გიორგი მამარდაშვილი „ვალენსიაში“ რჩება

ცნობილი გახდა, რომ საქართველოს ნაკრების კარის დარაჯი გიორგი მამარდაშვილი „ვალენსიაში“ დაბრუნდა და კლუბის საწვრთნელ ბაზაზე ვარჯიშს შეუდგა.

ევროპის 21-წლამდელთა ჩემპიონატზე თამაშის გამო მამარდაშვილს შვებულება უფრო დიდხანს გაგრძელდა, ვიდრე მისი თანაგუნდელების, რომლებიც ამჟამად შვეიცარიაში არიან, სადაც დღეს „სენტ გალენთან“ ამხანაგურ მატჩს ჩაატარებენ.

გუშინ ქართველი ფეხბურთელი საავადმყოფოში სამედიცინო შემოწმებაზე მივიდა, სადაც მას ესპანელი ჟურნალისტი დახვდა და თავის მომავალზე ჰკითხა:

„ჯერ კიდევ არ ვიცი, მგონია, რომ კი, დავრჩები“, – ასეთი გახლდათ გიორგის პასუხი.

გიორგი მამარდაშვილის „ბაიერნში“ ტრანსფერზე აქტიურად საუბრობდნენ, მაგრამ ეს გარიგება აღარ შედგება, რადგან გერმანელებმა 30 მილიონის გადახდაზე უარი თქვეს.

საქართველოს ნაკრების მცველი ლუკა ლოჩოშვილი კი ესპანურ „რაიო ვალეკანოში“ გადადის. მხარეები საბოლოო შეთანხმებასთან ძალიან ახლოს არიან.

„კრემონეზეს“ ესპანური გუნდი 2.7 მილიონ ევროს გადაუხდის და ამ დღეებში მხარეები გარიგების დახურვაზე მუშაობენ.

ლუკა ლოჩოშვილი „კრემონეზეს“ ერთი წლის წინ ავსტრიული „ვოლფსბერგერიდან“ შეუერთდა. გასულ სეზონში ქართველმა მცველმა იტალიურ გუნდში „სერია A“-ში 25 მატჩი ჩაატარა (1 გოლი, 2 საგოლე პასი), ხოლო იტალიის თასზე ორჯერ ითამაშა.

თბილისის „დინამოს“ 18 წლის ნახევარმცველი გაბრიელ სიგუა შვეიცარიული „ბაზელის“ ფეხბურთელი გახდება. იყო დრო, ეს კლუბი ჩემპიონთა ლიგის ჯგუფური ეტაპების უცვლელი მონაწილე იყო, მაგრამ ახლა ასე აღარ არის – „ბაზელი“ ბოლოს შვეიცარიის სუპერლიგის გამარჯვებული 2016/17 წლებში გახდა.

რაც შეეხება სიგუას. მას უკვე საქართველოს ყველა ასაკობრივ ნაკრებში უთამაშია, ერთი შეხვედრა ეროვნული გუნდის მაისურითაც აქვს ჩატარებული.

გუშინ გავრცელდა ინფორმაცია რომ საქართველოს ნაკრებისა და მოსკოვის „დინამოს“ ცენტრალური მცველი საბა საზონოვი იტალიურ „ფროზინონეში“ გადასვლასთან ახლოს იყო. გუშინ საბასთან დაკავშირებით ახალი ინფორმაცია გახდა ცნობილი.

ფრანგული გამოცემა „ეკიპის“ მტკიცებით, საბა საზონოვი ახლოსაა საფრანგეთის ერთ-ერთ საუკეთესო კლუბ „ლიონში“ გადასვლასთან.

„ლიონსა“ და საქართველოს ნაკრების ცენტრალურ მცველს შორის კონტრაქტის დეტალები შეთანხმებულია და ახლა მიმდინარეობს მოლაპარაკება ფრანგულ კლუბსა და მოსკოვის „დინამოს“ შორის.

„დინამო“ საზონოვის სანაცვლოდ დაახლოებით 3-4 მილიონ ევროს ითხოვს.

ფრანგული გამოცემა იმასაც წერს, რომ „ლიონი“ აპირებდა საზონოვის იჯარით გაშვებას ბელგიურ „მოლენბეკში“. მაგრამ, მას მერე, რაც გაირკვა, რომ „ლიონის“ მცველი სინალი დოიმანდი ავსტრიულ „ზალცბურში“ გადადის, ფრანგული კლუბი იძულებული იქნება, საზონოვი უმალ განაცხადში შეიყვანოს.

ცნობილი გახდა, რომ საქართველოს ნაკრების თავდამსხმელი ბუდუ ზივზივაძე გერმანულ „კარლსრუეს“ დიდი ალბათობით აღარ დატოვებს. სამხრეთ კორეულ კლუბთან მოლაპარაკებები ჩაიშალა.

ზივზივაძემ 22 ივლისს, „დარმშტადთან“ ამხანაგურ მატჩში ითამაშა და მიუხედავად იმისა, რომ შეხვედრა უგოლოდ დასრულდა, ეს ბუდუს ერთ-ერთი საუკეთესო თამაში იყო „კარლსრუეს“ მაისურით.

გუშინ ცნობილი გახდა, რომ მარიო რუი „ნაპოლისთან“ კონტრაქტს გაახანგრძლივებს. მხარეებს შორის შეთანხმება უკვე მიღწეულია და უახლოეს დღეებში ინფორმაცია ოფიციალურად დადასტურდება.

პორტუგალიელი მცველის კონტრაქტი ამჟამად ძალაში 2025 წლამდეა, ხოლო ის ერთი წლით, 2026 წლის ზაფხულამდე განახლება.

მარიო რუი „ნაპოლიში“ 2017 წლიდან თამაშობს და 199 შეხვედრაში 3 გოლი აქვს გატანილი. მანამდე ის „ფატიმას“, „გუბიოს“, „სპეციას“, „ემპოლისა“ და „რომას“ ღირსებას იცავდა.