გიორგი სალუქვაძის სახლ-მუზეუმმა ფესტივალის მონაწილეებს უმასპინძლა

უკვე 9 წელია ოზურგეთის მუნიციპალიტეტი გიორგი სალუქვაძის სახელობის ფოლკლორის საერთაშორისო კონკურს-ფესტივალს მასპინძლობს.

კონკურსი, რომელშიც ესტონეთის, ლიტვის, ლატვიის, ყაზახეთის, ბელორუსიის, უკრაინის, სლოვაკეთის, ასევე საქართველოს რეგიონების ქორეოგრაფიული ანსამბლები მონაწილეობდნენ, დაბა ურეკის კულტურის სახლში გაიხსნა.

კონკურსის მეორე დღეს, ფოლკლორული ფესტივალის  მონაწილეების ნაწილი სოფელ ცხემლისხიდში იმყოფებოდა, სადაც გიორგი სალუქვაძის სახელობის სახლ-მუზეუმში სტუმართა საზეიმო მიღება და კონცერტი გაიმართა.

გიორგი ისაკის ძე სალუქვაძე იყო ქართველი ლოტბარი, მომღერალი, ქორეოგრაფი, ინჟინერი, საქართველოს სახალხო არტისტი, საქართველოს სსრ ხელოვნების დამსახურებული მოღვაწე, საქართველოს სსრ დამსახურებული ინჟინერი, მხატვრული თვითმოქმედების დათვალიერებათა და ქართული ცეკვის ექვსი კონკურსის გამარჯვებული, სსრკ-ს ენერგეტიკისა და ელექტროფიკაციის სამინისტროსა და საქართველოს სახალხო განათლების წარჩინებულის წოდების მფლობელი სამკერდე ნიშნით (ორგზის), ბუნების ქომაგის საპატიო წოდების და ოქროს მედლის მფლობელი, საქართველოს უმაღლესი საბჭოს (სამგზის) და აჭარის უმაღლესი საბჭოს პრეზიდიუმის საპატიო სიგელების მფლობელი ხელოვნების დარგში, მეორე მსოფლიო ომის ვეტერანი.

ფესტივალი დღეს მონაწილეთა საზეიმო აღლუმითა და გალა-კონცერტით დასრულდება.