განადგურებული, დავიწროებული გზა, სადაც ორი მანქანა ერთმანეთს გვერდს ძლივს უვლის და რომელიც უსაფრთხო არც ფეხით გამვლელებისთვისაა, დაბა ჩოხატაურის ცენტრთან ახლოს მდებარეობს.
ჩვენს მკითხველს ცოტა ხნის წინ, ნინოშვილის ქუჩის შესახვევში მცხოვრები მოქალაქეების პრობლემები გავაცანით.
ქუჩის მცხოვრებლები მაშინ ამბობდნენ და დღესაც ამბობენ, რომ ვერც ერთ დროში, ვერც ერთი ხელისუფლის ყურადღება ვერ მიიქციეს. მათი ძირითადი პრობლემა დაზიანებული და გადასაადგილებლად რთული გზაა, რაც რამდენიმე ათეული წელია, აწუხებთ.
“ყოველ წელიწადს გვპირდებიან, ამ ზაფხულს ვერ მოხერხდა და იმ ზაფხულს აუცილებლად გაკეთდებაო. გავიდა ეს ზაფხულიც. არადა, მგონი, ერთადერთი ქუჩაა მთელ მუნიციპალიტეტში, რომელიც ასეთ მდგომარეობაშია”, _ ამბობენ ნინოშვილის ქუჩის მცხოვრებლები.
ისინი იხსენებენ შემთხვევას, როცა მათ ქუჩაზე სხვა დასახლების მცხოვრებმა ქალმა ფეხი მოიტეხა. ამბობენ, რომ ცხაურში ადგილობრივ მცხოვრებლებსაც ხშირად უვარდებათ ფეხი, რადგან ცხაურზე ლითონის ვიწრო ზოლია დაფარებული, რომელიც მანქანების გადაადგილების დროს ხელით გასწორებას საჭიროებს.
მოგვარდება თუ არა ამ ზაფხულს ნინოშვილის ქუჩის მცხოვრებლების წლების განმავლობაში მოუგვარებელი პრობლემა _ ამ საკითხის გარკვევა მერის წარმომადგენელთან, გოჩა ჯინჭარაძესთან ვცადეთ.
ჯინჭარაძემ ჩვენთან საუბრისას კიდევ ერთხელ დაადასტურა, რომ გზა გასაკეთებელია, მერიც და საკრებულოს თავმჯდომარეც საქმის კურსში ჰყავს ჩაყენებული და კითხვაზე პასუხის მისაღებად, თუ როდის მოხდება ნინოშვილის ქუჩის რეაბილიტაცია, ირაკლი კუჭავასთან გადაგვამისამართა:
“იგივე პასუხის გაცემა შემიძლია ახლაც, რა პასუხიც მაშინ გაგეცით. კიდევ ერთხელ ვადასტურებ, რომ გზა გასაკეთებელია. საქმის კურსშია მერიც და საკრებულოს თავმჯდომარეც”, _ გვითხრა ჯინჭარაძემ.
მერის წარმომადგენელთან საუბრის შემდეგ ირაკლი კუჭავას დავუკავშირდით.
როგორც მერის პასუხიდან ირკვევა, დაბა ჩოხატაურში ნინოშვილის ქუჩის მოსახლეობის პრობლემა წელსაც მოუგვარებელი რჩება _ ირაკლი კუჭავას განცხადებით, ნინოშვილის ქუჩის შესახვევების რეაბილიტაცია წელს დაგეგმილი არ არის:
“ნინოშვილის შესახვევების გაკეთება წელს ვერ დაიწყება. წელს მუნიციპალიტეტისთვის გამოყოფილი რეგიონებში გასახორციელებელი პროექტების ფონდიდან თანხა, ძირითადად, იხარჯება სოფლის ცენტრებამდე დამაკავშირებელი გზების რეაბილიტაციაზე. ასე რომ, დაბაში, პირველ ეტაპზე, ჩვენ თითქმის ყველა ქუჩა მოვაწესრიგეთ _ მხოლოდ შესახვევებია დარჩენილი, რომელთა მოწესრიგება მომავალში გაგრძელდება. ჯერ პროექტი მომზადდება და შემდეგ ჩატარდება სამუშაოები, მაგრამ წელს ნინოშვილის ქუჩის შესახვევების გაკეთება, სამწუხაროდ, გათვალისწინებული არ არის”, _ გვითხრა მერმა.
ავტორი: რუსა ოქრუაშვილი
