ორი დღის წინ, უკრაინის პირველობის მორიგ შეხვედრაში, ლვოვის „რუხის“ წინააღმდეგ დონეცკის „შახტარის“ ძირითად შემადგენლობაში ახალგაზრდა ქართველმა მცველმა გიორგი გოჩოლეიშვილმა პირველად ითამაშა.
მატჩის შემდეგ დონეცკური კლუბის მთავარმა მწვრთნელმა იგორ იოვიჩევიცმა ქართველი მოთამაშის შესახებ შემდეგი განცხადება გააკეთა:
„ჩვენ თავიდანვე გვსურდა, რომ ამ შეხვედრას ისე მივსდგომოდით, რომ ახალ ფეხბურთელებს უკრაინის პრემიერლიგის რითმი და ტემპი შეეგრძნოთ, რათა მომავალში უფრო მოტივირებულები გამხდარიყვნენ ისინი. გიორგი გოჩოლეიშვილი ტიპიური ლატერალია, რომელსაც კარგი ფიზიკური შესაძლებლობები აქვს. მასსა და კონოპლიას შორის კარგი კონკურენციაა და ვნახოთ რა მოხდება. მნიშვნელოვანია, რომ ყველა მზად იყოს“.
ქართველი ფეხბურთელი პირველი ტაიმის შემდეგ იუხიმ კონოპლიამ შეცვალა, როდესაც „შახტარი“ 2:0 იგებდა. საბოლოოდ, მატჩი სწორედ ამ ანგარიშით დასრულდა.
გიორგი გოჩოლეიშვილმა უკრაინულ გუნდთან ხელშეკრულება 2023 წლის პირველი იანვრიდან გააფორმა. ახალ გუნდში ეს მისი მეორე თამაში იყო. საქართველოს ნაკრების მთავარმა მწვრთნელმა, ვილი სანიოლმა ის მოახლოებული მატჩებისთვის ეროვნულ გუნდში გამოიძახა.
იტალიური გამოცემა „Calciomercato“-ს მტკიცებით, ლონდონის „ჩელსი“ მომავალი სეზონისთვის გუნდის დაკომპლექტებას უკვე შეუდგა და „ნაპოლის“ შემტევი ვიქტორ ოსიმენის გადაბირება სურს.
„ჩელსის“ სურვილია რომ ნიგერიელი თავდამსხმელი ამერიკელ ფეხბურთელში, კრისტიან პულიშიჩში გაცვალოს და თუ საჭირო გახდება, თანხაც დაამატოს. საინტერესოა, რომ მიმდინარე სეზონში ამერიკელ ფეხბურთელს „ჩელსიში“ სათამაშო დრო თითქმის საერთოდ არ ეძლევა, ნიგერიელი კი შესანიშნავ სეზონს ატარებს და „სერია A“-ს ბომბარდირია.
გუშინ, ოსიმენი – კვარაცხელიას დუეტზე ესპანურმა გამოცემამ „Fichajes“ საინტერესო წერილი გამოაქვეყნა.
„ხვიჩა კვარაცხელიას და ვიქტორ ოსიმენს ნეაპოლური გუნდი მოულოდნელ სიმაღლეზე აჰყავთ. გუნდი ერთ ნაბიჯშია 33 წლის შემდეგ პირველი სკუდეტოს მოპოვებასთან.
საიმონი და გარფანკელი, ჯონ ლენონი და პოლ მაკკარტნი, კობი ბრაიანტი და შაკილ ო’ნილი, ახლა კი ხვიჩა კვარაცხელია და ვიქტორ ოსიმენი. ჩვენ ვსაუბრობთ სპორტისა თუ მუსიკის ისეთ წყვილებზე, რომელთაც ორივე სფეროში დიდი სახელები დატოვეს.
ნიგერიელისა და ქართველის წყვილმა ნამდვილი ქარბორბალა დაატრიალა ამ სეზონში. 5000 კილომეტრიანი დაშორება, რომელიც ნეაპოლმა მხოლოდ რამდენიმე მეტრამდე შეამცირა. ისინი ატარებენ სეზონს, რომლის მიზანიც სამხრეთ იტალიის ისტორიის დაწერაა.
კომბინირებული 39 გოლითა და 21 ასისტით აფრო-ევროპული წყვილი ძველ კონტინენტზე ერთ-ერთ ყველაზე საშიშად გამოიყურება. მას შემდეგ, რაც „სერია A“-ში გუნდი სწორ გზას ადგას, ნეაპოლელების სურვილი ჩემპიონთა ლიგაა.
იმ 32 გოლით, რომელიც ორივემ ერთად სერია A-ში გაიტანა, 12 გუნდს უსწრებს ეს წყვილი. ეს ადასტურებს მათ დომინირებას შიდა ჩემპიონატში. მარადონას, კარეკასა და ალემაოსგან შემდგარი ტრიოს შემდეგ, „ნაპოლი“ კვლავ იღიმება კვარაცხელიასა და ოსიმენის დუეტთან ერთად ოცნებას განაგრძობს,“ – დაწერა ესპანურმა გამოცემამ.
გუშინ გამოცემამ „Football Insider“ ხვიჩა კვარაცხელია ინგლისურ „ნიუკასლს“ დაუკავშირა. აღმოჩნდა, რომ თემურ ქეცბაიას ყოფილი გუნდი მიმდინარე წლის ზაფხულში 22 წლის ქართველის შეძენას ეცდება, მაგრამ მხოლოდ იმ შემთხვევაში, თუ „ნიუკასლი“ ჩემპიონთა ლიგის საგზურს მოიპოვებს.
იტალიური გამოცემა „Corriere Dello Sport“ კი ფრანგულ მედიაზე დაყრდნობით სენსაციურ ინფორმაციას ავრცელებს – შესაძლოა, „პარი სენ-ჟერმენმა“ ხვიჩა კვარაცხელიას ხელში ჩასაგდებად 180 მილიონი ევრო გადაიხადოს.
„ფრანგული ვებგვერდის თანახმად, შესაძლოა „პარი სენ-ჟერმენმა“ ქართველი სატრანსფერო სამიზნედ გაიხადოს, ხოლო იმისთვის, რათა „ნაპოლის“ მოთხოვნები დააკმაყოფილოს, ფრანგულ კლუბს წარმოუდგენლად დიდი თანხის – 180 მილიონი ევროს გადახდა მოუხდეს.
ასეთი გარიგების შემთხვევაში, ნეაპოლის კლუბი ფეხბურთის ისტორიაში ერთ-ერთი ყველაზე სარფიანი ტრანსფერის შემოქმედი იქნება, იმის გათვალისწინებით, რომ კვარაცხელია „ნაპოლიში“ ერთი წლის წინ დაახლოებით 10 მილიონი ევროს სანაცვლოდ გადავიდა.
ქართველი ფეხბურთელის მიმართ ინტერესს სხვა ევროპული გრანდებიც იჩენენ,” – დაწერა გამოცემამ „Corriere Dello Sport“.
ავტორი
