დღეის, 2025 წლის 20 ოქტომბრის მდგომარეობით გურიაში, ოზურგეთში გაძვირებულია პური, ზეთი, სიგარეტი, მაკარონის ნაწარმი, ყავა… ზოგადად, იგივე მდგომარეობაა მთელ საქართველოში.
ფასების ზრდას მტკივნეულად, უფრო მეტიც, გაბრაზებული ხვდება მოსახლეობა. ზოგადად, როცა პროდუქცია ძვირდება, ხშირად ამ ყველაფერს უკავშირებენ ლარის კურსის გაუფასურებას. გარდა ამისა, როგორც ჩვენი მუშაობის დაკვირვების ხანგრძლივი პრაქტიკა გვაჩვენებს, ყოველი არჩევნების შემდეგ, ყოველ შემოდგომაზე, ვალუტის კურსის ცვლილების დროს, ფასების უარესობისკენ შეცვლა მუდამ თვალში საცემია.
ახლა, როცა პროდუქტის ფასის გაძვირება პურის ფასის მატებით დაიწყო, გურიაში, ოზურგეთში ხალხის უკმაყოფილო საუბარი ხშირად ისმის.
_ უკმაყოფილო კი არა, უკვე ძალიან გაბრაზებული ვარ, მეც და ბევრი სხვაც, ვისაც პენსია აქვს. ვფიქრობდით, როგორც ყოველთვის, არჩევნების შემდეგ პროდუქტს გაგვიძვირებენო. იგივე ხდება, პენსიის მატებას როცა გამოაცხადებენ. იანვრამდე ვერ ავიღებთ იმ მომატებულ ოციოდე ლარს და წაიღონ უკან.
ხომ ხედავთ, წაბლი ჩამოვიტანე ამ დილით ჩასაბარებლად. ამის ფასიც დაეცა. ეს პროდუქტის ფასები კი გავარდა ფიშტოსავით, მაგრამ ჩვენსას არაფერს არ ემატება. პურს და ზეთს მაინც როგორ გვიძვირებენ ეს ნამუსზე ხელაღებულები. რაა ეს? ან ვის ამასხარავებენ. 20 ლარს მიმატებ და ორჯერ მეტად მიძვირებ საკვებ პროდუქტს? _ გაბრაზებულმა განაცხადა მაგული კონტრიძემ დილაადრიან ოზურგეთის ბაზარში. ის ექადიის უბნიდან ჩამოვიდა აქ და ათიოდე კილოგრამი წაბლის ჩაბარება სურდა.
ჩვენს მკითხველს ვეტყვით, რომ როგორც ზემოთ აღვნიშნეთ, არჩევნების შემდგომ დღეებში სასწრაფოდ გაიზარდა პროდუქტის ფასი. საკმაოდ გაძვირდა პური, ზეთი, მაკარონის ნაწარმი, ყავა…
დღეისთვის ოზურგეთში, მხოლოდ შპს “ვასაძის პური” ცხვება ფასის და წონის შეუცვლელად. ყველაზე გაყიდვადი 400-გრამიანი პური ერთი ლარი ღირს.
ახლა ვნახოთ, რა მდგომარეობაა სხვაგან. გურიის ქუჩაზე მდებარე სასურსათო მაღაზიაში გვითხრეს, რომ აქ “ვასაძის პურს” ჰყიდიან და ფასი და წონა არ შეცვლილა.
_ ყველამ რომ მოუმატა, ესენიც კი მოუმატებენ მერე. აბა, რას იზამენ. ხან ასე ხდებოდა, შემოდგომაზე იმატებდა პურის ფასი, მაგრამ ახლა სურსათის გაძვირებაც სწრაფად დაიწყო. ადამიანს პურს და ზეთს რომ გაუძვირებ, უფრო რაღა უნდა წაუჭირო ყელში, თოკი? _ გვითხრა ერთ-ერთმა გარე მოვაჭრემ ლალი დოლიძემ.
ამავე ქუჩაზე მდებარე “მაგნიტის” ქსელის მაღაზიაში გვითხრეს, რომ თავის მარკეტში მხოლოდ “იფქლის” პურს ჰყიდიან. თბილისიდან მოაქვთ და ფასი უკვე ყველა სახეობის პურს მოემატა:
_ ოთხასგრამიანი თეთრი პური ერთი ლარი ღირდა. ახლა 1,15 ლარი გახდა, ანუ 15 თეთრი მოიმატა. ხუთასგრამიანი პური ღირდა 1,10 ლარი, ახლა გახდა 1,25 ლარი _ 15 თეთრი მოიმატა. დაჭრილი პური 1,20 ლარი ღირდა, გახდა 1,30 ლარი. ერთადერთი, ლიტვურის სახელწოდებით რაც გვაქვს, ჯერ ამ პურს ფასი არ მომატებია, _ გვითხრეს აქ.
ასევე, გვითხრეს, რომ მოიმატა სიგარეტის (20 თეთრი) და ყავის ფასმა.
ათი თეთრით არის პურის ფასი გაზრდილი “ჩემი მარკეტის” საცხობში.
მოსახლეობის წარმომადგენლები ამბობენ, რომ ზეთის ფასის ზრდა, პურის გაძვირების შემდეგ ყველაზე მტკივნეულია. ამასთანავე, შიშობენ, რომ ყველაფრის ფასი მოიმატებს, რადგან ყოველდღიურად ხდება სხვადასხვა პროდუქტზე მომატებული ფასის “შემოპარება”.
_ პური რომ გააძვირეს, იმ დღეებში ზეთი არ იყო გაძვირებული. 4,80 ლარად ვიყიდე ერთ–ერთ მარკეტში. ზოგან უფრო იაფადაც იყიდდი. ნახეთ, ახლა, საშუალოდ, 7,80 ლარი ღირს ერთი ლიტრი ზეთი. რას ჰგავს ეს?! მე, პენსიონერმა, წამლები როგორ ვიყიდო, რომელიც ასევე ძალიან გაძვირებულია. ეს არის პენსიის მომატება? 20 ლარით იზრდება იანვრიდანო და საკვები პროდუქტი ისე ძვირდება ყოველდღიურად, რომ ეს მომატებული 20 ლარი არის დაცინვა ხალხისთვის, ასაკოვანი ადამიანებისთვის, _ გვეუბნება ოზურგეთელი პენსიონერი, 80 წლის ეთერ ლომჯარია.
სოფელ მერიიდან ჩამოსულმა ბიძინა კეჭაყმაძემ, რომელსაც თხილი ჰქონდა ჩასაბარებლად ჩამოტანილი, გვითხრა, რომ გაუხარდა თხილის ჩაბარება გატეხვით რომ შესთავაზეს:
_ ერთი ცალი უკვე ერთი ლარი ღირს და საკმაოდ ხარისხიანი მოსავალი კარგად ჩავაბარე. მე კი მიხარია, რომ დღეს თხილი კარგად ჩავაბარე, მაგრამ რა ვიყიდო ამ ფულით? შინ უნდა წავიღო პურის ფქვილი, ზეთი, შაქარი, სიგარეტიც მჭირდება. ყველაფერს მომატებული აქვს ფასი შაქრის გარდა. დარწმუნებული ვარ, ხვალ–ზეგ შაქრის ფასსაც აწევენ. გასულ წელს, ამ დროს, ამბობდნენ, რომ პროდუქციის ფასის ზრდის მიზეზი გახდა ლარის კურსის გაუფასურება. ამ მომენტში ეს არ მომხდარა და მაინც გაძვირდა. როგორ დავიჯერო ახლა, რომ ეს არჩევნებს არ უკავშირდება? _ გვეუბნება ბატონი ბიძინა.
ჩვენ გადავხედეთ გასული წლის ამ პერიოდის ფასების მდგომარეობას ლარის კურსის ცვალებადობას.
დისტრიბუტორთა ბიზნესასოციაციას, გასულ წელს, თავის განცხადებაში ნათქვამი აქვს, რომ ლარი დოლართან მიმართებაში 2,80 -იან ნიშნულს გადასცდა და გაუფასურება გაგრძელდა.
_ბოლო დრომდე მოლოდინი იყო, რომ ლარის კურსი გეზს გამყარებისკენ აიღებდა. მიუხედავად იმისა, რომ პოლიტიკური დაძაბულობა ოდნავ ჩაცხრა და ლარის გამყარებაც უნდა დაწყებულიყო, პირიქით, გაუფასურება გაგრძელდა.. ეს კი სამომხმარებლო ბაზარს დაეტყო და იმპორტიორები უკვე ღიად აცხადებენ, რომ გაძვირების რეალური საფუძველი არსებობს და სხვა გზა არ აქვთ, _ აცხადებდა მაშინ, 2024 წლის შემოდგომაზე დისტრიბუტორთა ბიზნესასოციაციის ვიცე-პრეზიდენტი ივა ჭყონია.
წელს, ჯერჯერობით, მსგავსი განცხადება არ გაკეთებულა.
აღსანიშნავია, რომ ადგილობრივი წარმოების პროდუქცია არ გაძვირებულა, თუმცა საქართველო რაკი იმპორტდამოკიდებული ქვეყანაა, ბაზარზე მყისიერი გაძვირება მალევე მძიმედ შეიგრძნობა, რაზეც ასე მწვავედ რეაგირებს ხალხი.
_ ახლა რომ ასე სწრაფად ძვირდება ყველაზე საჭირო პროდუქტი, მერე შეძლებენ ფასების “დაჭერას“? არადა, პენსიონერზე მეტად, ეს იმ ადამიანებსაც მწვავედ ეხება, ვისაც არც პენსია აქვს და არც სამსახური. ან თუ მუშაობენ, ეს არის სეზონური სახის სამუშაო და სამომხმარებლო კალათაში ბევრს ვერაფერს ჩავდებთ, _ გვითხრა ტანსაცმლის მაღაზიის მეპატრონემ ოზურგეთში ნანა სარიშვილმა, თან მრავალმნიშვნელოვნად ჩაილაპარაკა, ეკონომიკის ზრდაზე რომ არის ყოველდღე საუბარი ტელევიზიით, იქნებ, თქვენ გაგვაგებინოთ დაგვარწმუნოთ, სად, როგორ იზრდება ეს ეკონომიკა. და თუ სადმე ჩვენს ქვეყანაში ყვავდება და ჩვენ არ გვეხება, ჩვენი თავი ჯანდაბას. ამ ჩვენს სამშობლოში თუ ვინმეს ხეირი აქვს, მაინც გაგვიხარდებაო, _ ირონიაც შემოგვაპარა ქალბატონმა ნანამ.
ავტორი
