ჩოხატაურში, კვირას მომხდარ „ქართული ოცნების“ მხარდამჭერებსა და “ერთიანი ნაციონალური მოძრაობის“ წევრებს შორის მომხდარ დაპირისპირებასთან დაკავშირებით 4 ადამიანია დაკავებული.
„გურია ნიუსისთვის“ ცნობილი გახდა, რომ ოთხივე მათგანის სასამართლო პროცესი დღეს არის ჩანიშნული. ინფორმაციას პროცესის ჩატარების ზუსტ დროზე არ ფლობენ „ერთიანი ნაციონალური მოძრაობის“ წევრები.
„ზუსტი დრო არ ვიცი. მხოლოდ ის ვიცით, რომ დღეს არის ჩანიშნული სასამართლო პროცესი“, – გვითხრა „ნაცმოძრაობის“ წერმა თათია ნიკოლაიშვილმა.
„გურია ნიუსი“ ასევე დაუკავშირდა დათო მჟავანაძეს:
„გასაიდუმლოებულია ოთხი დაკავებულის სასამართლო პროცესი, “ – აღნიშნა ჩვენთან საუბრის დროს დათო მჟავანაძემ.
ჩვენ ასევე ოზურგეთის რაიონულ სასამართლოში ვცადეთ ინფორმაციის მოპოვება, მაგრამ სატელეფონო ზარებს იქ არავინ პასუხობს.
ინფორმაციისთვის, 3 სექტემბერს ჩოხატაურში ნაციონალური მოძრაობის წევრები მაშინ სცემეს როცა ისინი მოსახლეობას ნოდარ დუმბაძის სკვერის გასხვისების შესახებ ინფორმაციას აწვდიდნენ და “ოცნების” მაჟორიტარ დეპუტატს ვასილ ჩიგოგიძეს, მერს დავით შარაშიძეს და საკრებულოს თავმჯდომარე ირაკლი კუჭავას ჩოხატაურის გაყიდვაში ადანაშაულებდნენ. მომხდარ დაპირსიპირებასთან კავშირს “ქართული ოცნება” უარყოფს. პარტიის წარმომადგენლები ამბობენ, რომ ყველაფერი “ნაციონალური მოძრაობის” წევრების მიერ მოწყობილი პროვოკაციის გამო მოხდა და წინასწარ დაგეგმილი არ ყოფილა. ფაქტზე გამოძიება ჯგუფური ძალადობის მუხლით მიმდინარეობს და დაკავებულია 4 ადამიანი. ცნობისთვის, ჩოხატაურში ნოდარ დუმბაძის სკვერთან “საქართველოს ბანკის” შენობის აშენება იგეგმება. ტერიტორია 15 000 ლარად არის შეფასებული. მას განუსხვისებელი ტერიტორიიის სტატუსი ეხსნება და აუქციონზე სამხარაულის ექსპერტიზის ბიუროს მიერ დადგენილი ფასით გავა, რის შემდეგაც მას საქართველოს ბანკი შეიძენს. ოპოზიცია და ჩოხატაურის მაცხოვრებლების ნაწილი მიიჩნევს, რომ ამით სკვერს ზიანი მიადგება, თუმცა მერიაში ამბობენ, რომ ბანკის შენობის აშენებით ნოდარ დუმბაძის სკვერს საფრთხე არ ემუქრება. ამჟამად სკვერში სარეაბილიტაციო სამუშაოები მიმდინარეობს.
ავტორი
