთხეს, გვაზავა გვპასუხობს:
“როგორც ვაკვირდებით, ზოგან 10-20 სანტიმეტრით იკლებს თოვლის საფარის სიმაღლე. შენარჩუნდება ეს კლება. ჯერჯერობით დასავლეთის მდინარეებზე შეინიშნება წყლის დონის ცოტა მატება. ყურადღებით არიან ჩვენი სპეციალისტები და თუ რამე იქნება, დროულად იქნება პრევენციული ზომები მიღებული”.
