მიმდინარე სეზონის დასრულების შემდეგ საქართველოს ეროვნული გუნდისა და ესპანური „ვალენსიას“ კარის დარაჯი გიორგი მამარდაშვილი კარიერას ახალ გუნდში გააგრძელებს. უცხოურ სპორტულ მედიაში გიორგის სახელს არაერთ ცნობილ კლუბს უკავშირებენ.
გუშინ მამარდაშვილის შესახებ ერთდროულად ორი საინტერესო ინფორმაცია გავრცელდა.
თავდაპირველად ბრიტანულმა გამოცემამ „London Evening Standard“ მამარდაშვილი ლონდონის „ჩელსის“ დაუკავშირა. ლონდონელებისთვის ამ ეტაპზე პრიორიტეტი „ინტერის“ კამერუნელი მეკარე, ანდრე ონანაა, მაგრამ მეორე ვარიანტად გიორგი მამარდაშვილს განიხილავენ.
„ქართველ მეკარეს შესანიშნავი სეზონი ჰქონდა და თავის გუნდს დაეხმარა, რომ მეორე ლიგაში არ დაქვეითებულიყო. ის ჩემპიონთა ლიგის დონის მეკარეა და მზადაა 2 წლის შემდეგ „ვალენსიიდან“ წამოსასვლელად. ის იაფი არ ეღირება, მაგრამ ონანასა და მენიოს მსგავსად კარგია და შესაძლოა, მისმა კლუბმა თანხა უფრო დააკლოს. ყველაფერი ეს დამოკიდებული იქნება იმაზე, შეძლებენ თუ არა მენდის მსურველის მოძებნას“, – დაწერა გამოცემამ.
გუშინვე, გამოცემამ „Tuttosport“ გაავრცელა ინფორმაცია, რომ ქართველი მეკარით ჩემპიონთა ლიგის ფინალისტი, მილანის „ინტერია“ დაინტერესებული და შესაძლოა, ინძაგის გუნდმა, ანდრე ონანას გაყიდვის შემთხვევაში, ეს ადგილი გიორგი მამარდაშვილით შეავსოს.
„ინტერს“ ონანას გაყიდვა არ სურს, მაგრამ იმ შემთხვევაში, თუ მილანურ კლუბს მის სანაცვლოდ 60 მილიონ ევროს შესთავაზებენ, უარის თქმა რთული იქნება. კამერუნელი მეკარის სავარაუდო შემცვლელად კი, იტალიური კლუბი ორ ვარიანტს განიხილავს, ერთი „ემპოლის“ კარის დარაჯი გულიელმო ვიკარიოა, მეორე კი გიორგი მამარდაშვილი.
გუშინ ცნობილი გახდა, რომ საფრანგეთის საფეხბურთო ჩემპიონატის სადისციპლინო კომიტეტმა „ბორდო“ – „როდეზის“ მატჩზე მომხდარ ინციდენტთან დაკავშირებით საბოლოო ვერდიქტი გამოაცხადა, რომლის მიხედვითაც, ზურიკო დავითაშვილის გუნდს შეხვედრის გაგრძელებასა თუ გადათამაშებაზე უარი ეთქვა.
გადაწყვეტილების თანახმად, „ბორდოს“ „როდეზთან“ ტექნიკური წაგება ჩაეთვალა. გარდა ამისა, „ბორდო“ მომავალ სეზონში ასპარეზობას -1 ქულით დაიწყებს. ასე რომ, გიორგი მიქაუტაძის „მეცი“ მომავალ სეზონში საფრანგეთის პირველობის უმაღლეს დივიზიონში იასპარეზებს.
გუშინ, საქართველოს კალათბურთის ფედერაციამ 2023 წლის მსოფლიოს ჩემპიონატისთვის მოსამზადებელი გეგმა წარმოადგინა და ცნობილი გახდა რომ ეროვნული გუნდი შვიდ საკონტროლო მატჩს ჩაატარებს.
საქართველოს ნაკრები ვარჯიშებს თბილისში 5-12 ივლისს დაიწყებს, 18-20 ივლისს კალათბურთელები სამედიცინო შემოწმებას გაივლიან, 21-28 ივლისს კი, იტალიის ქალაქ ტრევიზოში პირველი შეკრებაა დაგეგმილი.
ტრევიზოში, 29 ივლისს, საქართველოს ნაკრები ამხანაგურ მატჩში ეგვიპტეს დაუპირისპირდება, 1 აგვისტოს კაუნასში, ლიეტუვასთან თამაშია, 5 აგვისტოს კი, რიგაში, ლატვიასთან.
ამის შემდეგ, ზუროსის გუნდი თბილისში დაბრუნდება. 8-11 აგვისტოს მორიგი ვარჯიშები ექნება, რასაც საერთაშორისო ამხანაგური ტურნირი „მერიის თასი“ მოჰყვება. 12 აგვისტოს, საქართველო იორდანიას ეთამაშება, ხოლო მონტენეგრო – ირანს. ამ წყვილების გამარჯვებულები 13 აგვისტოს ერთმანეთს პირველი ადგილისთვის დაუპირისპირდებიან, დამარცხებულები კი მე-3 პოზიციისთვის იბრძოლებენ. 14 აგვისტოს ქართველი კალათბურთელები დახურულ მატჩში ირანს გაეჯიბრებიან.
15-16 აგვისტოს ისევ თბილისური ვარჯიშებია, 17-ში კი, საქართველოს ნაკრები იაპონიაში გაემგზავრება, სადაც 19-21 აგვისტოს ვარჯიშები ექნება, ხოლო 22-ში დასკვნით ამხანაგურ მატჩს ავსტრალიასთან ჩაატარებს.
მსოფლიოს 2023 წლის ჩეპიონატი 25 აგვისტოდან 10 სექტემბრის ჩათვლით ჩატარდება.
გუშინ ცნობილი გახდა რომ ბელგიელ თავდამსხმელ რომელუ ლუკაკუს საუდის არაბეთის პირველობაზე მოასპარეზე „ალ-ჰილალი“ ორწლიან კონტრაქტს სთავაზობს და მზადაა ხელფასის სახით 50 მილიონი ევრო გადაუხადოს.
ლუკაკუს პრიორიტეტი „ინტერში“ დარჩენაა, სადაც გასული სეზონი იჯარით გაატარა, მაგრამ მისი სატრანსფერო უფლებები „ჩელსის“ ეკუთვნის. ვინაიდან 30 წლის ფეხბურთელის სატრანსფერო ღირებულება მაღალია, „ინტერს“ მისი გამოსყიდვის უნარი არ აქვს, მაგრამ იჯარით შენარჩუნება ისევ უნდა. მეორე მხრივ, „ჩელსის“ ურჩევნია ბელგიელი საბოლოოდ გაყიდოს, რამაც შეიძლება საუდეთში მისი ტრანსფერის შანსი გაზარდოს.
ავტორი
