“გინდათ? დაგიჩოქებთ!” _ საკრებულოს სხდომა ყვირილით დაიწყო და ფიზიკურ დაპირისპირებაში გადაიზარდა

29 აპრილს, ოზურგეთის მუნიციპალიტეტის საკრებულოს სხდომაზე, საკრებულოს თავმჯდომარემ დავით დარჩიამ დღის წესრიგით გათვალისწინებული 13 საკითხი წარმოადგინა და ითხოვა, სხდომა წარმართულიყო კორექტულად, რეგლამენტის დაცვით.

“ნაციონალმა” დეპუტატმა, თათია ნიკოლაშვილმა ითხოვა, მიეცათ მისთვის კითხვის დასმის საშუალება, თუმცა, მას კვლავ რეგლამენტი შეახსენეს.

რაკი უარი მიიღო, ნიკოლაშვილმა ტრიბუნას მიაშურა:

_ თქვენ ადგილიდან ისევ ვერაფერს გაგაგონებთ, აქედან გეტყვით, _ თქვა მან და კათედრასთან დადგა.

ნიკოლაშვილმა გააპროტესტა ოზურგეთის მუნიციპალიტეტის მერიიდან საჯარო მოხელეების დათხოვნა, რაც მისივე თქმით, რეორგანიზაცია კი არა, არამედ წმენდაა პოლიტიკური ნიშნით.

საკრებულოს თავმჯდომარის მოადგილემ, ლავრენტი ბიგვავამ, ხელით აღნიშნა წინა რიგებში მსხდომ “ქართული ოცნების” დეპუტატებს, ნიკოლაშვილისთვის ეპასუხათ.

საპასუხოდ მაშინვე წამოდგა “ქართული ოცნების” წევრი ქეთევან ხომერიკი და ნიკოლაშვილს ცხვირწინ აუფრიალა 2008 წლის ომის ამსახველი ფოტოები _ ის “ნაციონალურ მოძრაობას” ადანაშაულებდა ომის გაჩაღებაში.

ყვირილი, წივილ-კივილი იმდენად გამძაფრდა, რომ დარბაზში უკვე არაფერი ისმოდა.

ბოლოს, ნიკოლაშვილი მოსცილდა ტრიბუნას და თავისი სკამისკენ გაეშურა. “დორბლი მოიშორე, გოგო”, _ მიაძახა მას “ქართული ოცნების” ერთ-ერთმა დეპუტატმა, რასაც უკვე ორივე მხარეს შორის, ფიზიკური დაპირისპირება და სხვადასხვა საგნების სროლა მოჰყვა.

დაპირისპირებული მხარეები _ “ნაციონალური მოძრაობის” და “ქართული ოცნების” წევრები, ერთმანეთს დიდხანს ურჩევდნენ საქმეს.

ბოლოს, პოლიცია გამოიძახეს და სხდომაზე შესვენება გამოცხადდა.

მიუხედავად იმისა, რომ საკრებულოს დღის წესრიგში მრავალი საკითხი იყო, რომელიც ძირითადად, დადგენილებების და განკარგულების მიღებას ეხებოდა, ვნებათაღელვა, ყვირილი და ჩხუბი მაინც “მერიის სამსახურების დებულებებსა და მერიის თანამდებობის პირთა და სხვა მოსამსახურეთა თანამდებობრივი სარგოების ოდენობების განსაზღვრისა და საშტატო ნუსხის დამტკიცების შესახებ”, საკითხს მოჰყვა.

სხდომაზე შემოსული იყვნენ მერიის თანამშრომლები, რომლებიც სამსახურიდან დასათხოვ სიაში, მათივე განმარტებით, პირადი მოტივაციით, პოლიტიკური ნიშნით მოხვდნენ.

გადაწყვეტილებას სამართლებრივად და პოლიტიკურად უსამართლო უწოდა დავით მჟავანაძემ:

_ კენჭისყრამდე უნდა ვთქვა, სანამ დებულებას კენჭს უყრით. მერე რად გინდათ შეკითხვა, სულ ხომ არ ვიჩხუბებთ? _ თქვა მჟავანაძემ.

მან ჯერ ფეისბუქსტატუსების ამონაწერი წარმოადგინა, სადაც უკრაინის შესახებ, კერძოდ, ზელენსკის მიმართ, მერიის თანამშრომლის თამარ ვანიძის შეურაცხმყოფელი პოსტები იყო:

_ მთავარი საქმის გამკეთებელი, ამ ეგრეთ წოდებული რეორგანიზაციისა, არის არჩილ ყაზაიშვილი (მისივე განმარტებით, ყაზაიშვილი კვლავ მერის თანაშემწედ არის გაფორმებული. ავტ.), რომელიც ნაჯახით ჩეხავს კანონმდებლობას. რეორგანიზაციის ყველა საქმის შემსრულებელი არის ყაზაიშვილი! მან ბიუჯეტს 20 მილიონი აზარალა, როცა ის ოზურგეთის გამგებლის მოვალეობას ასრულებდა 2017 წელს და ეს წერია აუდიტის დასკვნაში. რეორგანიზაციის სახელით ასრულებთ წმენდას, _ თქვა მჟავანაძემ. მას ყვირილით, ხმაშეწყობილად ჰყვებოდნენ “ქართული ოცნების” დეპუტატები.

_ რატომ აძლევთ თავს ამდენის უფლებას? ამდენი ადამიანის სახლში გაშვებას რატომ ბედავთ? თქვენი გგონიათ ეს შენობა?! _ იძახდა მჟავანაძე.

ჩხუბი და ყვირილი კვლავ გაგრძელდა.

_ თუ შეკითხვები გაქვთ, დასვით და არაა საჭირო მონოლოგი და მოხსენება, თუ რაცაა ეს, _ თქვა დავით დარჩიამ.

_ კი, დასვი კითხვა, მაგრამ პასუხი ხომ უნდა გაგცეს ვინმემ?! _ ყვიროდნენ ოპოზიციონერი დეპუტატები.

შემცირების, მობილობის პროცესის თაობაზე საკუთარი აზრის გამოთქმა ითხოვა გახარიას პარტია “საქართველოსთვის” წევრმა, დეპუტატმა ალეკო ბურჭულაძემ:

_ ამ სიაში არიან ადამიანები, რომლებთანაც წლობით ვმუშაობდით და ძნელია, ვინმემ ეჭვი შეიტანოს ამ ადამიანების პროფესიონალიზმში. მაინტერესებს, რომელი ერთი ვერ აკმაყოფილებს მოთხოვნებს? _ იკითხა მან.

_ თქვენ ხომ ხართ მაგარი პროფესიონალები! _ თქვა ნარი მუჯირმა.

_ თქვენს სინდისზე იყოს, როგორ დაუჭერთ მხარს რეორგანიზაციას და რეფორმას, ყველა მივიღებთ გადაწყვეტილებას. გამოჩნდება ეს აქ, _ სინდისზე მიანიშნა დავით დარჩიამ და დაამუნათა დეპუტატები.

_ მესამედ მივდივარ ამ სამსახურიდან. რა ვერ გავაკეთე? დათო, შენ ვერასდროს დაიცავი შენი აქტივისტები. დიპლომი არ მაქვს? სპეციალისტი არ ვარ კარგი? 2014 წელსაც გამიშვით, 2017 წელსაც. დაგავიწყდათ, 2012 წელს ერთად რომ ვათენებდით და ვაღამებდით? რატომ მათავისუფლებთ? მითხარით, რით მჯობიხართ? თქვენი ადგილი დავიკავე? თვალში ნაცარს რატომ გვაყრით? საჯარო მოხელეს კანონი იცავსო _ რატომ ვერ მიცავს კანონი? 2014 წელს, სიმსივნით დაავადებული დედა მყავდა სახლში _ რატომ გამიშვით მაშინ?! თქვენ ხომ კარგად ხართ მოწყობილი?! ბატონო დათო, იმაზე უარესი რა პოლიტიკური დანაშაული მაქვს ჩადენილი, რაც თქვენმა შვილმა სოციალურ ქსელში დაწერა? _ მიმართა საკრებულოს თავმჯდომარეს ნარი მუჯირმა.

_ დაბალი დონეა, _ ჩაილაპარაკა დარჩიამ.

როცა პასუხი ვერ მიიღო, ნარი მუჯირმა საკრებულოს წევრებს მიმართა:

_ რა გინდათ?! გინდათ, დაგიჩოქოთ? დაგიჩოქებთ, რა გინდათ?! _ კითხულობდა ის დაჟინებით, თუმცა, “ქართული ოცნების” დეპუტატები დუმდნენ.

შემდეგ სიტყვა ითხოვა იურისტმა კუკა ბარამიძემ, რომელმაც დეტალურად ისაუბრა რეორგანიზაციის შესახებ და ცდილობდა, იურისპრუდენციის ენაზე აეხსნა და დაერწმუნებინა “ქართული ოცნების” წევრები, რომ ეს გათავისუფლება სამართლებრივი აქტების დაცვით არ ხდება:

_ ჩვენ რასაც ვხედავთ, ეს არ არის რეორგანიზაცია. ეს არის კანონმდებლობის მორგება საკუთარ შეხედულებაზე, _ თქვა ბარამიძემ და ვრცლად ისაუბრა იმის შესახებ, რომ პირადი შეხედულებით ხდება ადამიანების გათავისუფლება და რომ ყველა მერი რეორგანიზაციას საკუთარი სურვილის მიხედვით ატარებს:

_ სამსახური მხოლოდ ხელფასი არ არის, ეს არის სოციალური სტატუსი. ერთხელ და სამუდამოდ, ერთმანეთს პატივი უნდა ვცეთ. კარგი მენეჯერი და კარგი მერი არსებული რესურსით განახორციელებს თავის მოვალეობას, ყველა პროექტს და სამუშაოს, _ თქვა მან და მოიყვანა არაერთი მაგალითი, როგორ იქცევიან მოწინავე ქვეყნებში ასეთ დროს.

საკრებულომ, რა თქმა უნდა, არც კუკა ბარამიძის მიმართვა გაითვალისწინა.

დეპუტატებს მიმართა ირინა ინარიძემ _ მან ისაუბრა კომპეტენციასა და პროფესიონალიზმზე. თქვა, რომ რეფორმის მომხრეა, თუმცა, ეს, რაც ახლა ხდება, რეორგანიზაცია არ არის.

 საკრებულოს წევრმა ნანა ღაჟონიამ სიტყვა ითხოვა და შეგონებით დაიწყო საუბარი. მრავალმნიშვნელოვნად იკითხა, რეორგანიზაცია სხვა მერების დროსაც ხომ მოხდაო?

_ ოჯახი არ არსებობს, სადაც კრიზისი არ არის. სადაც არ არის რეორგანიზაცია, იქ განვითარება არ არის! _ კვლავ შეგონება მოიშველია მან.

_ სრული დემაგოგიაა. რაღაცას ნორმალურს ამბობდა, მეგონა, _ თქვეს უკანა რიგებში მდგომმა, გასათავისუფლებელ სიაში შეტანილმა თანამშრომლებმა.

საბოლოოდ, არავინ შეისმინა იმ ადამიანთა თხოვნა, რომლებიც მერიიდან რეორგანიზაციის სახელით გაათავისუფლეს, გარდა “ნაციონალი” და გახარიას პარტიის წევრი დეპუტატებისა.

“რეფორმის სახელით ხდება წმენდა”, _ თქვეს დავით მჟავანაძემ და ბესო ქათამაძემ.

საკრებულოს სხდომაზე, ასევე, მიიღეს ოზურგეთის მუნიციპალიტეტში მეწარმეობის განვითარების ხელშეწყობის პროგრამის გახორციელების შესახებ დადგენილების პროექტი.

კენჭი უყარეს გენდერული თანასწორობის საბჭოს 2022 წლის სამოქმედო გეგმის დამტკიცებას.

საკრებულომ დაამტკიცა მერიის, მერიის სამსახურების დებულებებსა და მერიის თანამდებობის პირთა და სხვა მოსამსახურეთა თანამდებობრივი სარგოების ოდენობების განსაზღვრისა და საშტატო ნუსხის დამტკიცების შესახებ ნორმატიული აქტები.

საკრებულომ, ასევე, მხარი დაუჭირა საქართველოს სახელმწიფო ბიუჯეტით გათვალისწინებული საქართველოს რეგიონებში გასახორციელებელი პროექტების ფონდიდან სოფლის მხარდაჭერის პროგრამის ფარგლებში ოზურგეთის მუნიციპალიტეტში დასაფინანსებელი პროექტების დამტკიცების შესახებ” განკარგულების მიღებას.

სხდომის დასრულებისთანავე, “გურია ნიუსთან” კომენტარის გაკეთება ითხოვა პარტია “საქართველოსთვის” წევრმა, საკრებულოს დეპუტატმა ალეკო ბურჭულაძემ:

“იმ შემთხვევაში, თუ კომპლექსურად შევხედავთ არსებულ სტრუქტურას, საშტატო განრიგსა და დებულების პროექტს, ასევე, არსებულ ინფორმაციას გასაუქმებელი საშტატო ერთეულების ფუნქციურ დატვირთვაზე, გადაჭრით შეგვიძლია ვთქვათ, რომ მიმდინარე რეორგანიზაცია არ ემსახურება მერიის, როგორც ადმინისტრაციული ორგანოს, სტრუქტურულ და ფუნქციურ გაჯანსაღებას. ამასთან, აღნიშნული პროცესის დასახელებული საფუძველი, კერძოდ _ სწრაფი და ეფექტური მომსახურების მიზნის მიღწევა, ვერ უძლებს კრიტიკას. სრულიად საპირისპიროდ, არსებობს დასაბუთებული ვარაუდი, რომ აღნიშნული პროცესის უკან სწორედ კონკრეტული პირების მიმართ დევნისა თუ ანგარიშსწორების მიზანი დგას. საკრებულოს სხდომაზე უკვე გავაჟღერე რამდენიმე პიროვნების სახელი და გვარი და მათი გათავისუფლების რეალური მიზეზები. მსურს კიდევ ერთხელ ხაზი გავუსვა, რომ ადამიანები, ვისაც ე.წ “რეორგანიზაციის” პროცესი ეხება, არიან საკუთარი საქმის პროფესიონალები და გამოირჩევიან მაღალი პასუხისმგებლობით. აქვე დავძენ, რომ მე ვიზიარებ მოსაზრებას მცირე და მოქნილი ადმინისტრაციის შესახებ, თუმცა, ეს უნდა გახორციელდეს სამართლიანად და მიუკერძოებლად, პოლიტიკური მოტივებისგან სრულიად დაცლილად. გარდა ამისა, პასუხისმგებელ პირებს მართებთ იმ ფაქტის გააზრება, რომ ყოველი თანამშრომლის უკან დგას მისი ოჯახი. ამის ნათელი მაგალითია ერთ-ერთი ქალბატონის ემოციური, მეტიც, სასოწარკვეთილი გამოსვლა საკრებულოს სხდომაზე, რომელიც დეპუტატებს სრულიად საჯაროდ გვთხოვდა, მხარი არ დაგვეჭირა რეორგანიზაციის პროცესისთვის, ვინაიდან მისთვის და მისი შვილებისთვის ეს სავალალო შედეგების მომტანი იქნებოდა. მოხელისთვის საჯარო დაწესებულებაში საქმიანობა თვითრეალიზაციის შესაძლებლობის გარდა, მნიშვნელოვანი სოციალური დატვირთვის მატარებელია. იმ შემთხვევაში, თუ ვიზიარებთ ამ კონცეფციას, უნდა შევძლოთ იმ შედეგების გათვლა, რაც შეიძლება მოყვეს შტატების შემცირების პროცესს. იმისთვის, რომ ეს ღონისძიება ყველასთვის მაქსიმალურად უმტკივნეულო და არასაზიანო იყოს, აუცილებელია შესაბამისი ქმედითი ნაბიჯების გადადგმა. ხელაღებით ადამიანების სამსახურიდან გათავისუფლება, განსაკუთრებით, როდესაც ამას პოლიტიკური ელფერი დაჰყვება, ვერც ერთ შემთხვევაში იქნება კანონიერი და სამართლიანი”, _ თქვა ბურჭულაძემ.