გუშინ ცნობილი გახდა, რომ საქართველოს ნაკრებისა და „გენტის“ ფეხბურთელი გიორგი ჩაკვეტაძე კარიერას საფრანგეთის „ლიგა 1“-ის „მეცში“ გააგრძელებს.
ქართველი ფეხბურთელი „გენტიდან“ „მეცს“ იჯარის წესით შეუერთდება, სადაც მომავალი სეზონის ბოლომდე დარჩება.
23 წლის ფეხბურთელმა გასული სეზონი „სლოვანში“ ჯაბა კანკავასთან და გურამ კაშიასთან ერთად გაატარა, სადაც სლოვაკეთის ჩემპიონი გახდა. მან ყველა ტურნირის ჩათვლით 47 შეხვედრაში მიიღო მონაწილეობა და 1 გოლთან ერთად 9 საგოლე პასი მიითვალა. ჩაკვეტაძეს „სლოვანთან“ საიჯარო ხელშეკრულება 30 ივნისს ამოეწურა.
„მეცში“, ჯერჯერობით, ირიცხება გიორგი მიქაუტაძე და სწორედ მისი დამსახურებაა, რომ გუნდი „ლიგა 1“-ში აღზევდა. დიდი ალბათობით, ქართველი შემტევი შესანიშნავი სეზონის შემდეგ კლუბს დატოვებს და კარიერას რომელიმე ცნობილ გუნდში გააგრძელებს.
ჯერჯერობით გაურკვევლობაა გიორგი მამარდაშვილის შესახებ. გასული სეზონის დასრულებამდე უკვე ცნობილი იყო, რომ გიორგი „ვალენსიას“ დატოვებდა და უფრო მაღალი ამბიციის მქონდე გუნდში გადაბარგდებოდა. 22 წლის ქართველ მეკარეს სხვადასხვა ცნობილ კლუბს უკავშირებენ, ერთ-ერთი ასეთი კი მიუნხენის „ბაიერნია“.
გერმანულ გუნდს მთავარი მეკარე, მანუელ ნოიერი უბრუნდება. შესაბამისად, კლუბიდან წასვლაზე იან ზომერი და ალექს ნუბელი ფიქრობენ – მიზეზი კი არის ის, რომ ორივეს რომელიმე კარგ გუნდში პირველ მეკარედ ყოფნა სურს.
გუშინ, მიუნხენელთა მეკარის საკითხზე გერმანულმა გამოცემამ „Bild“ დაწერა და აღნიშნა, რომ „ბაიერნს“ შემადგენლობაში ძალიან ბევრი მეკარე ჰყავს. ამ ეტაპზე კლუბის განკარგულებაში 5 მეკარეა – მანუელ ნოიერი, იან ზომერი, სვენ ულრაიხი, ალექს ნუბელი და იოჰანეს შენკი.
„Bild“ აღნიშნავს, რომ გიორგი მამარდაშვილს შეიძლება შანსის მისაღებად დიდი ხანი მოცდა მოუწიოს.
„კიდევ არის მეექვსე მეკარე: გიორგი მამარდაშვილი, „ვალენსიის“ ძალიან ნიჭიერი კარის დარაჯი. „ბაიერნი“ ქართველს აკვირდება და მომავალში მას ნოიერის პოტენციურ მემკვიდრედ ხედავს. მიუხედავად ამისა, მას „ვალენსიასთან“ კონტრაქტი 2027 წლამდე აკავშირებს და მისი გამოსყიდვა ძვირი იქნება. მნიშვნელოვანია ასევე ისიც, მოუწევს თუ არა ნუბელის და დანარჩენების მსგავსად მასაც დიდი ხანი მოცდა, სანამ თავის შანსს არ მიიღებს“.
„ნაპოლი“ კი მიონხენგლადბახის „ბორუსიას“ იაპონელი მცველის, კო იტაკურას გაფორმებასთან ახლოსაა.
26 წლის ფეხბურთელის გამოსასყიდი თანხა 15 მილიონი ევროა, მაგრამ ნეაპოლელებს მისი შეძენა 12 მილიონად სურთ. კიმ მინ-ჯეს მიუნხენის „ბაიერნში“ გადასვლას მხოლოდ გაოფიციალურება აკლია. კიმი კვარაცხელიასთან და ოსიმენთან ერთად სკუდეტოს მოპოვების ერთ-ერთი მთავარი შემოქმედი იყო.
საინტერესოა, რომ „ნაპოლი“ აზიელი სხვა ფეხბურთელებითაცაა დაინტერესებული. აურელიო დე ლაურენტისს „სტადიო მარადონაზე“ ტაკეფუსა კუბოსა და დაიჩი კამადას გადაბირებაც სურს.
იტაკურას „ბორუსიას“ შემადგენლობაში დიდი გამოცდილება დაუგროვდა და იაპონიის ნაკრების მაისურიც 20-ჯერ მოირგო. მისი დამატება კი „ნაპოლის” ბევრად იაფი დაუჯდება ვიდრე იმ ფეხბურთელების, რომლებსაც აკვირდება – მაგალითად, ბრიტანული „ვულვზის“ მაქს კილმანის ან ესპანური „რეალ სოსიედადის“ რობინ ლე ნორმანდის.
ცნობილი გახდა, რომ ინგლისური „კრისტალ პალასის“ კოტდივუარელმა მოთამაშემ, უილფრიდ ზაჰამ საუდის არაბეთის კლუბის, „ალ-ნასრის“ წინადადებაზე უარი თქვა და „ნაპოლის“ შეთავაზებას განიხილავს.
იტალიური კლუბის გარდა, 30 წლის ფეხბურთელის წარმომადგენელთან მოლაპარაკებები „პარი სენ-ჟერმენსა“ და „გალათასარაისაც“ ჰქონდათ. აღსანიშნავია ასევე ისიც, რომ კოტდივუარელმა „ალ-ნასრის“ გარდა, შეთავაზებები მიიღო „ლაციოსგან“ და „ფენერბახჩესგანაც“.
ბრიტანული მედიის მტკიცებით, ზაჰა, დიდი ალბათობით, საუდის არაბეთის გუნდის წინადადებას არ დათანხმდება და მიუხედავად იმისა, რომ „ნაპოლიში“ და „გალათასარაიში“ გაცილებით ნაკლებ ხელფასს სთავაზობენ, ვიდრე „კრისტალ პალასში“, ის შესაძლოა, რომელიმე ამ გუნდში ვიხილოთ.
იტალიური „ფროზინონეს“ პრეზიდენტმა მაურიციო სტირპემ კი სეზონის სტარტზე და გუნდის ახალწვეულ გიორგი კვერნაძეზე კომენტარი იტალიურ მედიასთან გააკეთა.
„გვეშინია თუ არა პირველივე მატჩში „ნაპოლისთან“ დაპირისპირების? „სერია A“ რთულია და შიშის უფლება არ გვაქვს. როგორც „ნაპოლისთან“ შეხვერისას ასევე მეორე ტურში „ატალანტას“ მასპინძლობისას.
კვერნაძე ისეთივეა, როგორც კვარაცხელია? კვერნაძეს რამდენიმე თვე ვაკვირდებოდით, მხოლოდ „სერია A“-ში გადასვლის შემთხვევაში შეგვეძლო მისი გუნდში აყვანა და ეს გავაკეთეთ. ჩვენ იმედი გვაქვს, ის მეტოქეთათვის სასიკვდილო იარაღი იქნება“.
ავტორი
