გუშინ გერმანულმა გამოცემამ „Bild“ საქართველოს ნაკრებისა და „ჰამბურგის“ მოთამაშე გიორგი ჩაკვეტაძე შეაქო და უახლოეს მომავალში კლუბის ძირითადი შემადგენლობის წამყვანი ფეხბურთელობა უწინასწარმეტყველა.
„გენტიდან“ იჯარით დამატებული ქართველი „ჰამბურგში“ სულ უფრო და უფრო უმატებს. დარმშტადტში 12 და „ჰაიდენჰაიმთან“ 24 წუთის შემდეგ ჩაკვეტაძეს „ზანდჰაუზენთან“ სრული ტაიმის ჩატარების უფლება მიეცა. გიორგი შეტევაში სწორ გადაწყვეტილებებს იღებდა. ხედავთ, რომ ის სულ უფრო და უფრო დგება ფორმაში და ძლიერდება. მას ყოველთვის შეუძლია მეტოქის კართან რაღაც ხიფათის შექმნა. მომავალ კვირას, ბრემენის „ვერდერთან მატჩში ჩაკვეტაძე ძირითად შემადგენლობაში იქნება და შეხვედრას პირველი წუთიდან დაიწყებს“.
„ჰამბურგი“ 23 ტურის შემდეგ მეორე ბუნდესლიგაში 41 ქულით მეორე-მეოთხე ადგილებს „ზანკტ პაულისთან“ და „დარმშტადტთან“ ერთად იყოფს, ხოლო ლიდერ „ვერდერს“ ერთადერთი ქულით ჩამორჩება.
ქართველი ჩოგბურთელი ნიკოლოზ ბასილაშვილი ATP-ის განახლებულ რეიტინგში დაწინაურდა და 22-ე პოზიციიდან მე-19 საფეხურზე გადაინაცვლა.
დოჰას ტურნირის ფინალში თამაშის შემდეგ ქართველის აქტივში ამჟამად 2 156 ქულაა. ბასილაშვილის კარიერაში საუკეთესო შედეგი მე-16 ადგილი იყო.
ამჟამად ბასილაშვილი დუბაის ტურნირისთვის ემზადება, რომლის პირველ წრეში 22 თებერვალს კანადელ ფელიქს ოჟიე-ალიასიმს უნდა დაპირისპირებოდა მაგრამ გუშინ სათამაშო ბადე საკმაოდ გაუმარტივდა.
ოჟიე-ალიასიმმა დუბაიში ჩასვლაზე უარი განაცხადა და დასვენება გადაწყვიტა. შესაბამისად, ჩვენებურის მეტოქე კვალიფიკაციის იღბლიანი დამარცხებული იქნება. ის კი მსოფლიოს 66-ე ნომერი ავსტრალიელი ალექს პოპირინია, რომელიც ძალიან ცუდ სეზონს ატარებს. თუ ყველაფერი კარგად წავიდა, ბასილაშვილი 1/8-ფინალში გერმანელ შტრუფსა და ლიეტუველ რიკარდას ბერანკისს შორის უკეთესს დაუპირისპირდება. ამ ორივე ჩოგბურთელთანაც ის უდავო ფავორიტი იქნება. 1/4-ფინალში კი ნიკას უკვე გაცილებით რთული მეტოქე ეყოლება. ის პოლონელი ჰუბერტ ჰურკაცი ან კანადელი დენის შაპოვალოვი შეიძლება იყოს.
ესპანურმა „ვალენსიამ“ კი ესპანეთის ლა ლიგის 25-ე ტურში შინ „ბარსელონასთან“ 1:4 წააგო, გიორგი მამარდაშვილმა შეუცვლელად ითამაშა.
ქართველმა მეკარემ ოთხი გოლი გაუშვა, მაგრამ ძნელია, რომელიმე მას დააბრალო. განსაკუთრებით, პირველ ნახევარში გაშვებული სამი გოლი. გიორგის პიერ-ემერიკ ობამეიანგმა ჯერ პირისპირ აჯობა, თანაც აუღებელი დაურტყა, მერე ფრენკი დე იონგმა და იმავე ობამეიანგმა ერთნაირი გოლები შეაგდეს, ძალიან ახლო მანძილიდან. „ვალენსიას“ დაცვის ხაზი კრიტიკას ვერ უძლებდა. მეორე ნახევარში გიორგის 25 მეტრიდან პედრიმ აჯობა, თუმცა ხელი რიკოშეტმაც შეუშალა, რადგან ბურთი ობამეიანგს მოხვდა და კარში ჩაეშვა.
მამარდაშვილმა ორჯერ შეასრულა სეივი. ჯერ 46-ე წუთზე გავის შორეული დარტყმა მოიგერია და მერე 79-ე წუთზე ობამეიანგს აჯობა.
შეხვედრის დასრულების შემდეგ „ვალენსიას“ მთავარმა მწვრთნელმა ხოსე ბორდალასმა კომენტარი გააკეთა. აღსანიშნავია რომ მას ამჯერად გიორგი მამარდაშვილი საერთოდ არ უხსენებია.
„ამჟამად სატურნირო ცხრილის ზედა ნაწილში მყოფ გუნდებს ვერ შევედრებით, ეს არის ჩვენი რეალობა. წარსულში ვერ გავიხედებით, რადგან ახლა არ გვაქვს წამყვანი გუნდების პოტენციალი. რა თქმა უნდა, იმედგაცრუებული ვარ, ძალიან გაბრაზებულიც. ვალენსიაში რომ ჩამოვედი, სხვა ამბიცია მქონდა და იმედგაცრუებული ვარ. ეს არ არის ის, რაც მე მინდა. დაცვით პრობლემებზე ვმუშაობთ, განსაკუთრებით ამ კვირაში, რადგან „ბარსას“ პოტენციალი ვიცოდით. მინდა ბოდიში მოვუხადო გულშემატკივრებს, ისინი არ იმსახურებენ იმ იმიჯს, რაც „ბარსელონასთან“ ვაჩვენეთ, მაგრამ მათი პოტენციალის წინააღმდეგ უძლურები ვიყავით“.
გუშინ ბრიტანულ მედიაში გავრცელდა ცნობა რომ „ტოტენჰემისა“ და ინგლისის ნაკრების თავდამსხმელი ჰარი კეინი მომავალთან დაკავშირებით გადაწყვეტილების მიღებას არ ჩქარობს. კეინმა კლუბთან კონტრაქტის განახლებაზე მოლაპარაკებები შეაჩერა, რადგან სურს, რომ გუნდის პერსპექტივები სეზონის ბოლოს შეაფასოს და საბოლოო გადაწყვეტილება შემდეგ მიიღოს.
კეინს გასულ ზაფხულს „მანჩესტერ სიტიში“ გადასვლა უნდოდა და გარკვეული დროის განმავლობაში „ტოტენჰემში“ ვარჯიშზეც კი უარს ამბობდა, თუმცა, ლონდონურმა გუნდმა ის მაინც არ გაყიდა.
გუშინ ბრიტანულმა გამოცემამ „The Sun“ გაავრცელა ცნობა რომ იმ შემთხვევაში, თუ „მანჩესტერ იუნაიტედი“ ჩემპიონთა ლიგის საგზურს ვერ მოიპოვებს, პორტუგალიელი კრიშტიანო რონალდო მიმდინარე წლის ზაფხულში კლუბს დატოვებს. მეტიც: გამოცემის მტკიცებით, მანჩესტერში მზად არიან, კრიშტიანო დათმონ, რადგან კლუბში იმ დასკვნამდე მივიდნენ, რომ რონალდოს დაბრუნება არასწორი გადაწყვეტილება იყო.
რამდენიმე დღის წინ ბრიტანული მასმედია ამტკიცებდა, რომ რონალდოს მიმართ ინტერესს „პარი სენ-ჟერმენი“, „რომა“ და მიუნხენის „ბაიერნი“ იჩენენ. გერმანულმა მედიამ ეს „ნიუსი“ მიუნჰენური გუნდის ხელმძღვანელობასთან გადაამოწმა და აღმოჩნდა რომ კრიშტიანოზე არათუ არ ფიქრობენ, არამედ ინგლისელთა „ვარაუდზე“ ბევრი იცინეს კიდეც.
[sexy_author_bio]
