გუშინ ესპანურმა გამოცემამ „Marca“ გაავრცელა ინფორმაცია, რომ შესაძლოა, მიმდინარე სეზონის შემდეგ „ვალენსიას“ მთავარი მწვრთნელი ხოსე ბორდალასი თანამდებობიდან გაათავისუფლონ. გიორგი მამარდაშვილის კლუბის მომავალ თავკაცად „გრანადას“ ყოფილ მთავარ მწვრთნელს, 41 წლის დიეგო მარტინესს ასახელებენ.
მარტინესი იმ „გრანადას“ წვრთნიდა, ევროპა ლიგიდან მამარდაშვილი და მისი თბილისის „ლოკომოტივი“ რომ გამოთიშა.
გუშინ ესპანურმა გამოცემამ „Eldesmarque“ გიორგი მამარდაშვილზე კიდევ ერთხელ დაწერა.
„გიორგი მამარდაშვილი „ვალენსიასთვის“ ამ სეზონში ერთ-ერთი ყველაზე დიდი სიურპრიზი იყო და ბოლო კვირებში ის კლუბის მფარველი ანგელოზიც გახდა. იმის მიუხედავად, რომ მას სეზონში რამდენიმემატჩიანი ჩავარდნა ჰქონდა, „ლა ლიგის“ ბოლო შეხვედრებში და ესპანეთის თასის ფინალში მაინც გმირის ამპლუაში მოგვევლინა. მამარდაშვილი ნამდვილად უხდება „ვალენსიას“, რაც სტატისტიკაშიც კარგად მეტყველებს: 20 თამაში ძირითად შემადგენლობაში და ცხრაჯერ მშრალად შენახული კარი, 23 თამაში მის გარეშე და 5-ჯერ მშრალი კარი. ეს ყველაფერი მის საიმედოობას უსვამს ხაზს. ქართველმა მეკარემ ყველა მოლოდინს გადააჭარბა. არ უნდა დაგვავიწყდეს, რომ ის საფეხბურთო კლუბ „მესტალიასთვის“ იყიდეს და მეხუთე დივიზიონში უნდა ეთამაშა“.
გუშინ, საქართველოს საკალათბურთო ნაკრების შემტევი თორნიკე შენგელია „ვირტუს ბოლონიასთან“ ერთად ევროთასის გამარჯვებული გახდა. ქართველის კლუბი გადამწყვეტ დაპირისპირებაში თურქულ „ბურსასპორს“ დაუპირისპირდა და 13 ქულის სხვაობით – 80:67 იმარჯვა. ამ წარმატების შემდეგ მომავალ სეზონში „ვირტუსი“ საკალათბურთო ევროლიგაში იასპარეზებს.
თორნიკე შენგელია ფინალში სასტარტო ხუთეულში გამოვიდა და მოედანზე 21 წუთი გაატარა. მან 5 ქულა, 7 მოხსნა და 2 შედეგიანი გადაცემა მოაგროვა.
შეხვედრის დასრულების შემდეგ ქართველმა შემდეგი კომენტარი გააკეთა:
„ამ საღამოს ბრწყინვალე ატმოსფერო იყო, რაც ადასტურებს, რომ „ვირტუსი“ უდიდესი კლუბია და ბოლონია კალათბურთის სათამაშოდ მშვენიერი ქალაქია. ვნახოთ, რა იქნება მომავალში, ახლა კი იტალიის ჩემპიონატზე უნდა ვკონცეტრირდეთ“.
გუშინ ცნობილი გახდა რომ „იუვენტუსის“ ლეგენდარული ფეხბურთელი, ჯორჯო კიელინი სეზონის ბოლოს ტურინულ კლუბს დატოვებს. ამის შესახებ 37 წლის ფეხბურთელმა იტალიურ მედიასთან საუბრისას განაცხადა.
„კლუბში გატარებული ბოლო 10 წელი წარმოუდგენლად შთამბეჭდავი იყო. რაც შემეძლო, კლუბისთვის ყველაფერი გავაკეთე და იმედი მაქვს, რომ რაღაცას დავტოვებ. ჩემს სტადიონზე უკანასკნელ მატჩს ორშაბათს გავმართავ და გულშემატკივრებსაც დავემშვიდობები. თუ ძალა მექნება ფლორენციაშიც ვითამაშებ. ეს 100%-ით ჩემი არჩევანია და მიხარია, რომ წასვლის დროსაც ასეთ მაღალ დონეზე ვარ. დიდი ხნის განმავლობაში ვამბობდი, რომ ისეთ დროს არ მინდა კარიერის დასრულება, როდესაც მაღალ დონეზე თამაშის ძალები აღარ მექნება. გუნდისთვის ყველა ძალა გავიღე და მალე „იუვენტუსის“ ყველაზე თავდადებული გულშემატკივარი გავხდები. კლუბში გატარებული ამდენი წლის შემდეგ, ამ გრძნობებისგან თავის დაღწევა შეუძლებელია“, – განაცხადა კიელინიმ.
უკრაინაში კი ომი გრძელდება. ცნობილი გახდა რომ ამ ქვეყნის პრემიერლიგის „ინჰულეცის“ პრეზიდენტმა ოლექსანდრ პოვოროზნიუკმა, რომელიც ახლა „პეტრივშინას“ მოხალისეთა ბატალიონის მეთაურია, რუს ოკუპანტებს ტანკი წაართვა.
„როგორ არ მინახავს ოკუპანტები. აბა, ვის წავართვი ტანკი? ვნახე. მათ რა დაემართათ? ბებიას და ბაბუას ღორი მოჰპარეს და ეს ბო*ები მწვადს მიირთმევდნენ. როდესაც მივედით, ავტომატი გადავტენე და ვუთხარი: „საღამო მშვიდობისა, ჩვენ უკრაინიდან ვართ“. ხორცი ყელში გაეჩხირათ. ცოდვა არ დავიდე, არავის ვესროლე, შეიძლება. ომის შემდეგ იქ ეს ამბავი ლეგენდა იქნება. ვინც ეს ნახა, სხვებს მოუყვებიან“, – განაცხადა ოლექსანდრ პოვოროზნიუკმა.
ბრიტანელი დეპუტატი კრის ბრაიანტი კი როჯერ ფედერერისა და რაფაელ ნადალის კრიტიკით გამოვიდა და აღნიშნა, რომ მსოფლიო ჩოგბურთის ვარსკვლავები უკრაინასთან ომში ვლადიმირ პუტინის დამარცხების მომხრეები სულაც არ არიან.
„ფედერერი და ნადალი უნდა გამოტყდნენ, რომ სულაც არ სურთ, რომ პუტინმა წაიფორხილოს. საერთოდ ეს საკითხი ანაღვლებთ? მამაკაცთა ტური საერთოდაც აღმაშფოთებლად იქცევა. მათ თითქოს არც გაუგიათ უკრაინაში რა ხდება. იქნებ ეს ყველაფერი არც აინტერესებთ?!“.
რამდენიმე კვირის წინ უიმბლდონის წლევანდელი ტურნირიდან რუსი და ბელარუსი ჩოგბურთელების მოკვეთის გადაწყვეტილება იქნა მიღებული. ამ ფონზე, ATP-ს მოთამაშეთა საბჭო ინიციატივით გამოდის, რომ ბრიტანულ ტურნირზე სარეიტინგო ქულები აღარ გათამაშდეს ანაც იმ ჩოგბურთელებს, რომლებიც უიმბლდონზე ვერ ითამაშებენ, ქულები შეუნარჩუნდეთ.
კრის ბრაიანტის მიერ კონკრეტულად ფედერერისა და ნადალის მიმართ უკმაყოფილება იმითაა გამოწვეული, რომ შვეიცარიელ და ესპანელ ჩოგბურთელებს არსებულ ვითარებაზე მკაფიო პოზიცია ჯერაც არ დაუფიქსირებიათ.
ავტორი
