გაუმკლავდნენ თუ არა პრობლემებს ოზურგეთში დიდთოვლიანობის დროს

მართალია, დეკემბერი და იანვარი გურიაში თოვლის გარეშე, მზიანი ამინდებით და სითბოთი გამოირჩეოდა, თუმცა, თებერვლის შუა რიცხვებიდან, რამდენიმედღიანმა ინტენსიურმა თოვამ საკმაო პრობლემები წარმოშვა. ეს, ძირითადად, როგორც ქალაქში, ისე სოფლებში, ცენტრალურ თუ შიდა საუბნო გზებს შეეხებოდა.

_ თოვლის საფარისგან გზების გაწმენდითი სამუშაოები, უწყვეტ რეჟიმში დავიწყეთ. საშუალოდ, თოვლის სიმაღლე 70 სმ იყო. მაღალმთიან სოფლებში კი, ნალექის სიმაღლემ ერთ მეტრსაც მიაღწია. პირველ რიგში , ცენტრალური გზების მოწესრიგება დავიწყეთ. შემდეგ კი სასოფლო გზების გაწმენდა მოხდა, _ ამბობს ოზურგეთის მუნიციპალიტეტის მერის პირველი მოადგილე, გიორგი ღურჯუმელიძე.

მიუხედავად აქტიური მუშაობისა, ქალაქ ოზურგეთის ცენტრალური ადგილების თუ სოფლების გზების თოვლისგან გაწმენდის შესახებ, უკმაყოფილებას გამოთქვამდნენ, როგორც ქვეითად მოსიარულეები, ისე, ტაქსების თუ სარეისო მიკროავტობუსების მძღოლები.

_ კი გაიარა ტრაქტორმა, თოვლისგან გაწმინდა გზები, თუმცა, უკეთესად შეიძლებოდა ამ თოვლის გროვების უფრო მოშორებით გადატანა. წესიერად გვერდს ვერ უვლიან ერთმანეთს მანქანები. მოედნები, ავტოსადგურების სადგომები თუ სხვადასხვა გაჩერების ადგილები, უფრო კარგად უნდა გაიწმინდოს და პირველ რიგში, მანქანებმა ერთმანეთს გვერდი თავისუფლად უნდა აუარონ, _ ამბობენ ოზურგეთში, მუნიციპალურ ტრანსპორტზე მომუშავე მძღოლები.

_ ჩვენს სოფელ ქაქუთის (ჭანიეთს თემი) ბოლო წერტილში ვცხოვრობთ. საუბნო გზის გაწმენდა უფრო იმიტომ გვინდოდა, რომ სამეზობლოში ონკოლოგიური ავადმყოფი გვყავს. ხშირად გვჭირდება სასწრაფო დახმარების ბრიგადის გამოძახება. სოფლის ცენტრალური გზის გასაწმენდად, თოვლის დადებისთანავე შემოიყვანეს მუნიციპალური ტექნიკა და გზების თოვლისგან გასუფთავება დაიწყეს. უმადურები არ ვართ, თუმცა, როცა სოფლის ბოლოსკენ მიმავალი, შიდა საუბნო გზის გაწმენდა მოვითხოვეთ, უარი გვითხრეს: მიზეზად კი დაასახელეს, რომ ექსკავატორმა ნიჩაბი ქვას წამოდო და დაზიანდაო. როცა სამეზობლოში ონკოლოგიური ავადმყოფია, რა უნდა ვქნათ? თორემ ჩვენ ფეხით უფრო მაღალ თოვლში გვივლია და თუ გასაჭირია, უკან არც ახლა დავიხევთ. გადაუდებელი დახმარების საჭიროების აუცილებლობა როცა არის, მაშინ მეტი ყურადღებაა საჭირო. ზამთარი ჯერ არ გასულა და ყველამ ვიცით, რომ თებერვალმა გურიაში, განსაკუთრებით მწარედ იცის კუდის მოქნევა, _ გვეუბნება სოფელ ქაქუთის მკვიდრი დავით ღლონტი.

ოზურგეთის მუნიციპალიტეტის მერის წარმომადგენელი სოფელ ჭანიეთში, ზაზა სალუქვაძე “გურია ნიუსთან” ამბობს, რომ ცენტრალური გზის გაწმენდისას მართლაც დაზიანდა ტექნიკა:

_ მოხდა ისე, რომ როცა ექსკავატორი გზას თოვლისგან წმენდდა, ნიჩბით ქვას წამოედო და გაფუჭდა, რკინაა. ადგილზეც შეწყდა გზის გასუფთავება. რა უნდა ექნა მემანქანეს? ამიტომ გახდა შეუძლებელი აღნიშნულ უბანში გასვლა. გზის მნიშვნელოვანი ნაწილი გაწმენდილია და არ დავტოვებთ უყურადღებოდ. ამასობაში გადაიღო კიდეც.

შედარებით მაღალმთიან სოფლებში თოვლის საფარმა ერთ მეტრ სიმაღლეს მიაღწია და ბუნებრივია, სამუშაოებიც მეტი იყო:

_ შუქი, გაზი, წყალი სოფელს აქვს და ამ მხრივ თოვლს პრობლემა არ შეუქმნია. ვაკიჯვარში ახლა ერთ მეტრამდე სიმაღლის თოვლია. სოფლის რელიეფი ისეთია, ნახევარი ვაკე ადგილებია, ნახევარი კი მთლიანად მთიანია. იმ მხარეს, რომელსაც ადგილობრივები “თავვაკიჯვარს” ეძახიან, რთული სიტუაცია იყო. თუმცა უკან არ დაგვიხევია. მეხუთე დღეა (ბოლო საუბარი 18 თებერვალს შედგა. ავტ.), გზებზე ვართ. საუბნო გზები ძირითადად გაწმენდილია. განსაკუთრებით ასაკოვან ადამიანებს გაუჭირდათ გადაადგილება.  შინიდან გამოსვლა, სხვადასხვა საჭიროებისთვის, მუდამ უხდება ხალხს. ზოგს ფიზიკურად დავეხმარეთ, რომ ტრანსპორტამდე მისულიყო. ჩვენი თემის სოფელ ფამფალეთში, ერთ მცირეწლოვანს ბატონები (“წითელა”) ჰქონდა. რა თქმა უნდა, პირველ რიგში იქ გავწმინდეთ გზა, რომ სასწრაფო დახმარების მანქანა შესულიყო თავისუფლად. არ შემიძლია, არ აღვნიშნო მუნიციპალური ტრანსპორტის მძღოლის, დათო ცეცხლაძის დახმარება, რომელსაც წამდაუწუმ ვურეკავდით. ღამეები ათია, შემცვლელიც არ მოუთხოვია და ყველა უბანში გაწმინდა გზა. მთიანი სოფელია, თოვლი დიდია და მართლა თავდაუზოგავად იმუშავა ამ ადამიანმა, _ გვეუბნება ოზურგეთის მუნიციპალიტეტის მერის წარმომადგენელი სოფელ ვაკიჯვარში გამგებელი დავით ჩავლეშვილი.

ერთ მეტრამდე იყო თოვლის საფარი სოფელ შემოქმედშიც:

_ დიდი სოფელია, უამრავი შიდა გზით. ადვილი არ იყო ყველას გაწმენდა, თუმცა დღეისთვის ყველა გასუფთავებულია. არც ერთი არ დაგვიტოვებია. განსაკუთრებით ვშიშობდით ერთი ადამიანის გამო, რომელიც ჩვენი მცხოვრებია და დიალეზზე იმყოფება. პირველ რიგში ამ უბნის გზა გავწმინდეთ. ჩვენ მარტო ვერაფერს ვიზამდით, რომ მუნიციპალური ტრანსპორტი დროულად არ მოსულიყო. ამ მხრივ მადლობის მეტი არაფერი გვეთქმის, _ ამბობს მერის წარმომადგენელი სოფელში თამაზ ბურჭულაძე.

დიდი იყო თოვლის საფარი მთიან სოფელ ბაილეთშიც:

_ როგორც კი ინტენსიური თოვა დაიწყო, სოფლის ცენტრალური გზის გაწმენდაც დავიწყეთ. განსაკუთრებით, ჩვენი თემის სოფელ ჭანიეთურში არის აღმართიანი მონაკვეთები, სადაც პრობლემები შეიქმნა. ამიტომ პირველ რიგში იქ გავწმინდეთ გზა. შუქი ცოტა ხნით გამოირთო. როგორც ადგილზე მოსულმა ენერგოკომპანიის თანამშრომლებმა თქვეს, დაზიანება მეხმა გამოიწვია. თუმცა დიდი დრო არ დაგვიანებია და მალე აღდგა მოსახლეობისთვის ელექტროენერგიის მიწოდება. სხვა მხრივ, არანაირ პრობლემა არ შექმნილა და რაც იყო, კი გითხარით, ამ დროისთვის მოგვარებულია, _ ამბობს ოზურგეთის მუნიციპალიტეტის მერის წარმომადგენელი სოფელ ბაილეთში გიორგი ქათამიძე.

ცალკეული რთული უბნები იყო სოფელ ბახვშიც, რის შესახებაც მუნიციპალიტეტის მერის წარმომადგენელი ამ სოფელში კახი მგელაძე გვესაუბრა:

_ ჩვენი სოფლის თემში არის ასეთი უბანი, ოქროსქედი, საკმაოდ მაღალი და დამრეცი , მიხვეულ-მოხვეული გზებით. აქ მცირე ნაწილი დარჩა გაუწმენდავი. დანარჩენს კი მივხედეთ. ყოველ წუთს მზად ვართ, თუ რაიმე დახმარება დასჭირდება იქ მცხოვრებ რამდენიმე ოჯახს, პრობლემა არ შეექმნას. ახლა, სოფელში, ყველა კომუნიკაცია გამართულად მუშაობს. მიუხედავად იმისა, რომ ორი დღე განსაკუთრებით უწყვეტად თოვდა, არც შუქი გამორთულა, გაზიც მიეწოდება სოფელს და სკოლაშიც მოსწავლეები დროულად გადაჰყავს სასკოლო ტრანსპორტს.

შედარებით დაბალ და ზღვისპირა ზოლის სოფლებში _ ნარუჯაში, ლაითურში, კონჭკათში, თხინვალში, შრომაში, ნატანებსა და ურეკში გზის გაწმენდის საჭიროებაც არ ყოფილა, იმდენად პატარა იყო თოვლი. თუმცა, როგორც მერის წარმომადგენლები ამბობენ, ყურადღებით იყვნენ, რაიმე საფრთხე არ შექმნილიყო.

_ ნარუჯასა და ლაითურში გზის გაწმენდის საჭიროებაც არ შექმნილა. მიუხედავად ამისა, მუნიციპალური ტექნიკა მობილიზებული იყო და გვთავაზობდნენ, საჭიროება თუ მოითხოვდა, გამოგვეძახებინა. ჩვენთან ყველა კომუნიკაცია მწყობრშია. სარეისო ტრანსპორტი არც კი შეფერხებულა. თოვდა, თუმცა, საფარი რამდენიმე სანტიმეტრს არ ასცილებია. მაინც ყურადღებით ვართ. თებერვალმა გურიაში სხვანაირი შემოტევა იცის. ამიტომ, თუ ასე მოხდა, უნდა მოვიგერიოთ. გმადლობთ ყურადღებისთვის, _ მხიარული ტონით დაგვემშვიდობა ოზურგეთის მუნიციპალიტეტის მერის წარმომადგენელი დაბა ნარუჯაში გამგებელი ზვიად მიქელაძე.