მიმდინარე სპორტული შაბათ-კვირის უმთავრესი გმირი ქართველი ჩოგბურთელი ნიკოლოზ ბასილაშვილი აღმოჩნდა, რომელიც აშშ-ში მიმდინარე “ინდიან უელსის“ პრესტიჟულ ტურნირში ასპარეზობდა.
სამწუხაროდ, ბასილაშვილი “1000-იანი მასტერსის“ ფინალში დამარცხდა. 29 წლის ჩოგბურთელმა ისტორია მაინც დაწერა, რადგან პირველი ქართველი გახდა, რომელმაც “1000-იანი მასტერსის“ ფინალში იასპარეზა. მისი მეტოქე ბრიტანელი კამერონ ნორი იყო, რომელმაც, ასევე, პირველად ითამაშა “ინდიან ველსის“ გადამწყვეტ შეხვედრაში. ნიკოლოზ ბასილაშვილმა ფინალში გასვლით 510 სარეიტინგო ქულა გამოიმუშავა და რეიტინგში 36-ე ადგილიდან 27-ე პოზიციაზე გადაინაცვლა.
კამერონ ნორისთან წაგების შემდეგ ქართველმა ჩოგბურთელმა შემდეგი კომენტარი გააკეთა:
“მესამე სეტში თამაში ჩემთვის ძალიან რთული გახდა. ჯანმრთელობის პრობლემები მქონდა, ვეცადე კორტიდან გავსულიყავი, ცოტა ამომესუნთქა, თუმცა, ეს ფიზიკური დისკომფორტი ვერ დავძლიე. წინა მატჩებშიც მაწუხებდა, მაგრამ მესამე სეტში უკვე გაუსაძლისი იყო. არ ვაპირებდი ამის თქმას, მაგრამ თავს მართლა ცუდად ვგრძნობდი.
გავაგრძელებ შრომას, გავაგრძელებ, რასაც აქამდე ვაკეთებდი, ვეცდები, კარგად ვითამაშო და აქ მიღებული გამოცდილება მომავალ ტურნირებში აუცილებლად გამომადგება“.
საქართველოს ნაკრებისა და მოსკოვის “ცსკა“-ს მოთამაშე თორნიკე შენგელია, შესაძლოა, ქირურგიულ ჩარევას გადაურჩეს, ეს კი, მის მოედანზე დაბრუნებას შედარებით მოაახლოებს.
გუშინ რუსული კლუბის პრეზიდენტმა ანდრეი ვატუტუნმა შემდეგი განცხადება გაავრცელა:
“ერთბაშად სამი ქვეყნიდან შევკრიბეთ ექიმები, რომლებიც მხრის სახსრის მკურნალობაზე არიან სპეციალიზირებულნი და თორნიკეს მკურნალობის ტაქტიკას სწორედ ისინი განიხილავენ. შესაძლოა, ოპერაცია თავიდან ავირიდოთ და მხოლოდ კონსერვატიული მკურნალობა დაგვჭირდეს”.
სლოვაკეთის საფეხბურთო პირველობაზე ტრნავის “სპარტაკსა“ და ბრატისლავის “სლოვანს“ შორის 161-ე დერბი ნაადრევად დასრულდა.
როგორც “სლოვანის“ ოფიციალური ვებგვერდი გვერდი იუწყება, მასპინძელთა გულშემატკივრები სტადიონის სახურავზე ავიდნენ, თან კი პიროტექნიკა და ქვები ჰქონდათ. ასევე, საორგანიზაციო სამსახურის არასაკმარისი რაოდენობის გამო 200-ზე მეტმა გულშემატკივარმა მოედანზე შეღწევა მოახერხა, რის გამოც მატჩი ჩაიშალა.
“სლოვანს“ საქართველოს ეროვნული გუნდის ყოფილი მთავარი მწვრთნელი ვლადიმირ ვაისი წვრთნის, ხოლო გუნდში გურამ კაშია და ჯაბა კანკავა გამოდიან.
გუშინ მსოფლიო რაგბიმ ოფიციალურად დაადასტურა, რომ საქართველოსა და ფიჯის ნაკრებთა ტესტ-მატჩი ნეიტრალურ სტადიონზე, ესპანეთში ჩატარდება.
20 ნოემბერს თამაშს პატარა ქალაქი არანხუესი უმასპინძლებს, რომელიც დედაქალაქ მადრიდის სიახლოვეს მდებარეობს. თამაში სტადიონ “ელ დელეიტეზე“ შედგება. ის მხოლოდ 7 ათას ქომაგს იტევს.
გამოცემა “El Nacional“-ის ცნობით, არგენტინის ეროვნული ნაკრების ფეხბურთელების, ლიონელ მესისა და სერხიო აგუეროს ერთი კლუბის მაისურით თამაშის შესაძლებლობა ისევ არსებობს. “პარი სენ-ჟერმენი“ “ბარსელონასთან“ ფეხბურთელების გაცვლის ვარიანტზე ფიქრობს.
პარიზელებს სერხიო აგუეროს გადაბირება, მის სანაცვლოდ კი კატალონიაში კიდევ ერთი არგენტინელის, მაურო იკარდის გაშვება სურთ. ცნობილია, რომ მესისა და იკარდის ერთმანეთთან არცთუ იდეალური ურთიერთობა აქვთ. თუკი კლუბებს შორის შეთანხმება მოხდება, გარიგება ზამთრის სატრანსფერო ფანჯრის პერიოდში განხორციელდება. ჯერჯერობით უცნობია, როგორი იქნება “ბარსელონას“ პოზიცია ფეხბურთელების გაცვლის ამ ვარიანტთან დაკავშირებით.
საფეხბურთო ასოციაციების საერთაშორისო საბჭო კი რომელიც ფეხბურთის წესების რეგულირებითაა დაკავებული, ერთ საინტერესო და ორიგინალურ მოთხოვნას განიხილავს. მის თანახმად, ტაიმებს შორის შესვენების დრო 15-დან 25 წუთამდე უნდა გაიზარდოს.
ამ წინადადებით ორგანიზაციას სამხრეთ ამერიკის ფეხბურთის კონფედერაციამ მიმართა სადაც თვლიან, რომ პირველ ეტაპზე აღნიშნული სიახლე გადამწყვეტ მატჩებზე უნდა დაინერგოს, მაგალითად, ლიბერტადორესის თასის ფინალზე.
როგორც ირკვევა, სამხრეთამერიკელებს შესვენების დროის გაზრდა იმისთვის სურთ, რომ სხვადასხვა სახის შოუები გამართონ, როგორც ეს ამერიკული ფეხბურთის სუპერბოულზეა მიღებული. საფეხბურთო ასოციაციების საერთაშორისო საბჭო აღნიშნულ საკითხზე გადაწყვეტილებას 27 ოქტომბერს გამოიტანს.
[sexy_author_bio]
