“თუ შეურაცხყოფას აყენებს ვინმეს, რა უნდა გააკეთოს ბორდმა? კუთხეში უნდა დააყენოს, ჯარიმა უნდა გამოუწეროს თუ რა უნდა გააკეთოს სამართლებრივად?” _ ეს განცხადება საზოგადოებრივი მაუწყებლის სამეურვეო საბჭოს თავმჯდომარემ გრიგოლ გოგელიამ გაზეთ “ბათუმელებთან” საბჭოს წევრის, გიორგი იაკობაშვილის სტატუსის კომენტირებისას გააკეთა.
გოგელია ამბობს, რომ ფეისბუქ სტატუსს, რომელშიც იაკობაშვილი ჟურნალისტური ეთიკის ქარტიას და რეგიონში მომუშავე ჟურნალისტებს შეურაცხყოფას აყენებს, არ გაცნობია და სხვის განცხადებაზე კომენტარსაც ვერ გააკეთებს.
შეგახსენებთ, რომ გიორგი იაკობაშვილმა თავის პოსტში ჟურნალისტური ეთიკის ქარტის მეხუთე კოლონა უწოდა:
“ჟურნალისტური ეთიკის ქარტია” არის ერთი ჩვეულებრივი არასამთავრობო ორგანიზაცია (ასო) რომელსაც ყავს 311 წევრი-ხელმომწერი. არანაირი წონა და ავტორიტეტი სერიოზულ, ნორმალურ ჟურნალისტებს შორის არ გააჩნია.
ამ 311 ხელმომწერიდან უმრავლესობა არის რეგიონიდან და მათთვის სასიცოცხლოდ აუცილებელია დონორებთან ურთიერთობა, რაც ფაქტობრივად შეუძლებელია ე.წ. ქარტიაზე ხელმოწერის გარეშე.
ანუ, თუ ზვიად ქორიძეს და სხვა ზვიადქორიძეებს ხელს არ აუწევენ და თავს არ დაუქნევენ, “კაი ჩიტს დაიჭერენ”.
ასე რომ, შეეშვით მაგ ასო-ზე სტატუსების წერას და ქოთქოთს. ეგენი ისეთივე ჟურნალისტები არიან, როგორც ბუღაძე-ტურაშვილი – მწერლები და ქეთათო-სტეფანე – მომღერლები.
დაიკიდეთ და გულზე მოგეშვებათ.
და, საერთოდ, ბოლომდე დაიკიდეთ ეს მესამე სექტორად წოდებული მეხუთე კოლონა.
თქვენი ქოთქოთი მათ სივებში იწერება, აქტივობაში ეთვლებათ, რის გარეშეც ევროპაში დაფუძნებული და რუსეთიდან დაფინანსებული ფონდებიდან მსუყე გრანტებს კი არა, სამში თამამს მიიღებენ.
ეს არის და ეს.” _ წერს იაკობაშვილი ფეისბუქის საკუთარ გვერდზე.
ჩვენ შევეცადეთ კომენტარები იაკობაშვილისგანაც მიგვეღო, თუმცა ის “გურია ნიუსის” სატელეფონო ზარებს არ პასუხობს. იაკობაშვილმა ჩვენ მიერ დასმულ შეკითხვას არც სოციალურ ქსელში უპასუხა.
იაკობაშვილი სამეურვეო საბჭოს წევრად “ქართულმა ოცნებამ” წარადგინა და ხმათა უმრავლესობით დაამტკიცა კიდეც. მისი ყოველთვიური ანაზღაურება საბჭოში 3800 ლარს შეადგენს.
იაკობაშვილი საქართველოს პარლამენტმა 2017 წელს აირჩია საზოგადოებრივი მაუწყებლის ბორდის წევრად. ის “ქართული ოცნების” მხარდაჭერით სარგებლობს და ყოველთვიურად 3 800 ლარს იღებს ხელფასის სახით.
