კვირას საქართველოს ეროვნული გუნდის შემტევი გიორგი შერმადინის გუნდმა „ტენერიფემ“ ევროპის ჩემპიონთა ლიგა მოიგო.
ფინალური ოთხეულის შეხვედრებს ესპანეთის ქალაქი ბილბაო მასპინძლობდა. ნახევარფინალში „ტენერიფემ“ ისრაელის „ჰაპოელი“ დაამარცხა – 78:71.
ფინალურ ორთაბრძოლაში შერმადინის გუნდი ესპანეთის „მანრესას“ დაუპირისპირდა და გაიმარჯვა- 98:87.
ქართველმა კალათბურთელმა მოედანზე 19:28 დაჰყო და ამ დროში თავი 3 მოხსნას, 1 პასს და 1 ჩაჭრას მოუყარა. მის ანგარიშზე 14 ქულაა.
გიორგი მამარდაშვილის გარშემო კი კვლავ დიდი აჟიოტაჟია ატეხილი. სოციალურ ქსელ „ტვიტერში“ გიორგის დაუფარავად აქებენ.
„მასზე ჯერ კიდევ „ვალენსიას“ პირველი თამაშის შემდეგ ვსაუბრობდი. დიდი ტალანტია!“
„შესაძლოა ნოიერის შემცვლელი გვყავდეს“.
„გუნდს გაცილებით მეტს აძლევს, ვიდრე გუნდი მისი ყოფნით კარგავს“.
გუშინ გამოცემამ „Mundo Deportivo“ „ვალენსიას“ ქართველი მეკარე კიდევ ერთხელ გამოარჩია, „ლა ლიგის“ წინა ტურის სიმბოლური ნაკრები შეადგინა და კარის დარაჯის პოზიციაზე „ვალენსიას“ 21 წლის ფეხბურთელი გაამწესა.
გიორგი ჩაკვეტაძე შეიძლება მიმდინარე სეზონის დასრულების შემდეგ ბელგიურ „გენტს“ არ დაუბრუნდეს. გუშინ, გამოცემა „BILD“-ის ინფორმაციით, გიორგი ჩაკვეტაძე, მიკელ კაუფმანი და იან გიამერა „ჰამბურგს“ შეუთანხმდნენ, რომ მათ მომავალთან დაკავშირებით მოლაპარაკების ფინალური ეტაპი სეზონის დასრულების შემდეგ გაიმართება.
გერმანული კლუბი სეზონის დასრულებამდე ორ მოთამაშეს, ფარიდე ალიდუსა და მანუელ ვინცჰაიმერს ოფიციალურად დაემშვიდობა, თუმცა ჩაკვეტაძე-კაუფმანი-გიამერას ტრიოსთან დაკავშირებით საბოლოო გადაწყვეტილებას მხოლოდ სეზონის დასრულების შემდეგ მიიღებს.
გამოცემა „Abendblatt“-ის ცნობით, გიორგი ჩაკვეტაძის „ჰამბურგში“ დარჩენა რთული წარმოსადგენია, თუმცა, რადგან კლუბი ფეხბურთელს ჯერ არ დაემშვიდობა, ეს ფაქტი გარკვეულ სპეკულაციებს აჩენს.
მეორე ბუნდესლიგის სეზონის დასრულებამდე 1 ტურია დარჩენილი, „ჰამბურგს“ ბუნდესლიგაში აღზევების რეალური შანსი აქვს, 57 ქულით მესამე პოზიციაზეა.
გუშინ გამოცემამ „Sun“ საინტერესო ინფორმაცია გაავრცელა. გაზეთის მტკიცებით, „მანჩესტერ იუნაიტედის“ მოთამაშე კრიშტიანუ რონალდუ კლუბის დატოვებას არ აპირებს. პორტუგალიელ ვარსკვლავს „იუნაიტედთან“ ხელშეკრულება კიდევ ერთი სეზონით აკავშირებს და სურს ბოლომდე ქალაქ მანჩესტერში დარჩეს.
„Sun“-ს „მანჩესტერ იუნაიტედთან“ დაახლოებული წყაროს კომენტარი მოჰყავს, რომელიც აცხადებს, რომ წარუმატებელი სეზონით რონალდუზე მეტად არავინაა იმედგაცრუებული და არ უნდა, კლუბი მძიმე პერიოდში მიატოვოს.
„დორტმუნდის“ თავდამსხმელი ერლინგ ჰოლანდი კი კარიერას ოფიციალურად „მანჩესტერ სიტიში“ გააგრძელებს. შეთანხმება მიღწეულია და ამ კვირაში ყველაფერი ოფიციალურად დადასტურდება.
ჰოლანდი „პრემიერ ლიგის“ ყველაზე მაღალანაზღაურებადი ფეხბურთელი გახდება. ნორვეგიელი 5-წლიან კონტრაქტს გააფორმებს და მისი ანაზღაურება კვირაში 500 000 გირვანქა სტერლინგი იქნება.
გუშინ ლეგენდარულმა მოჭადრაკე გარი კასპაროვმა საინტერესო განცხადება გააკეთა. მას მიაჩნია, რომ ჭადრაკის საერთაშორისო ფედერაცია რუსული სპეცსამსახურებიდან კონტროლდება.
„მსოფლიოში ბევრი სპეცსამსახურია, მაგრამ ფიდეს ყოველთვის სახელმწიფო უშიშროების კომიტეტი აკონტროლებდა და ახლაც ასეა. ფედერაციას რუსები პრეზიდენტების საშუალებით აკონტროლებენ – ფლორენსიო კამპომანესიდან (ფიდეს პრეზიდენტი 1982-1995 წლებში) დაწყებული, არკადი დვორკოვიჩით დამთავრებული. ორგანიზაციის ყველა ხელმძღვანელი სუკ-იდან იმართება. თუ ეცადნენ ჩემს თანამშრომლობაზე დაყოლიებას? არ ვიცი, შესაძლოა, მაგრამ მე გააზრებულად მსგავსი საუბარი არ მქონია, რადგან პრინციპებზე მყარად ვდგავარ და საკუთარ დამოუკიდებლობას ყოველთვის ვინარჩუნებდი. იდეალები გამაჩნია და თავისუფლებას „საჭირო საქმეს“ არასდროს შევწირავ, არ აქვს მნიშვნელობა, რა სარგებელს მივიღებ“. – განაცხადა გარი კასპაროვმა.
ავტორი
