გუშინ, ბრიტანულ და იტალიურ მასმედიაში, ფრანგული „მეცის“ თავდამსხმელ გიორგი მიქაუტაძის შესახებ ორი საინტერესო ინფორმაცია გავრცელდა.
ინგლისის პრემიერლიგაში დაბრუნების შემდეგ „ბარნლი“ შემადგენლობის გაძლიერებას გეგმავს. ბრიტანული მედიის მტკიცებით, ვენსან კომპანის გუნდის სიაში გიორგი მიქაუტაძეც მოხვდა. ინგლისელები მზად არიან გიორგის სანაცვლოდ „მეცს“ 12 მილიონი ევრო გადაუხადონ.
„ბარნლის“ სამიზნეები ზაფხულში იქნებიან: გიორგი მიქაუტაძე („მეცი“), იან კარამო („ტორინო“), ჩერნი ჩეკვუემეკა („ჩელსი“), ელ ბილალ ტურე („ალმერია“), მიჩი ბატშუაი („ფენერბაჰჩე“), დავიდ კარმო („პორტუ“) და შარლ დე კეტელარე („მილანი“).
გუშინ გაჟღერდა რომის „ლაციოს“ სახელიც, რომელთან მიმართებაშიც გიორგი ახსენეს. გამოცემა „Noibiancocelesti“ ამტკიცებს, რომ ამ კლუბში მიქაუტაძეს ჩირო იმობილეს შემცვლელის როლში განიხილავენ. იტალიელი ჯერ „ლაციოს“ დატოვებას არ აპირებს, მაგრამ მაურიციო სარის სურს, რომ გუნდში მისი ალტერნატიული ვარიანტი ჰყავდეს.
„ვიცე-იმობილეს ახალი ვარიანტის სახელი საფრანგეთიდან მოდის. საუბარია „მეცის“ 22 წლის ფეხბურთელ გიორგი მიქაუტაძეზე, რომელიც საფრანგეთის ლიგა 2-ში თამაშობს. დიდი პერსპექტივის მქონე ახალგაზრდა, რომელიც ამ სეზონში 22 გოლით და 8 საგოლე პასით გამოირჩა. ქართველი ტიპიური ცენტრფორვარდია, რადგან ის მხოლოდ 1.76 სმ სიმაღლისაა და მოძრაობებით ძალიან ჰგავს დრის მერტენსს, მიუხედავად იმისა, რომ ახლა ცენტრალური თავდამსხმელის პოზიციაზე თამაშობს. სწრაფია, კარგი ტექნიკით. აქვს გოლის ალღოც, რის გამოც რამდენიმე ევროპული კლუბის ყურადღების ცენტრში მოექცა, კარგი სეზონის გათვალისწინებით კი მისი ფასი გაიზარდა. „ლაციო“ ცდილობს აჯობოს სხვა ევროპულ კლუბების, რომლებიც ოცნებობენ ისეთ ტრანსფერზე, როგორიც „ნაპოლიმ“ გააკეთა მისი თანამემამულე კვარაცხელიას შემთხვევაში“, _ დაწერა იტალიურმა გამოცემამ.
„პარმას“ ყოფილი სპორტული დირექტორი და „ნაპოლის“ გულშემატკივარი ენრიკო ფედელე ლუჩანო კი ლუჩანო სპალეტის ურჩევს, რომ ამჟამინდელი გუნდი დატოვოს.
„ჩემი აზრით, სპალეტის სურს ახალი თავგადასავალი. ის ხედავს, რა მოხდა „მილანში“ შარშან: პიოლის „მილანი“ გმირი იყო ერთი წლის წინ, მაგრამ ახლა მისი გუნდიდან გაგდება უნდათ. თუ ყველაფერი კარგად წავა, დე ლაურენტისი ღმერთი იქნება, თუმცა, ახლა გუნდს თუ დატოვებს და „ნაპოლი“ მომდევნო სეზონში მესამე ადგილს დაიკავებს, ყველაფერი დე ლაურენტისის ბრალი იქნება. ამიტომაც, მისი მხრიდან კონტრაქტის განახლების შეთავაზება სტრატეგიული ნაბიჯია, რათა შემდეგ ყველაფერი სპალეტის დააბრალოს. სპალეტის ადგილზე რომ ვიყო, გუნდს დავტოვებდი, რადგან სჯობს გამარჯვებული წახვიდე“.
„ნაპოლიმ“ იტალიის ჩემპიონატი უკვე მოიგო, ამიტომაც ახლა უფრო მეტად კლუბის სამომავლო გეგმებზე საუბრობენ, ვიდრე სეზონის დარჩენილ ნაწილში გასამართ მატჩებზე.
ამ თემაზე ვრცელი კომენტარი ტელეკომპანია „RAI“-ის ჟურნალისტმა ჩირო ვენერატომ გააკეთა.
„ჯუნტოლი „ნაპოლის“ დატოვებასთან ერთ ნაბიჯშია, ის კლუბისგან მხოლოდ მწვანე შუქს ელოდება. სამუშაოდ „იუვენტუსში“ წავა, მიუხედავად იმისა, რომ შეთავაზებები პრემიერლიგიდანაც ჰქონდა. დე ლაურენტისმა შეიძლება ის პიეტრო აკარდით შეცვალოს, რომელიც ფავორიტია, მეორე ვარიანტი კი ჩირო პოლიტოა „ბარიდან“. „ნაპოლის“ ასევე დატოვებს კიმი 60-მილიონიანი გამოსასყიდით, რომლის გადახდას „მანჩესტერ იუნაიტედი“ აპირებს. მას ალბათ ჯორჯო სკალვინი შეცვლის, მაგრამ შტუტგარტელი ბერძენი მავროპანოსიც მოსწონთ. გაურკვეველია მხოლოდ ოსიმენის ბედი, რომლის შენარჩუნებას დე ლაურენტისი კიდევ ერთი წლით შეეცდება, მაგრამ თუ ეს არ გამოვიდა, პირველი ალტერნატივა „ლილიდან“ ჯონათან დავიდის შეძენაა. დე ლაურენტისსა და სპალეტის შორის უბრალო შეხვედრა არ ყოფილა. კლუბის მეპატრონემ მწვრთნელს დაუდასტურა ამბიციური გეგმები და უთხრა, რომ კონტრაქტის პირობებიც გაუმჯობესდება. შესაბამისად, ახლოსაა 2-წლიანი კონტრაქტი სეზონში 4 მილიონი ევროს ანაზრაურებით, პლუს 1 მილიონი ბონუსით. სწორია, რომ „ნაპოლი“ სპალეტის შენარჩუნებას აპირებს”, _ თქვა ვენერატომ.
„ნაპოლის“ სატრანსფერო გეგმებზე ისაუბრა ცნობილმა იტალიელმა ჟურნალისტმა ჯანლუკა დი მარციომაც. დი მარციოს აზრით, ხვიჩა კვარაცხელიას გუნდიდან წასვლა ამ ეტაპზე გამორიცხულია:
„დიახ, კვარაცხელია ნამდვილად „ნაპოლიში“ დარჩება. ოსიმენის სიტუაცია განსხვავებულია, რადგან თუ 150-მილიონიანი შემოთავაზება გამოჩნდება, უარის თქმა რთული იქნება“.
„ნაპოლიმ“ იტალიის ჩემპიონატი 33-წლიანი პაუზის შემდეგ მოიგო. სეზონის ბოლომდე ლუჩანო სპალეტის გუნდი სამ შეხვედრას ჩაატარებს „ინტერის“, „ბოლონიასა“ და „სამპდორიას“ წინააღმდეგ.
გიორგი მამარდაშვილის „ვალენსიამ“ კი ესპანურ ლა ლიგაში უმნიშვნელოვანესი მატჩი მოიგო და გასავარდნ ზონას მცირედით დაშორდა. „სელტასთან“ წარმატებაში ერთ-ერთი მთავარი როლი ქართველმა მეკარემ ითამაშა, რომელმაც მხოლოდ 1 გოლი გაუშვა და საერთო ჯამში, 5 სეივი ჰქონდა.
გამოცემამ „Marca” ქართველ კარის დარაჯსა და „ვალენსიას“ წერილი მიუძღვნა:
„გიორგი მამარდაშვილმა „ვალენსია“ კიდევ ერთ მატჩში გადაარჩინა. მან ამჯერადაც საკვანძო როლი ითამაშა მატჩში, რომელიც გუნდს ვიგოში „სელტასთან“ ჩაატარა. სწორედ ქართველი მეკარის დიდი დახმარებით, ვალენსიელებმა ლა ლიგაში დასარჩენად „პირველი ფინალი“ მოიგეს.
ყველაფერი იმაზე მეტყველებს, რომ მამარდაშვილი „ვალენსიას“ მაისურით ბოლო მატჩებს ატარებს. მისით ყველაზე მეტად ინგლისურ პრემიერლიგაში არიან დაინტერესებულნი. მაგალითად, „მანჩესტერ იუნაიტედს“ დავიდ დე ხეას შემცვლელად სურს, თუმცა, იქვე არიან „ტოტენჰემი“, „ჩელსი“ და „ლესტერიც“.
„ვალენსიას“ გადაყიდი ფეხბურთელების სიაში ქართველი მეკარე პირველი უწერია და იგივე ბედი ელის იუნუს მუსასაც. სწორედ ამ ორი ფეხბურთელის გასხვისებით აპირებს კლუბი არსებული არცთუ სახარბიელო ფინანსური მდგომარეობა გამოასწოროს“.
ავტორი
