“გაუშვით, მოკლას” – კაცმა შვილს თანატოლი აცემინა და ვიდეოს იღებდა

შიდა ქართლში 42 წლის მამაკაცმა მცირეწლოვანი ბავშვები აჩხუბა და ვიდეო გადაუღო,_ ინფორმაციას qartli.ge ავრცელებს.

როგორც თვითმხილველები ამბობენ, მამაკაცი საკმაოდ აგრესიული იყო და თავის  შვილს მოუწოდებდა მისი თანატოლი მოეკლა.

ნაცემი ბავშვის ოჯახის ახლობელი ჩვენთან საუბრისას აღნიშნავს, რომ ბიჭს საკმაოდ მძიმე დაზიანებები აღენიშნებოდა. შინაგან საქმეთა სამინისტროს ცნობით, მომხდარზე გამოძიება 126-ე მუხლით არის დაწყებული.

“ერთ-ერთი ბავშვის მამა ხშირად აქეზებს თავის შვილს, რომ მეორე ბავშვს სცემოს. ეს ვიდეოც მაღაზიის წინ გადაუღო ბავშვებს ჩხუბის დროს. ბავშვი შემოვარდა სახლში ნაცემი და შეშინებული. ცხვირიდან სისხლი მოსდიოდა და საავადმყოფოში წამოვიყვანე. როგორც ბავშვმა მითხრა, მამამისმა ჩამოიყვანა თავისი შილი და ჩემზე უთხრა, მიდი მოკალიო. იმ ვიდეოშიც ჩანს, რომ ხალხი მიდის და მამაკაცს ეუბნება, რატომ სცემს ბავშვსო. ის კიდე ეუბნება, გაუშვი მოკლასო. მაღაზიის წინ, ხალხის თანდასწრებით. ხალხს ეჩხუბებოდა გაუშვით, არ ჩაერიოთ, მოკლასო. პოლიციაც გამოვიძახეთ და შემდეგ პატრულმა სასწრაფო დახმარება გამოიძახა და გადაგვიყვანეს საავადმყოფოში,”– ამბობს დაზარალებული ბავშვის ახლობელი.