მიმდინარე წლის 26 ივლისის შემდეგ ბელგიის „ჟუპილერ ლიგის“ პირველობაზე, „გენტის“ ძირითად შემადგენლობაში პირველად ვიხილეთ საქართველოს ეროვნული გუნდის მოთამაშე გიორგი ჩაკვეტაძე. „გენტი“ ბრიუსელში „ანდერლეხტს“ დაუპირისპირდა. შეხვედრა ფრედ – 1:1 დასრულდა.
ჩაკვეტაძე აქტიური იყო, 28-ე წუთზე მეტოქე გუნდის მცველ მურილიოს ადვილად გასცდა და მეურვემ წესების დარღვევით შეაჩერა, რისთვისაც ყვითელი ბარათი მიიღო. გიორგი 66-ე წუთზე თავდამსხმელმა ტისუდალიმ შეცვალა.
დღეს ესპანეთის საფეხბურთო პირველობაზე გიორგი მამარდაშვილის „ვალენსია“ ბილბაოს „ატლეტიკს“ უმასპინძლებს და ქართველი კარის დარაჯი შეხვედრას თვალს ალბათ სათადარიგოთა სკამიდან მიადევნებს.
გუშინ „ვალენსიას“ მთავარმა მწვრთნელმა ხოსე ბორდალასმა პრესკონფერენცია ჩაატარა და განაცხადა რომ მამარდაშვილს დიდი ალბათობით ნიდერლანდელი იასპერ სილესენი შეცვლის.
ამასობაში ესპანურმა გამოცემამ „Deportevalensiano” 20 წლის ქართველს რამდენიმე ტკბილი სიტყვა მიუძღვნა:
„სოციალური ქსელები აივსო შეფასებებით და მოთხოვნებით, რომ კარში დაუყოვნებლივ სილესენი დადგეს. ეს ისეთივე დაჟინებით ხდებოდა, როგორითაც ერთი თვის წინ ითხოვდნენ ნიდერლანდელის გუნდიდან გაშვებას.
ქართველი კი 20 წლისაა, სწავლობს… დიახ, სწავლობს, რადგან ამ ასაკში მეკარე სულ ვარჯიშშია. იდეა, რომ ის ითამაშებდა „მესტალიაზე“, მთლად გიჟური არ იყო, მაგრამ ყველაფერი, რაც ზაფხულში მოხდა, მოვლენებს აჩქარებდა.
რა თქმა უნდა, გიორგიმ შეცდომებიც დაუშვა და მშვენიერი ნახტომებიც გააკეთა. 6 თამაშში ჩვენ გვქონდა ყველაფერი, მაგრამ, როცა ამ ფსონებს დებთ, უნდა იცოდეთ, რომ რაღაცეები შეიძლება მოხდეს, რადგან, თუკი ერთ დღეს მამარდაშვილი დიდი მეკარე გახდება, ის, ალბათ, შეძლებს ამ რყევების დაძლევას“.
გუშინ რუსულ მასმედიაში ერთი საყურადღებო ინფორმაცია გავრცელდა. აღმოჩნდა რომ ერთ დროს ჯანო ანანიძეს შეძენა თავად „მანჩესტერ სიტის“ სურდა.
ცნობილმა საფეხბურთო აგენტმა ალან პრუდნიკოვმა „Sport24“-თან ინტერვიუში ჯანო ანანიძის კარიერა გაიხსენა. რუსმა მედიასთან საუბარში განაცხადა, რომ ერთ დროს ქართველი ნახევარმცველით „მანჩესტერ სიტი“ ინტერესდებოდა.
„ჯანოს 14 წლიდან ვაკვირდებოდი. ის არანორმალურად ნიჭიერი ბავშვი იყო. მისი ყიდვა „მანჩესტერ სიტის“ მაშინ სურდა, როდესაც „სპარტაკში“ საუკეთესო წლები ჰქონდა, მანამ, სანამ ტრავმები შეაწუხებდა. იმ პერიოდში მოსკოვური გუნდის ხელმძღვანელობა ახალგაზრდა ფეხბურთელის გაყიდვას არ განიხილავდა”.
ზემოთ მოყვანილი „ნიუსის“ წაკითხვის შემდეგ ალბათ ხვიჩა კვარაცხელიაზე იფიქრებთ. ჯანო ანანიძეს კარიერის განმავლობაში მოსკოვის “სპარტაკზე“ უფრო სახელოვან და ძლიერ გუნდებში უნდა ეთამაშა, მაგრამ საფეხბურთო ფუნქციონერების უთავბოლოების მსხვერპლი შეიქმნა. იმედია ხვიჩა ჯანოს გზას არ გაივლის, რუსეთის პრემიერ ლიგას მალე გაცილდება და კარიერას ნორმალურ ევროპულ კლუბში გააგრძელებს.
კატალონიურ „ბარსელონაში“ ტიერი ანრიზე დაფიქრდნენ.
გამოცემა „Mundo Deportivo“-ს ცნობით, ბარსელონაში სურთ მთავარი მწვრთნელის თანამდებობა გუნდის ერთ-ერთ ყოფილ ფეხბურთელს ჩააბარონ. ანრის კანდიდატურის გააქტიურებაც სწორედ ამას უკავშირდება.
გამორიცხული არც ისაა, ტიერი „ბარსელონაშიც“ მწვრთნელის ასისტენტი გახდეს, თუკი ესპანური გრანდი სადავეებს ბელგიის ნაკრების თავკაც რობერტო მარტინესს ჩააბარებს.
44 წლის ტიერი ანრი კატალონიური გუნდის ღირსებას 2007-10 წლებში იცავდა და „ლა ლიგის“ 80 მატჩში 35 გოლის გატანა მოახერხა. მას კარიერის განმავლობაში „მონაკოს“, „არსენალის“, „იუვენტუსისა“ და „ნიუ იორკ რედ ბულსის“ მაისურითაც უთამაშია, საფრანგეთის ნაკრებში კი 123 მატჩში 51 გოლი აქვს. მწვრთნელის რანგში ანრის „მონაკოსა“ და კანადურ „მონრეალში“ უმუშავია.
„პარი სენ ჟერმენის“ მეკარე ჯანლუიჯი დონარუმა პარიზულ გუნდში ყოფნით უკმაყოფილოა და მომავალი წლის ზაფხულში კლუბის დატოვებას ეცდება.
დონარუმა კეილორ ნავასთან კონკურენციას ელოდა, მაგრამ მიმდინარე სეზონში მხოლოდ ორი მატჩი ჩაატარა. იტალიური სპორტული მასმედიის მტკიცებით, „პსჟ“-ს სამხრეთამერიკელ ფეხბურთელებს, მათ შორის, ლიონელ მესის, კეილორ ნავასი ურჩევნიათ და ეს მაურისიო პოჩეტინოს გადაწყვეტილებაზე გავლენას ახდენს.
„ევრო 2020“-ის საუკეთესო ფეხბურთელი „პსჟ“-ს თავისუფალი აგენტის სტატუსით შეუერთდა და კონტრაქტი 2026 წლამდე გააფორმა. აღსანიშნავია, რომ ნავასის კონტრაქტი ძალაში 2024 წლამდეა, ამიტომაც, დონარუმასთვის ეს დამატებითი მიზეზია, რომ კლუბის დატოვებაზე იფიქროს.
[sexy_author_bio]
