გუშინ ცნობილი გახდა, რომ საქართველოს ნაკრების ცენტრალური თავდამსხმელი გოგა ბითაძე კარიერას „ორლანდო მეჯიქში“ გააგრძელებს.
ქართველ მოთამაშესა და ფლორიდულ გუნდს შორის ორწლიანი ხელშეკრულება გაფორმდა.
რამდენიმე დღის წინ ბითაძეს „ინდიანამ“ კონტრაქტი გაუწყვიტა, რის შედეგადაც თავისუფალი აგენტი გახდა, თუმცა, ეროვნულ საკალათბურთო ასოციაციაში დარჩენა მაინც მოახერხა.
ბითაძემ „ინდიანას“ მაისურით 170 თამაში ჩაატარა, საშუალოდ კი 4.8 ქულას და 2.8 მოხსნას აგროვებდა. ქართველ კალათბურთელს კარიერის განმავლობაში თბილისის „ვითაში“, სერბულ „მეგა ბიმაქსში“, „ბუდუჩნოსტსა“ და „სმედერევოში“ აქვს ნათამაშები.
„ორლანდო მეჯიკს“ ბითაძის გარდა სამი ნომინალური ცენტრი ჰყავს. განაცხადში ვენდელ კარტერი, ბოლ ბოლი და მორის ვაგნერი ირიცხებიან. სამივე მათგანი მიმდინარე სეზონში საშუალოდ 10 ქულაზე მეტს აგროვებს. ყველაზე კარგი სტატისტიკა კი ბითაძის მსგავსად 23 წლის კარტერს აქვს: 15.1 ქულა, 8.6 მოხსნა, 2.6 პასი.
„ორლანდო“ 24 მოგებით და 34 წაგებით აღმოსავლეთ კონფერენციაში მე-13 ადგილზეა, თუმცა ფლეი-ოფში მოხვედრის შანსი ჯერ კიდევ აქვს. „ორლანდოს“ ისტორიაში ბითაძე მეორე ქართველი კალათბურთელია – ამ კლუბის ღირსებას 2003-2004 წლების სეზონში ზაზა ფაჩულია იცავდა, როდესაც NBA-ში პირველი სეზონი ჩაატარა.
გუშინ გაირკვა, რომ „ვალენსიას“ თავდამსხმელი ედინსონ კავანი მინიმუმ ერთი თვის განმავლობაში ვერ ითამაშებს.
35 წლის ურუგვაელი ფეხბურთელი ესპანური „ლა ლიგის“ ბოლო ტურში ბილბაოს „ატლეტიკთან“ მატჩში დაშავდა და პირველივე ტაიმში შეცვალეს. ჯერჯერობით, სამედიცინო გამოკვლევის საბოლოო შედეგები ცნობილი არაა, მაგრამ ვარაუდობენ, რომ ბარძაყის დაზიანების გამო კავანი 3-4 კვირას გამოტოვებს.
„ლივერპულის“ თავდამსხმელმა, მოჰამედ სალაჰმა, „ევერტონთა“ ინგლისის ჩემპიონატის 23-ე ტურის საშინაო მატჩში გოლი გაიტანა.
ეს ბურთი ეგვიპტელის მე-100 წარმატებული ქმედებაა (71 გოლი, 29 გადაცემა) „ენფილდის“ სტადიონზე. ის მე-13 მოთამაშე გახდა, რომელმაც ერთ არენაზე 100 გოლში მიიღო მონაწილეობა. ამისთვის მოჰამედს 104 შეხვედრა დასჭირდა.
ლიგის ისტორიაში ერთ სტადიონზე მხოლოდ ორმა მოთამაშემ დააგროვა 100 ქულა უფრო სწრაფად – ტიერი ანრიმ „ჰაიბერიზე“ (92 თამაში) და ალან შირერმა „ივუდ პარკზე“ (74).
ალბათ გახსოვთ, შარშან, პარიზში ჩატარებული ჩემპიონთა ლიგის გადამწყვეტი შეხვედრა და ის არაერთი საორგანიზაციო ხარვეზი რომელიც იმ თამაშს თან ახლდა.
„უდიდესი ქაოსი, რომლის ფონზეც შარშან ჩემპიონთა ლიგის ფინალი გაიმართა, პირველ რიგში უეფას ბრალია“, – ასეთია დასკვნა დამოუკიდებელი გამოძიებისა, რომელიც სწორედ უეფას დავალებით მიმდინარეობდა. გამოკვლევის შედეგად დაწერილ განმარტებაში ვკითხულობთ, რომ როგორც ღონისძიების ორგანიზატორი, უეფაა პასუხისმგებელი იმაზე, რომ კინაღამ კატასტროფა მოხდა.
ჩემპიონთა ლიგის ფინალი 37-წუთიანი დაგვიანებით დაიწყო, რადგან გულშემატკივრები სტადიონზე შესვლას ვერ ახერხებდნენ და არენის მისადგომებთან სრული ქაოსი იყო. ბილეთების მქონე ფანები უდიდეს რიგებში იდგნენ, პოლიცია იძულებული გახდა, რამდენჯერმე ცრემლსადენი გაზი გამოეყენებინა.
ჩემპიონთა ლიგის ფინალის დღეს მომხდარი ამბების გამო 238 ადამიანი დაშავდა და 105 ადამიანი დააკავეს. დაახლოებით 2700-მა ბილეთიანმა გულშემატკივარმა სტადიონზე შეღწევა და ფინალზე დასწრება ვერ მოახერხა. გამოძიება ფრანგულმა მხარემაც აწარმოა და მათი დასკვნით, მთავარი პრობლემა გაყალბებულ ბილეთებს უკავშირდება.
დასკვნას გამოეხმაურა „უეფას“ გენერალური მდივანი თეოდორე თეოდორიდისი და ამ ორგანიზაციის სახელით ბოდიში მოიხადა:
„განსაკუთრებით „ ლივერპულის“ ფანებს ვუხდი ბოხდიშს იმ ამბების გამო, რაც მაშინ მატჩის წინ და მატჩის დროს გამოქვეყნდა. მაშინ სტატიებში „ლივერპულის“ ქომაგებს უსამართლოდ აკრიტიკებდნენ.“
თურქეთში, ქალაქ ანტალიის სასტუმრო „Royal Seginus“-ში, ერთად დაბინავებულ უკრაინელ და რუს ფეხბურთელებს შორის მასობრივი ჩხუბი მოხდა.
დაპირისპირება უკრაინის პრემიერლიგის კლუბის, უჟგოროდის „მინაისა“ და რუსეთის მეორე ლიგის გუნდის, იაროსლავის „შინიკის“ ფეხბურთელებს შორის მოხდა. კონფლიქტის აღსაკვეთათ სასტუმროს პერსონალმა ადგილზე პოლიცია და სასწრაფო სამედიცინო დახმარება გამოიძახა, საბოლოოდ კი რუსულ გუნდს სასტუმროს დატოვება მოუხდა.
რუსული მასმედიის მტკიცებით, უკრაინელმა ფეხბურთელებმა რუსებისაგან უკრაინის ჰიმნის შესრულება მოითხოვეს. ამაზე რუსების პასუხი საქმის ქუჩაში გარჩევა იყო, თუმცა სასტუმროს თანამშრომლებმა დაპირისპირებულები ერთმანეთს დააშორეს. გარკვეული დროის შემდეგ, „მინაის“ რამდენიმე მოთამაშე ერთ-ერთ რუს ფეხბურთელს ლიფტში შეხვდა და ფიზიკურად გაუსწორდა. ამ უკანასკნელს თანაგუნდელები გამოესარჩლნენ და კონფლიქტი მასობრივ ჩხუბში გადაიზარდა.
უკრაინული მედიის ინფორმაციით, დაპირისპირება ნასვამი რუსი სპორტსმენის ქცევამ გამოიწვია, რომელიც სასტუმროს პერსონალს უდიერად ეპყრობოდა და ამის გამო „მინაის“ ფეხბურთელისგან შენიშვნა მიიღო. კამათი მოგვიანებით მასობრივ ჩხუბში გადაიზარდა.
რუსული გუნდის რამდენიმე მოთამაშეს ექიმების დახმარება დასჭირდა. „შინიკის“ თავდამსხმელ ილია გრუზბოვს, სავარაუდოდ, ნეკნები აქვს გატეხილი, ხოლო ნახევარმცველ დმიტრი სამოილოვს – თითები.
ავტორი
